kitaifa

bunge la lala salama: upinzani wazua tafrani bungeni

Friday, July 3 2015, 0 : 0


SPIKA wa Bunge la Jamhuri ya Muungano, Bi. Anne Makinda, jana aliahirisha kikao cha 41 cha mkutano wa 20 baada ya Mbunge wa
Ubungo, Bw. John Mnyika, kuomba mwongozo wa Spika.

Akiwa amesimama, Bw. Mnyika aliomba mwongozo wa kanuni 53, kifungu (1), kifungu kidogo cha 6 na kanuni ya 86, kifungu kidogo cha 1,5 na 6 akisema ratiba ya shughuli za Bunge, imekosewa kwa kuingiza Miswada mitatu mipya ukiwemo Muswada wa Sheria ya Kulinda Watoa Taarifa za Uhalifu na Mashahidi wa mwaka 2015.

Bw. Mnyika alisema ni aibu Miswada hiyo mitatu ambayo ni muhimu kwa nchi, kuletwa kwa hati ya dharura ambapo Juni 29, mwaka huu, wabunge walipokuwa katika semina kwenye Ukumbi wa Msekwa, walikataa Miswada hiyo isipelekwe bungeni.

Mbunge huyo alikwenda mbali zaidi na kumtaka Bi. Makinda, aiondoe Miswada hiyo na ratiba ya Bunge irekebishwe kauli ambayo ilimchefua Spika na kumtaka Mnyika aifute kauli hiyo na kukubali kuifuta.

Baada ya Bw. Mnyika kutekeleza agizo hilo, Bi. Makinda alisema hakuna kanuni iliyovunjwa ndipo wabunge wa upinzani wakaanza kulalamika na mbunge mmoja wa CCM alitoa kauli ya kuwataka upinzani watoke lakini wakasema hawatoki na wamechoka kuburutwa.

Mnadhimu Mkuu wa Kambi Rasmi ya Upinzani Bungeni, Bw. Tundu Lissu, aliwaongoza wabunge wa upinzani kutetea msimamo wao akiwataka wasimame ambapo kutokana na hali hiyo, Bi. Makinda alitangaza kuahirisha Bunge na kuitaka Kamati ya Uongozi ikakutane na Bunge litakutana baadaye.

Wakati Spika anatoka bungeni, wabunge wa upinzani walikuwa wakisema wamechoka kuburutwa na wale wa CCM wakiwaambia watakutana Oktoba kwenye Uchaguzi Mkuu.

Lissu azungumza

Baada ya kutoka nje ya Bunge, Bw. Lissu alisema kitendo cha Serikali ya CCM kupeleka Miswada mitatu bungeni kwa hati ya dharura na kutaka kuipitisha kwa haraka ni uvunjifu wa kanuni za Bunge.

"Hili ni shinikizo la Marekani ili iweze kuwapatia fedha za Millenium Challenge Corporation (MCC) Septemba, mwaka huu...ndugu zangu, wabunge waliikataa Miswada hii isipitishwe ila Maofisa wa Wizara walivyokuja kuzungumza na Kamati ya Bunge ya Nishati na Madini, walisema kuna msukumo wa MCC.

"Haiwezekani Miswada mitatu ikapitishwa kwa wakati mmoja na mbaya zaidi ikaingizwa bungeni kwa hati ya dharura, kunanini hadi Serikali iwe na uharaka kiasi hicho," alihoji.

Aliongeza kuwa, Miswada hiyo ni muhimu sana lakini kutokana na maandalizi yake, haiwezi kutendewa haki kwani muda wa kupitia vifungu vyote ni mchache na kitakachotokea ni ndio na hapana.

Alisema Muswada wa Mafuta na Gesi una vifungu 261 na vifungu vidogo zaidi ya 3000 na mingine ina zaidi ya vifungu 150 akihoji mbunge gani anayeweza kupitia vifungu hivyo kwa siku nne ambapo yeye kama Mwanasheria, anahitaji miezi mitatu aweze kuchambua vizuri.

Bw. Lissu alisema mara nyingi Serikali imekuwa ikikataa kupitishwa Miswada kwenye Bunge la bajeti hivyo anashangaa kwanini mwaka huu akisema kuna jambo lipo nyuma ya pazia.

Alisema Bunge la 10 limeweka rekodi ya aina yake ambapo Spika ameweza kuahirisha vikao vya Bunge mara nyingi kuliko mabunge yote yaliyopita kwa sababu za kichama na maslahi binafsi ambayo hayana tija kwa Taifa.

Kauli ya Serikali, wabunge wa CCM

Akizungumzia sakata hilo, Waziri wa Nishati na Madini, Bw. George Simbachawene, baada ya kutoka katika kikao cha wabunge wa CCM, alisema wabunge wamekubaliana kuhakikisha wanatumia wingi wao ili Miswada hiyo ipite kwani ni muhimu kwa Taifa.

Alisema wao ndio watakuja kujibu maswali kwa wananchi hivyo hawako tayari kuona sheria nzuri za kulinda maslahi ya rasilimali
za nchi inakosekana.

Aliongeza kuwa, wabunge wamekuwa wakiutaka Muswada wa kulinda rasilimali za nchi kama mafuta na gesi ili kuhakikisha kuwa rasilimali hizo zinakuwa na amani tofauti na ilivyo sasa.

"Kimsingi tumekutana kama chama na kukubaliana kuwa Miswada hii lazima ipite na ikishindikana, niweke wazi Watanzania wataumia," alisema na kuongeza kuwa, kinachoonekana sasa ni kuwepo kwa mvutano wa kundi ambalo linasimamia uchumi na lingine linafanya kazi za kisiasa
ndani ya Bunge ili kupotosha wananchi.

"Naongea hapa nikiwa na kofia mbili moja ni kada wa CCM na mbunge, pili Waziri wa Serikali hivyo siwezi kukubali upotoshaji wa taarifa kuhusu sheria hii ambayo itawaondoa wananchi katika umaskini," alisisitiza na kuongeza kuwa;

"Hivi hata sheria hii ikizungumzia uundwaji wa Mamlaka ya Udhibiti Petroli (PURA) ni kitendo kibaya jamani...hawa wanalo jambo, wananchi wanapaswa kuwapuuza...tutatumia wingi wetu kupitisha ila kanuni pia zinataka wengi wakikubali jambo lipite," alisema.

MBIO ZA URAIS CCM: Toeni ushahidi wa rushwa- Lowassa

Thursday, July 2 2015, 0 : 0


WAZIRI Mkuu wa zamani ambaye pia ni Mbunge wa Monduli, mkoani Arusha, Bw. Edward Lowassa, amewataka watu wote wenye ushahidi unaomhusisha na vitendo vya kutoa rushwa, wautoe hadharani.

Alisema ushahidi huo uoneshe ni lini, sehemu gani ambayo alifanya vitendo hivyo na kama hakuna mwenye ushahidi huo, wahusika wa uvumi huo waache kumhusisha mara moja.

Bw. Lowassa alitoa kauli hiyo mjini Dodoma jana baada ya kurudisha fomu za kuomba kuteuliwa na Chama Cha Mapinduzi (CCM), awe mgombea urais kwa tiketi ya chama hicho katika Uchaguzi Mkuu ujao.

Msafara wa Bw. Lowassa, uliingia katika Ofisi Kuu ya CCM mkoani humo saa nane mchana akiambatana na mwanasiasa mkongwe nchini Mzee Kingunge Ngombale-Mwiru na wenyeviti wa CCM kutoka mikoa 15, baadhi ya wabunge na wana CCM.

Wenyeviti hao ni Mgana Msindai (Singida), Jesca Msambatavangu (Iringa), Hamisi Mgeja (Shinyanga), Ramadhani Madabida (Dar es Salaam), Joseph Msukuma (Geita) na Onesimo Ole Nangole (Arusha).

Wengine ni Idd Jumaa (Kilimanjaro), Walid Kabourou (Kigoma), Silima (Mjini Magharibi), Oddo Mwisho (Ruvuma), Mohamed Sinani (Mtwara)  Christopher Sanya (Mara), Haji Juma Haji (Kaskazini Unguja), Mwinyishehe Shaban (Pwani) na Abdallah Mohamed Mrisho (Kusini Pemba).

"Lazima ifike mahali niseme inatosha kutokana na hali ya majungu, upotoshaji kwa suala la rushwa...yeyote mwenye ushahidi wa shutuma hizi za kipuuzi autoe na aseme alichukua rushwa lini, kwa nani, kiasi gani, kwa ajili ya nini," alisema Bw. Lowassa.

Aliongeza kuwa; "Mimi ni mwadilifu, ninaposema itasimamia vita dhidi ya rushwa, nitafanya hivyo kwa vitendo bila kumuonea haya yeyote yule, nikichaguliwa kuwa Rais nitaendesha nchi kwa kufuata Sheria na Katiba," alisema.

Alisema anawashukuru Makatibu na viongozi wote wa CCM kwa kazi nzuri waliyoifanya kinyume na maneno yaliyoenezwa kuwa kulikuwa na matumizi ya fedha katika kuwatafuta wadhamini.

Alisisitiza kuwa, hawezi kuwahonga wana CCM zaidi ya 800,000 ambao wamejitokeza kumdhamini lakini kwa bahati mbaya, watu wasio na hoja wamekuwa wakiwatuhumu wenzao kwa vitu ambavyo havina ukweli wowote.

Bw. Lowassa alisema anaamini wana CCM hao wataendelea kumuunga mkono kwenye hatua zilizobaki ndani ya CCM ili chama hicho kiweze kumteua kuwa mgombea urais katika Uchaguzi Mkuu ujao.

"Nawashukuru wana CCM wote waliojitokeza kunidhamini katika mikoa yote niliyofika Tanzania Bara na Zanzibar;hii ni ishara njema ya kuelekea hatua zilizobaki, kwa uwezo wa Mwenyezi Mungu na kwa ushirikiano wenu, tutalivuka daraja ili niwatumikie kwa utumishi uliotukuka nikiwa Rais wa Awamu ya Tano," alisema.

Aliongeza kuwa, ana shauku kubwa ya kuunganisha nguvu na uwezo wa kila Mtanzania ili kupambana na umaskini kwa kutumia rasilimali zilizopo nchini ili waweze kuutokomeza.

Kwa upande wake, Mzee Ngombale-Mwiru alisema umati wa watu waliojitokeza kumdhamini Bw. Lowassa ni ishara ya kazi nzuri na kubwa aliyoifanya alipokuwa kiongozi (Waziri Mkuu).

Alisema anamuunga mkono kwa asilimia 100 na kuwataka wana CCM wote waliojitokeza kugombea nafasi au urais, wapendane na kuacha kusemana hadi mgombea urais atakapopatikana.

Mwenyekiti wa CCM mkoani Dar es Salaam, Bw. Madabida, alisema amekuwa akisikia tuhuma mbalimbali kuhusu Bw. Lowassa; lakini amefanya uchunguzi na kuona tuhuma hizo hazina ukweli.

  • USHIRIKINA BUNDA: Walimu watishiwa vifo

    Friday, July 3 2015, 0 : 0


    HALI bado ni tete kwenye Kijiji cha Nambaza, kilichopo Jimbo la Mwibara, mkoani Mara, kutokana na tukio la walimu wa shule ya msingi kijijini hapo, kuteswa kishirikina na kufanyiwa vitendo vya ajabu.

    Hatua ya Serikali ya Wilaya kuanza kuwakamata baadhi ya watuhumiwa wa vitendo hivyo, imeanza kuwaweka njia panda walimu waliokuwa wakifanyiwa vitendo hivyo kutokana na kutishiwa maisha yao.

    Vitisho hivyo vinadaiwa kutolewa na ndugu wa watuhumiwa ambao wanadai walimu hao ndio chanzo cha ndugu zao kukamatwa, kutakiwa kuondoka kijijini hapo, kwenda kuanza maisha mapya eneo lingine.

    Kutokana na vitisho hivyo, baadhi ya walimu wanadaiwa kufungasha mizigo yao na kujikusanya katika nyumba moja, kujulisha uongozi wa kijiji ambao ulilazimika kuwawekea ulinzi wa askari mgambo watatu waliowalinda usiku kucha wa kuamkia jana kwa silaha hafifu ambazo ni marungu, upinde na mikuki.

    Akizungumza na gazeti hili jana, mwalimu Pasco Mayamba alisema wapo katika mateso makubwa na maisha yao yapo hatarini wakitamani kukimbia kama walivyofanya walimu wenzao lakini wanashindwa kwa sababu wana familia na watoto.

    "Hatujui tukimbilie wapi ili tukaishi maisha mazuri ya furaha au amani kama wanavyoishi walimu wengine katika mikoa mbalimbali nchini, hivi sasa tunaogopa kwenda sokoni kununua chakula, ziwani kutafuta samaki hata dukani kutafuta sabuni, mahitaji mengine tukihofia kuuawa.

    "Tunaishi kama makinda ya ndege au wakimbizi waliokimbia nchi zao kutokana na machafuko na kukimbilia ng'ambo ambako wanakosa uhuru wa kufanya mambo yao kama raia katika nchi yao," alisema.

    Aliongeza kuwa; "tuliteswa na kudhalilishwa kishirikina muda mrefu, tulivumilia yote tukidhani ipo siku yatakoma lakini siku zilivyosonga mbele, mateso yalizidi kuongezeka, tumedhalilishwa mbele ya familia zetu, watoto tunaowafundisha na jamii yote ya Kijiji cha Nambaza.

    "Wakazi wa vijiji jirani nao wamesikia vitendo tulivyokuwa tunafanyiwa kishirikina kila kukicha, hatupo tayari kuendelea kuivumilia hali hiyo wala  kufundisha shule hii, tunaomba uhamisho tena wa haraka kutoka eneo la kijiji hili, ikiwezekana tupelekwe mkoa mwingine," alisema Mayamba.

    Alisema wasingependa kuishi maisha ya hofu na mashaka ya kulindwa na mgambo kama wameua wakati wao ndio wanaoteswa
    na kutishiwa kifo ambapo yote wanamuachia Mungu aamue kama ataruhusu wafe pasipo kuwa na hatia yeye ndiye anayejua.

    Akitokwa na machozi kutokana na uchungu, aliuliza kosa walilofanya walimu ni lipi na kusema, labda ni kufundisha watoto shuleni au kuingia katika taaluma hiyo ambapo vitendo walivyofanyiwa hata mnyama hawezi kutendewa kwa kuingiliwa kimwili bila ridhaa yao, kunyolewa nywele hadi sehemu za siri na vitanda vyao kugeuzwa choo.

    Vitendo vingine ni kulazwa nje wakiwa utupu na asubuhi kushuhudiwa na wanafunzi wao pamoja na uchafu mwingi usiofaa kusimuliwa ambao wote walikuwa wakifanyiwa kishirikina bila wao kujitambua.

    "Hatuko tayari kuendelea kufundisha shule hii, kama tutalazimishwa tutaachana na taaluma hii tukafanye shughuli nyingine ikiwemo ya kilimo," alisema mwalimu huyo.

    Mwenyekiti wa Serikali ya kijiji hicho, Bw. Renatus Mlekatilwa, alikiri walimu hao kutishiwa kifo na kusema baada ya kuzipata taarifa hizo, alimjulisha Ofisa Mtendaji Kata, Bw. Bryceson Mashauri ambaye aliagiza walimu hao kupewa ulinzi usiku kucha.

    Alisema waliotoa vitisho vya kuwaua walimu hao ni pamoja na watoto wawili wa kike wa familia ya watuhumiwa wa vitendo vya kishirikina ambao wamekamatwa na watu wanaofahamika kijijini hapo ambapo vyombo vya dola vina taarifa hizo na wanazifanyia kazi.

    Aliongeza kuwa, amani imetoweka kijijini hapo ambapo ushirikiano na mshikamano haupo tena ambapo hata kwenye mazishi ya baba wa kijana anayetuhumiwa kuhusika na vitendo hivyo aliyeuawa juzi na wananchi, yalisuswa na wanakijiji ambapo ndugu na familia ndio walioshiriki jambo ambalo ni tofauti na tamaduni za Kitanzania.

    Mratibu Elimu Kata ya Nansimo, Bw. Pius Chijoriga, alisema kwa hali iliyopo sasa, walimu hao lazima wahamishwe kwani kutokana na mazingira yaliyopo, hawawezi kufanya kazi ipasavyo.

    Alisema mbali na kutishiwa kuuawa, walimu hao wamedhalilishwa kwa kiasi kikubwa na wameathirika kisaikolojia, akili yao haiwezi kutulia na kuendelea kufundisha hivyo lazima wahamishwe.

    "Kipindi hiki cha likizo ya nusu mwaka, wanafunzi wa darasa la saba na la nne, walikuwa wakiendelea na masomo lakini kutokana na sekeseke hili, programu hiyo imefutwa, watoto wako nyumbani," alisema.

    Alionesha wasiwasi kuwa, huenda shule hiyo ikafungwa na wanafunzi kutawanywa katika shule jirani kwani shule za karibu zinafunguliwa ili kuanza muhula wa pili lakini Nambaza hakuna walimu walio tayari
    kuingia darasani ili kufundisha wanafunzi.

    Akizungumza na gazeti hili kwa njia ya simu, Rais wa Chama cha Walimu Tanzania (CWT), Bw. Gratian Mukoba, alisema udhalilishaji waliofanyiwa walimu hao lazima wahamishwe shule hiyo, wapelekwe kwingine ambako watapapendekeza wao.

    Alisema Mkurugenzi wa Halmashauri ya Wilaya hiyo, asisite wala kuchelewa kuwahamisha walimu hao kwani kuendelea kuwaacha hapo ni kuwadhalilisha na kuwatafutia kifo.

    "Kama Mkurugenzi atashindwa kwa makusudi kuwahamisha walimu hao, mimi nitaziona mamlaka za juu kuhakikisha walimu wanahama na kupelekwa wanakokutaka wao na kushauri watafutwe wazawa wa kijiji na eneo hilo ambao ni walimu popote walipo nchini ili wapewe uhamisho waende wakafundishe kijijini kwao," alisema.

    Mkurugenzi wa Halmashauri ya Wilaya hiyo, Luce Msofe hivi karibuni aliliambia gazeti hili kuwa kama hatua za kukomesha vitendo vya kishirikina havitachukuliwa, atawahamisha walimu wote ambapo tayari mwalimu mmoja ambaye aliathiriwa sana, amemuhamishia shule nyingine.

    Jitihada za kumpata Mkuu wa Wilaya hiyo, Bw. Joshua Mirumbe, Mbunge wa Jimbo la Mwibara, Bw. Kangi Lugola ili waweze kuzungumzia suala hilo jana ziligonga mwamba baada ya kuambiwa walikuwa katika kikao cha kuvunja Baraza la Madiwani la halmashauri hiyo.

  • Sikutumia jina la Mtume kumfananisha na Lowassa- Madabida

    Friday, July 3 2015, 0 : 0


    MWENYEKITI wa Chama Cha Mapinduzi (CCM), Mkoa wa Dar es Salaam, Bw. Ramadhan Madabida, amekanusha madai yaliyotolewa na Taasisi ya Kiislamu ya Imamu Bukhary iliyodai amemdhalilisha Mtume Muhammad (S.A.W), kwa kumfananisha na Waziri Mkuu   mstaafu, Bw. Edward Lowassa.

    Taasisi hiyo imekitaka CCM, kumuwajibisha Bw. Madabida kwa kumvua cheo hicho ili Waislamu nchini wajiridhishe kwamba kitendo chake cha kumdhalilisha Mtume si maneno ya CCM.

    Akijibu madai hayo, Bw. Madabida alisema tuhuma hizo si za kweli kama inavyodaiwa na taasisi hiyo ambapo Juni 6, mwaka huu, alimpokea Bw. Lowassa ambaye alikuwa akitafuta wadhamini kwa ajili ya safari yake ya urais na kuzungumza maneno bila kumfananisha na Mtume.

    Alisema siku hiyo alimwambia Bw. Lowassa, katika safari yake ya kutaka kuingia Ikulu, atakutana na mitihani mingi ambayo ni kawaida kumkuta binadamu yeyote, manabii na mitume hivyo anapaswa kurejea kwa Mwenyezi Mungu amuelekeze cha kufanya ili kuishinda mitihani hiyo.

    "Nilisema CCM ni chama makini chenye viongozi makini na wanachama wake hawajamsahau Lowassa, baada ya hapo nilimwambia asimame na kusalimia wana CCM...lipo gazeti moja linalotoka kila siku (si Majira), likaandika namfananisha Lowassa na Mtume jambo ambalo sikusema.

    "CCM hakiwezi kunichukulia hatua kwa sababu hicho kinachosemwa sikukisema, hii taasisi haijaniita kunieleza malalamiko yao hivyo walichokifanya ni kinyume na mafundisho ya dini," alisema.

    Aliongeza kuwa, katika Kitabu cha Quran, sura ya 48, aya ya sita, Mwenyezi Mungu anasema; "Enyi mlioamini, akikujieni mpotovu na habari yoyote ichunguzeni msije mkawasibu watu kwa kutokujua na mkawa wenye kujuta kwa mliyoyatenda", ambapo wao kama taasisi ya dini, ilipaswa kuzingatia hayo lakini haikufanya hivyo badala yake wamemtuhumu na kumhukumu.

    Alisema madhara kwa taasisi hiyo yanapatikana kwenye maneno ya Mwenyezi Mungu sura ya 24, aya ya 15 inayosema; "Mlipoyapokea kwa ndimi zenu na mkasema kwa vinywa vyenu msiyoyajua na kufikiri ni jambo dogo, mbele ya Mwenyezi Mungu ni kubwa".

    "Sura ya 16, aya ya 105, inasema wanaozua uwongo ni wale tu wasioziamini ishara za Mwenyezi Mungu na hao ndio waongo," alisisitiza Bw. Mabadiba katika majibu yake.

    Awali Mwenyekiti wa Taasisi hiyo, Shekhe Khalifa Khamis, alilaani kitendo na kumtaka Bw. Madabida kutamka hadharani kwa kufuta kauli yake na asirudie kutumia Quran kwa kutunga tafsiri potofu.

    Alisema haelewi kwanini Bw. Madabida aliamua kumdhalilisha Mtume ambapo taasisi hiyo ilikutana Juni 29, mwaka huu na kulijadili jambo hilo.

  • wagombea 4 wakwama kurudisha fomu urais ccm

    Friday, July 3 2015, 0 : 0


    CHAMA Cha Mapinduzi (CCM), kimefunga rasmi uchukuaji na urudishaji fomu za wanachama wake wanaowania nafasi za urais ambapo wagombea  38 kati 42, ndio waliorudisha fomu hizo kwa muda uliopangwa ambapo wagombea wengine wanne, wameshindwa kuzirejesha.

    Akizungumza na waandishi wa habari Mjini Dodoma jana, Naibu Katibu wa Chama hicho Tanzania Bara, Bw. Rajab Ruhwavi, alisema mchakato huo ulianza rasmi Juni 3,2015 na kumalizika jana saa 10 jioni.

    Alisema uchukuaji na urudishaji fomu umefanyika kwa utulivu, amani ambapo wagombea walioshindwa kurudisha fomu ni Peter Nyalali, Dkt. Muzzamil Kalokola, Mwalimu Antony Chalamila na Helen Elinawinga ambaye baada ya kuchukua fomu hizo, alimfuata afisa wetu wa chama amsaidie kumpa elimu ya kupata wadhamini," alisema.

    Aliongeza kuwa, kutokana na mazingira yalivyo alijibiwa kuwa hiyo haitawezekana na baada ya kuondoka, siku ya pili Maofisa wa chama hicho Makao Makuu waliukuta mkoba wake ukiwa na fomu ambazo alizichukua bila kwenda kuzifanyiakazi.

    Akizungumzia mwanachama Banda Sonoko ambaye alishindwa kupata wadhamini katika Mkoa mmoja ili kupata idadi ya mikoa 15, alisema mgombea huyo amewasilisha fomu zake bila kuzikamilisha hivyo vikao ambavyo
    vinafuata vitaamua zaidi.

    "Baada ya kazi hii kukamilika, hatua inayofuata ni vikao kuanza kuanzia Julai 7, mwaka huu, taarifa zaidi zitatolewa," alisema.

  • Uboreshaji BVR Pwani, Dar Julai 7 hadi 25

    Friday, July 3 2015, 0 : 0


    UBORESHAJI Daftari la Kudumu la Wapigakura kwa teknolojia ya Biometric Voters Registration (BVR), ulioahirishwa kwa Mkoa wa Dar es Salaam, sasa utafanyika Julai 16-25 mwaka huu na Mkoa wa Pwani,  utafanyika kuanzia Julai 7-20, mwaka huu.

    Awali uboreshaji wa daftari katika mikoa hiyo uliahirishwa kutokana na kuchelewa kwa vifaa vya uboreshaji kutoka mikoani ambavyo vilipelekwa ili kuongeza ufanisi kutokana na maeneo hayo kuwa na idadi kubwa ya watu wenye sifa ya kuandikishwa.

    Mkurugenzi wa Tume ya Taifa ya Uchaguzi (NEC), Bw. Julius Mallaba, amewataka wananchi wote wa mikoa hiyo kujitokeza kwa wingi katika vituo vya uandikishaji ambavyo vitakuwa kwenye vijiji, vitongoji na mitaa waweze kujiandikisha na kupata fursa ya kupiga kura na kuchagua viongozi wanaowataka katika Uchaguzi Mkuu.

    Alisema watu ambao wataandikishwa ni wote waliotimiza umri wa miaka 18 na kuendelea pamoja na wale ambao watatimiza miaka 18 ifikapo Oktoba, mwaka huu.

    "Wengine ni waliojiandikisha awali kwenye Daftari la Kudumu la Wapigakura la zamani ili kuhuisha taarifa zao na kupata kadi mpya za kupigia kura...watu wengine wenye sifa ya kujiandikisha kuwa ni wenye sifa za kujiandikisha lakini hawajawahi kujiandikisha kwenye daftari hilo," alisema.

    Aliongeza kuwa, wote wenye kadi za kupigiakura za zamani, wanatakiwa kwenda na kadi zao ili kurahisisha uchukuaji taarifa zao na kadi hizo zitarudishwa NEC ili waweze kupatiwa vitambulisho vipya.  

    Alisema wananchi wanatakiwa kujiandikisha katika vituo vilivyopo ndani ya kata zao ili kupata fursa ya kumchagua diwani, mbunge, rais na kutoa wito kwa wananchi wa mikoa hiyo, kujiandikisha kwani bila kufanya hivyo hawataweza kupigakura wakati wa Uchaguzi Mkuu.

    Vituo vya kujiandikisha vitafunguliwa kila siku kuanzia saa mbili asubuhi na kufungwa saa 12 kamili jioni.

kimataifa

Mazungumzo ya pili yaitishwa Brazzaville

Friday, July 3 2015, 0 : 0


JAMHURI ya Congo Brazzaville imesema kuwa inaandaa mazungumzo ya kitaifa ambayo yatafanyika nchini humo kuhusu uandaaji wa uchaguzi ujao, mazungumzo hayo  yatakayoihusisha chama tawala pamoja na vyama vya upinzani.

Tamko la kuandaliwa kwa mazungumzo hayo yalitolewa na Rais Denis Sassou Nguesso wa Jamhuri ya Congo Brazaville wakati alipokuwa akizungumza na waandishi wa habari.

Hata hivyo Rais Nguesso hakutaja kuwa ni vyama gani pamoja na viongozi gani watakaoalikwa katika mazungumzo hayo.

Hapo awali vyama vya upinzani nchini humo vilisusia mazungumzo ya Rais Sassou-Nguesso ya mwezi uliopita wa Juni yaliyokuwa na lengo la kuandaa uwanja wa mazungumzo ambapo wapinzani walisusa kushiriki mazungumzo hayo.

Kuendelea utawala wa Denis Sassou Nguesso ndilo jambo lililozusha hitilafu kati ya viongozi wa serikali, chama tawala na vyama vya upinzani.

Sassou Nguesso aliingia madarakani mwaka 1997 na katika miezi ya hivi karibuni amekuwa akifanya juhudi za kubadilisha katiba ili aendelee kubakia madarakani.

Katiba ya Congo Brazzaville ambayo ilianza kutekelezwa mwaka 2002 imeweka kikomo cha urais ambacho ni duru mbili tu.

Aidha kwa mujibu wa katiba hiyo, umri wa rais pia umewekewa mipaka ambao ni miaka 70.

Kwa mujibu wa katiba ya sasa, duru ya pili ya uongozi wa Sassou Nguesso ambaye ana umri wa miaka 71, inamalizika mwaka ujao hivyo katika hali hiyo, rais huyo haruhusiwi kusimama kama mgombea wa urais katika uchaguzi ujao.

Ange Edouard Poungui, seneta wa chama cha upinzani cha UPADS amesema katiba ya sasa ya nchi hiyo iliyopitishwa Januari 20 mwaka 2002 na kubainisha kwamba katiba hiyo haipaswi kubadilishwa.

Katika mazingira ya sasa, hatua ya Rais Denis Sassou-Nguesso ya kung'ang'ania kubadilisha katiba ya nchi ili kujiandalia mazingira ya kubakia madarakani ni suala ambalo bila shaka linaweza kuzidisha mgogoro wa nchi hiyo.

Kama rais huyo atapuuza matakwa ya wananchi basi kuna uwezekano wa yale yaliyotokea Burkina Fasso yanaweza yakatokea Congo Brazzavile pia hivo ni vyema rais huyo awe makini.

Tarehe ya kutangaza Matokeo ya Uchaguzi Burundi yatangazwa

Thursday, July 2 2015, 0 : 0


TUME ya Uchaguzi ya Burundi imetangaza kuwa matokeo ya uchaguzi wa Bunge na Madiwani uliofanyika nchini humo Jumatatu ya wiki hii yatatangazwa siku tatu hadi nne zijazo.
 
Duru za habari nchini humo zinasema kuwa sababu zilizopelekea kuongezwa muda wa matokeo ya mwisho ya uchaguzi huo ni kuongezeka kwa muda wa zoezi la kuhesabu kura za uchaguzi wa Bunge kwenye vituo viwili tofauti vya kupigia kura.

Aidha, maofisa wa tume hiyo ya uchaguzi wametumwa kwenye maeneo mbalimbali nchini humo kwa ajili ya kukusanya masanduku ya kura.

Taarifa inasema kuwa siku moja kabla ya kufanyika kwa uchaguzi huo,Rais Pierre Nkurunziza ametaka jamii ya kimataifa kuheshimu uhuru wa nchi hiyo, aidha jamii ya kimataifa, umoja wa Afrika AU na nchi za eneo la mashariki na kati mwa Afrika; awali ziliitaka Burundi ziahirishe Uchaguzi lakini Viongozi wa nchi hiyo walikataa.

Wakati huo huo, Maelfu ya raia wa Burundi wameendelea kukimbia nchi yao na kwenda nchi jirani licha ya uchaguzi wa Bunge uliofanyika juzi nchini humo na kususiwa na vyama vya upinzani.

Msemaji wa Kamisheni Kuu ya Wakimbizi ya Umoja wa Mataifa, Melissa Fleming amesema kuwa katika siku chache za hivi karibuni raia wapatao elfu 10 wa Burundi wamekimbia nyumba na makazi yao.

Taarifa zinasema kuwa Warundi hao wamekimbia makazi yao na kwenda katika nchi za jirani ambazo ni Tanzania, Rwanda na Jamhuri ya kidemokrasia ya Congo.

Aidha, Kamisheni hiyo imesema kuwa wakimbizi hao wamefanikiwa kutoroka na kwenda katika nchi hizo za jirani licha ya serikali ya nchi hiyo kufunga mipaka yote ya nchi hiyo, aidha taarifa zaidi zinasema kuwa idadi ya watu ambao wanakimbia machafuko nchini Burundi inazidi kuongezeka.

  • IS yaua Askari 64 Misri

    Friday, July 3 2015, 0 : 0


    VYOMBO vya habari nchini Misri vimetangaza kujiri mashambulizi kadhaa ya kigaidi dhidi ya askari wa serikali ya Misri na wapiganaji wa kundi la IS, kaskazini mwa nchi hiyo katika maeneo tofauti ya Peninsula ya Sinai mapema hapo jana.

    Kwa mujibu wa taarifa hizo, askari wasiopungua 30 waliuawa  asubuhi ya jana katika shambulio la bomu lililokuwa limetegwa ndani ya gari katika eneo la al-Sheikh Zuweid nchini humo.

    Mbali na uvamizi huo, wanachama wengine wa kundi la kigaidi la IS walivamia idara ya polisi katika eneo hilo suala lililopelekea askari kujibu mashambulizi hayo.

    Mbali na eneo la al-Sheikh Zuweid, magaidi hao wametekeleza mashambulio mengine kama hayo katika maeneo tofauti na hivyo kuifanya idadi ya askari waliouawa kufikia 64.

    Mpaka sasa tayari kundi la Answar Baitul-Muqaddas ambalo limetangaza utiifu wake kwa kundi la kigaidi na kitakfiri la IS limetangaza kuhusika na mashambulio hayo huku likiahidi kuendeleza vitendo hivyo.

    Kwa mujibu wa jeshi la Misri, jumla ya vituo 15 vya upekuzi vya jeshi vimeshambuliwa na magaidi hao.

    Pia taarifa nyingine inasema kuwa magaidi 35 waliuawa katika mashambulio hayo.

    Kutokana na mashambulizi hayo, jeshi la Misri limetangaza kuchukua hatua mpya za kiusalama kwa lengo la kukabiliana na wimbi la vitendo vya kigaidi vinavozidi kuikabili nchi hiyo.




  • Google yaomba radhi kuwaita wapenzi 'sokwe'

    Friday, July 3 2015, 0 : 0


    KAMPUNI ya mtandao wa Google imeomba radhi baada ya kutoa picha ya wapenzi wawili, Wamarekani wenye asili ya Afrika  maelezo ya picha hiyo yaliwaita wapenzi hao 'sokwe'.

    Kampuni hiyo ya Google imesema kuwa inaomba radhi sana kwa kuchapishwa kwa maelezo hayo ambayo katika hali moja au nyingine yanaonekana kuwa ni ya kibaguzi.

    "Tunachukua hatua hii ya kuomba tahadhari mapema ili kuzuia ili kuzuia mtazamo wowote hasi unaoweza kuchukuliwa na jamii kutokana na maelezo ya picha ya wapenzi hao," alisema msemaji wa kampuni hiyo.

    "Kazi ya kuandikia maelezo 'kulebo' bado inaendelea na hivyo tumejipanga vyema zaidi ili kuepuka matatizo kama haya yasijirudie huko mbeleni" alisema msemaji huyo.

    Pia Mkurugenzi Mkuu wa kampuni ya Google katika kitengo cha Ubunifu, Yonatan Zunger alisema kuwa jambo hilo ni kosa kwa asilimia 100 na ameahidi kulifanyia kazi mara baada ya kupata taarifa hizo.

    Miongoni mwa wale waliopata fursa ya kusoma ujumbe huo kupitia mitandao ya kijamii wameuita ujumbe huo kuwa ni kuendeleza ubaguzi wa rangi.

  • Wahamiaji walioingia Ulaya wafikia 137,000

    Friday, July 3 2015, 0 : 0


    IDADI ya wahamiaji na wakimbizi waliovuka Bahari ya Mediterenia mwaka 2015 imefikia watu 137,000 ambao waliongia Ulaya kati ya mwezi Januari na Juni rekodi ambayo haijawahi kutokea katika miaka ya nyuma.

    Ripoti hiyo ilitolewa jana na Shirika la Umoja wa Mataifa la Kuhudumia Wakimbizi, UNHCR.

    Ripoti hiyo ya UNHCR imesema kuwa mizozo ndiyo sababu kubwa hasa ya idadi hiyo kubwa ya wakimbizi na wahamiaji waliofanya safari hatarishi za kuvuka Bahari ya Mediterenia, ingawa pia utesaji ulichangia.

    Ripoti imesema pia kuwa idadi hiyo imezidi ile ya mwaka jana wakati kama huo kwa asilimia 80.
    Wengi wa wakimbizi na wahamiaji hao wanatokea nchini Syria, Afghanistan na Eritrea.

    Ripoti hiyo inasema idadi ya vifo baharini pia ilivunja rekodi mwezi Aprili ambapo watu zaidi ya 1,300 walizama na kufa huku wengine hawajulikana walipo mpaka leo.


  • Human Rights Watch yalaani jinai za Saudia

    Friday, July 3 2015, 10 : 25


    SHIRIKA la Haki za Binadamu la Human Rights Watch limelaani jinai zinazoendelea kufanywa na Saudi Arabia za kuua raia wasio na hatia huko Yemen.

    Mkurugenzi Mtendaji wa Shirika hilo Sarah Leah Whitson,amesema kuwa shirika hilo limeagiza kufanyika kwa uchunguzi wa Matukio yote yanayofanywa na Saudia na kufidiwa hasara zote zilizosababishwa na mashambulizi ya kikatili ya Saudia nchini humo.

    Ripoti iliyotolewa na shirika hilo inasema kuwa ndege za Saudia tangu mwanzoni mwa mwezi Aprili mwaka huu zimekuwa zikishambulia maeneo ya raia Nchini Yemen na kuharibu Makazi ya watu, masoko pamoja na Shule kadhaa vikiwemo pia vituo vya mafuta.

    Ripoti hiyo inasema kuwa  mamia ya raia wakiwemo watoto wadogo na wanawake wameuawa kwenye mashambulizi hayo ya Saudia.

    Wakati huo huo;Jeshi la Saudi Arabia limetangaza kuuawa kwa wanajeshi wake watatu na mwanajeshi mmoja wa Umoja wa Falme za Kiarabu katika mashambulio ya roketi yaliyofanywa na jeshi la Yemen na vikosi vya kujitolea vya wananchi wa nchi hiyo.

    Hapo jana jeshi hilo la Saudia limetoa taarifa hiyo na kusema kuwa, Sajenti Farhan Ahmad al Haqvi na Ofisa Binafsi Ahmed Musa Motmi ambao  ni wanajeshi wa nchi kavu waliuawa katika mashambulizi hayo huko Jizan, Saudi Arabia.

    Aidha, mashambulizi hayo ya kulipiza kisasi ya Yemen yameua  Ofisa binafsi daraja la kwanza, Ali Saeed al Zahrani wa vikosi vya mstari wa mbele katika Mkoa wa Asir wa kusini Magharibi mwa Saudia.

    "

biashara na uchumi

Vodacom kutatua tatizo la mawasiliano chini ya ardhi

Friday, July 3 2015, 0 : 0


TATIZO la kupata mawasiliano ya simu kwenye vituo vya usafiri vilivyojengwa chini ya ardhi nchini Afrika Kusini limekuwa ni tatizo sugu kwa muda mrefu.

Kituo maarufu cha Gautrain ambacho kimekuwa kikitumiwa na wasafiri wengi wakiwemo wanafunzi,wafanyakazi na watalii kwa muda mrefu tangu kifunguliwe mwaka 2010 kimekuwa kikikabiliwa na tatizo la mtandao ambao ulisababisha wasafiri wanaokitumia kituo hicho kushindwa kuwasiliana kwa njia ya simu na barua pepe.

Kampuni ya Vodacom imejitosa kumaliza tatizo hilo kwa wateja wake ambapo kwa kushirikiana na idara inayosimamia usafiri wa reli na barabara,uongozi wa kituo cha Gautrain, makampuni ya Bombela na Strategic kwa pamoja makampuni hayo yanafanya mchakato wa kumaliza tatizo la mawasiliano katika kituo hicho.

Afisa Mtendaji Mkuu wa Ukuzaji Teknolojia wa kampuni ya Vodacom Afrika ya Kusini, Andries Delport anasema “Siku zote nilikuwa nakerwa na kukosekana mtandao wa mawasiliano ya simu na intaneti kwenye vituo vya treni vilivyopo ardhini hali ambayo imekuwa ikiwasababishia usambufu abiria.

"Tunajivunia kuwa mtandao wetu mkubwa nchini Afrika Kusini tumeamua kumaliza tatizo hili kwa wateja wetu” alisema.

Tatizo  hili litamalizika kutokana na vifaa bora vya mawasiliano vilivyofungwa na Vodacom  katika vituo vitatu vya treni za ardhini,vifaa hivyo vya kisasa ambavyo ni pamoja na antenna za kurusha mawasiliano zimeunganishwa na mkongo wa mawasiliano uliopo eneo la Rosebank na hatua hii pia itawezesha upatikanaji wa huduma za internet kwa urahisi.

“Utekelezaji huu ni wa awamu ya kwanza tukimaliza hatua hii tutajenga mtandao wa mawasiliano chini ya ardhi  jia yote inayopita treni na kuhakikisha mawasiliano yanakuwa mazuri muda wote,tuko katika mazungumzo ya awali na wadau tutakaoshirikiana nao kutekeelza mradi huu wa kuboresha mawasiliano kwenye miundombinu ya usafiri iliyojengwa chini ya ardhi,” alisema Delport.

Mfuko wa uwekezaji pamoja wazinduliwa

Thursday, July 2 2015, 0 : 0


KAMPUNI ya Core Capital Securities imezindua mfuko wa uwekezaji wa pamoja uitwao Umande Unit Trust, utakaowawezesha wawekezaji wengi kukusanya mitaji yao kwa pamoja ili kupata mtaji mkubwa zaidi.

UUT ni mfuko wa pili wa pamoja kusajiliwa nchini, kufuatia mfuko ulio chini ya Serikali unaojulikana kama Dhamana ya Uwekezaji Tanzania (UTT).

Akizungumza na waandishi wa habari jijini Dar es Salaam, Mkurugenzi Mtendaji wa UUT, Bw. George Fumbuka alisema kuwa wawekezaji wamepatiwa njia nyingine iliyo salama na rahisi zaidi itakayowawezesha kuwekeza fedha zao.

“Faida ya uwekezaji hutokana na ukubwa wake, yaani mtaji mkubwa huzaa faida kubwa zaidi. Lakini pia hutokana na kusambazwa kwake katika mirija kadha wa kadha ya uwekezaji,” alisema.

“Mwekezaji akitukabidhi mtaji wake, fedha huwekezwa katika mipango mikubwa ambayo mwekezaji mmoja mmoja asingeweza kuifikia. Ni wakati umefika Watanzania wachangamkie fursa hii ya uwekezaji wa pamoja ili waweze kujikwamua kutoka kwenye umaskini,” alifafanua.

Bw. Fumbuka alisema kuwa mfuko huo utawekeza katika mafungu matatu lengo likiwa ni kukidhi mahitaji ya watu kutoka kwenye makundi mbalimbali.

“Fungu la kwanza litajulikana kama Umande Capitalisation Fund, fungu hili litawafaa vijana na wafanyakazi wanaotaka kufaidika na kukua kwa mtaji wao kulingana na soko la hisa. Katika fungu hili, asilimia 95 zitawekezwa katika hisa za makampuni yenye dalili nzuri ya kukua na asilimia tano iliyobaki itawekezwa katika amana za muda mfupi zenye kuzalisha riba nzuri,” alibainisha.

Aliongeza kuwa fungu la pili ni Umande income Fund linalowafaa wanaotaka usalama wa mitaji yao huku wakipata faida ya kutosha ambapo asilimia 75 zitawekezwa katika dhamana za serikali na asilimia 25 katika hisa ili kupata faida itokanayo na kukua kwa soko la hisa la Dar es Salaam.

Alisema kuwa fungu la tatu linajulikana kama Umande Balanced Fund ambapo asilimia 60 itawekezwa kwenye hisa za makampuni na asilimia 40 kwenye dhamana za serikali na mabenki.
 
Alisema kuwa ofa ilifunguliwa Mei 18, 2015 na itakamilika Julai 24, 2015, ambapo katika kipindi hicho kila kipande kitauzwa kwa sh. 100.

“Tunatarajia vipande vianze kuuzwa au kununuliwa kutoka kwa meneja mnamo Julai 27, 2015. Tukiwa tunasonga mbele, UUT tumejipanga kutambulisha bidhaa na huduma bora zaidi katika soko lengo likiwa ni kukidhi mahitaji ya makundi tofauti tofauti katika jamii,” alisema.

  • TIB yapokea bil.30/- kila mwaka

    Friday, July 3 2015, 0 : 0


    SERIKALI inatoa sh.bilioni 30 kila mwaka katika bajeti yake kwa ajiri ya kuiwezesha Benki ya Uwekezaji Tanzania (TIB) ili iweze kutoa huduma nzuri zaidi.

    Akizungumza Dar es Salaam jana na waandishi wa habari katika Maonyesho ya 39 ya biashara ya kimataifa Mkurugenzi mtendaji wa benki hiyo, Peter Noni alisema kutokana na kuyumba kwa benki hiyo Rais Jakaya Kikwete aliamua kutoa rai ya kupewa kiasi hicho ili kufufua benki yao.

    Alisema kuwa lengo lao ilikuwa kupata mtaji wa kiasi cha sh.bilioni 500 ambapo mpaka sasa serikali imewapa bilioni 110,hivyo wanafanya jitihada kwa kushirikiana na mfuko ya hifadhi ya jamii kupata ongezeko lililokuwa linahitajika.

    Noni alisema kwa kutambua umuhimu wa viwanda na uwekezaji wa viwanda nchini wamewekeza katika Kampuni la Reli Tanzania (TRL) na Shirika la Maendeleo ya Petroli Tanzania (TPDC) ili taasisi hiza ziweze kujiendesha kibiashara na kiuchumi.

    Alisema TRL wamewekeza kiasi cha sh.bilioni 12 kwa ajili ya kutengeneza vichwa 18 vya treni ili kufufua kampuni hiyo.

    Alisema kwa mwaka jana TIB ilikopesha mkopo wa sh.bilioni 100 na mwaka huu wanatarajia kukopesha zaidi ya bilioni 200.

    Pia aliongeza kuwa utafiti waliofanya umebaini kuwa Tanzania haina viwanda vingi vya gesi kwa sababu ya kutokuwa na umeme hivyo wakiwezeshwa watafanyakazi kwa ufanisi zaidi katika uchumi.

  • Zantel yatoa msaada kwa TAS

    Friday, July 3 2015, 0 : 0


    KAMPUNI ya simu za mkononi Zantel imetoa msaada wa fedha kwa Chama Cha Maalbino Tanzania (TAS) ili kuwezesha juhudi za chama hicho kupigania haki zao na kuelimisha jamii jinsi ya kuishi na watu wenye ulemavu wa ngozi.

    Pia kimezindua ushirikiano kati yao na TAS kwa kutoa elimu kupitia ujumbe mfupi kwa wateja wake pamoja na kutumia vipindi vyake inavyodhamini ili kupeleka ujumbe kwa jamii.

    Akizungumza na waandishi mara baada ya kukabidhi hundi ya sh.milioni 5 kwa TAS, Mkurugenzi Mtendaji wa Zantel Pratap Ghose alisema mchango huo utakiwezesha Chama hicho kuelimisha jamii jinsi ya kuishi na watu wenye ulemavu wa ngozi.

    Alisema ukosefu wa elimu ya kutosha kwa baadhi ya jamii kumechangia kwa kiasi kikubwa kuongezeka kwa mauaji ya watu wenye ulemavu wa ngozi na kuwafanya kuishi maisha ya wasiwasi.

    "Zantel tunaamini kwa kutumia uwezo wetu kama kampuni ya simu tunaweza kushiriki kikamilifu tatizo hilo kwa kutoa elimu ya kutosha kwa jamii ili waweze kuona watu wenye ulemavu wa ngozi hawana tofauti na wengine",alisema

    Aliongeza kuwa kwa mujibu wa sensa ya mwaka 2012,Tanzania ina jumla ya watu wenye ulemavu wa ngozi 5,200 na wengi wao wanaishi Kanda ya Ziwa.Kwa mujibu wa Taasisi ya Under the same sun toka mwaka 2009 jumla ya kesi 155 zinazohusu walemavu wa ngozi zimeripotiwa kwenye vyombo vya sheria.

    Kwa upande wake Mwenyekiti wa TAS, Ernest Kimaya aliushukuru uongozi wa Kampuni ya Zantel kwa kukubali mashirikiano ya pamoja na chama chao na kusema fedha hizo zitasaidia juhudi zao za kupigania haki za watu wenye ulemavu.

    "Watu wenye ulemavu ni watu kama wengine, hivyo tunaiomba jamii isitutenge sisi sote ni ndugu",alisisitiza Kimaya na kuongeza kuwataka wadau wengine kujitokeza kuwezesha walemavu wa ngozi waweze kukabiliana na changamoto wanazokumbana nazo.

    Aliongeza kuwa jamii ya watu wenye ulemavu wa ngozi inakabiliwa na changamoto mbalimbali hivyo ili kukabiliana na hali hiyo watu binafsi,serikali pamoja na makampuni wazidi kujitokeza kusaidia kundi hili la jamii.

    TAS kilianzishwa mwaka 1978 kikiwa na lengo la kulinda na kuwezesha watu wenye ulemavu wa ngozi nchini na kuhudumia zaidi ya wanachama 1200.

  • TTCL yaboresha huduma intaneti

    Friday, July 3 2015, 0 : 0


    KAMPUNI ya Simu Tanzania (TTCL), imeendelea kukuza matumizi ya mawasiliano na Teknolojia ya Habari na Mawasiliano (TEHAMA) nchini ambapo kupitia kipindi cha msimu wa Sabasaba imeleta teknolojia ambayo itasaidia kampuni, taasisi na ofisi za Serikali ambazo ziko mbali na njia ya Mkongo wa Taifa kupatiwa mawasiliano ya intaneti kwa njia ya satelaiti.

    Akizungumza Dar es Salaam jana kwenye Maonesho ya 39 ya Biashara ya Kimataifa, katika viwanja vya Sabasaba, Ofisa kutoka TTCL, Fredrick Benard alisema teknolojia hiyo ni muhimu kwa kampuni na kwamba ina ubora, uhakika na kwa bei nafuu.

    Alisema, ili kupata huduma ya intaneti kwa njia ya setelaiti, mteja atapaswa kupeleka maombi rasmi ya huduma anayoitaka na baadaye atapelekewa tathmini ya gharama ya kuunganishiwa.

    Aidha alisema, kampuni iliamua kupeleka huduma hiyo kutokana na mahitaji makubwa ya matumizi ya intaneti kwa shughuli za maendeleo.
         









  • Kampuni UDA-RT kuwanoa madereva

    Friday, July 3 2015, 0 : 0


    KAMPUNI ya UDA Rapid Transit (UDA-RT) imeandaa mafunzo maalumu ya wiki mbili kwa madereva ambao wataajiriwa kwa ajili ya kipindi cha mpito kwenye barabara za Mabasi Yaendayo Haraka (BRT) ili wafikie viwango vya kimataifa.

    UDA-RT katika taarifa yake kwa vyombo vya habari ilifafanua kuwa, mafunzo hayo yatatolewa na wakufunzi wa kimataifa kwa ushirikiano na wakufunzi wa ndani ambayo yatakuwa ya nadharia na vitendo.

    Mafunzo hayo yana lengo la kuwajengea uwezo madereva na kuwa na viwango vya kimataifa ili kwenda sambamba na kipindi cha mpito kitakapoanza Septemba mwaka huu.

    “UDA-RT kwa kushirikiana na  Mamlaka ya Elimu na Mafunzo ya Ufundi Stadi (VETA) wataratibu mafunzo hayo ya udereva na tayari wakufunzi wa kimataifa wameshafika Tanzania kwa ajili ya mafunzo hayo,” ilieleza sehemu ya taarifa hiyo.

    Katika maandalizi ya kuelekea kipindi cha mpito tayari UDA-RT imeshatangaza nafasi za kazi kwa madereva 300.

    Kampuni ya UDA-RT inaundwa na Kampuni ya Usafiri Dar es Salaam UDA na wamiliki wa daladala.

    “Magari kwa ajili ya kufundishia madereva ambao wataendesha katika mfumo wa njia ya mabasi yaendayo haraka yameshawasili na zoezi linategemewa kuanza muda wowote," iliongeza taarifa hiyo.

     
    Aidha taarifa hiyo iliongeza kuwa wataalamu au wakufunzi wa mafunzo hayo wanauzoefu wa miradi ya BRT kutoka China na sehemu nyingine duniani ambako mradi kama huu upo.

    Madereva wanaolengwa wawe na uzoefu wa kuendesha magari ya abiria yenye urefu usiopungua mita 11 kwa vile mabasi hayo yatakuwa na urefu wa mita 12 na 18 na yanayobeba abiria  150 na 80.

    Kampuni hiyo iliingia mkataba wa makubaliano wa miaka miwili na Serikali kupitia Wakala wa Mabasi Yaendayo Haraka (DART) wa kuendesha mabasi ya mfumo huo.

    Kwa sasa kampuni hiyo inatarajia kuleta mabasi 76 Mwezi Septemba mwaka huu ili kuanza rasmi kipindi cha mpito cha utoaji wa huduma hiyo.

michezo na burudani

Dusan: Wachezaji Simba hawana pumzi, stamina

Friday, July 3 2015, 0 : 0


SIMBA hii si mchezo sio ile ya msimu uliopita, mwenye macho haambiwi tazama, jinsi kocha mpya wa mazoezi ya viungo wa klabu hiyo Mserbia Dusan Momcilovic alivyoanza kufanya vitu vyake jana kwa kuwahenyesha wachezaji kuhakikisha wanakuwa fiti asilimia mia moja.

Katika kuhakikisha msimu ujao timu ya Simba inakuwa moto wa kuotea mbali, imeamua kutengeneza benchi la ufundi jipya likiongozwa na Mwingereza Dylan Kerr, kocha wa viungo Dusan Momcilovic, pamoja na kocha wa makipa Abdul Idd Salim kuhakikisha msimu ujao inanyakuwa ubingwa.

Dusan jana alianza mazoezi ya kusprinti na baadaye kupanga koni na kuweka vituo tofauti, huku kila mchezaji akitakiwa kumaliza kituo jambo ambalo kwa muda mrefu lilikuwa halifanyiki kwa timu hiyo.

Mazoezi hayo yalifanyika katika klabu ya Sigara Chang'ombe jijini Dar es Salaam yakiudhuriwa na wachezaji wachache kutokana na wengine kuwepo katika timu ya Taifa kwa ajili ya michuano ya CHAN.

Mara baada ya kumaliza kwa mazoezi  hayo Dusan alisema, amegundua timu hiyo msimu uliopita ilikuwa haina nguvu na pumzi, hivyo kutokana na uwezo aliokuwa atahakikisha Simba inakuwa mfano wa kuigwa kwa kuwa na stamina ya hali ya juu.

"Mchezo wa mpira ni vita kama hauna nguvu, pumzi huwezi kucheza mchezo huo, hivyo nitaifanya Simba iwe katika kiwango cha juu katika suala zima la stamina kuhakikisha kila timu inayokutana nayo ione cha moto," alisema.

Hata hivyo aliusifia uwanja huo ni mzuri kwa mazoezi ya viungo si kwa mchezo wa soka kutokana na kutokuwa katika kiwango kizuri kiufundi.

Naye Kocha Mkuu wa timu hiyo Dylan Kerr alisema, amefurahishwa na uwezo wa wachezaji aliowakuta licha ya kuwa idadi yao ndogo kutokana na wengine kutofika na wengine kuwa katika majukumu ya timu ya Taifa.

"Wachezaji wazuri wanahitaji kujengwa kisaikolojia na kuwajengea uwezo wa kuweka akili zao zote kwenye kutafuta ushindi pamoja na mshikamano kuanzia wachezaji, viongozi, wanachama  pamoja na mashabiki tutajenga Simba nzuri", alisema.

Mbali na hilo kocha huyo alisema uwanja anaoutumia kwa ajili ya mazoezi sio mzuri, hivyo wanatarajia kutafuta kiwanja chenye kiwango cha hali ya juu ili pindi watakapokwenda kupiga kambi kuhakikisha timu hiyo inacheza soka la hali ya juu.

Ameisifia hali ya hewa ya Tanzania hususani Dar es Salaam, kuwa nzuri hivyo atafanya kazi kwa uwezo wake wote ili kuwapa faraja wana Simba ambao kwa muda mrefu wamekuwa katika majonzi.

Takribani miaka mitatu sasa klabu ya Simba haijashiriki michuano ya Kimataifa kutokana na kufanya vibaya katika Ligi Kuu Tanzania Bara huku ikibadilisha mara kwa mara makocha.

Simba yaijibu Yanga, yaenda Brazil kuleta kifaa

Thursday, July 2 2015, 0 : 0


UONGOZI wa Simba SC, umesema unatarajia kwenda nchini Brazil kwa ajili ya kwenda kusaka mshambuliaji wa kati ambaye wanataka kumsajili kwa ajili ya msimu ujao wa Ligi Kuu ya Vodacom Tanzania Bara.

Akizungumza Dar es Salaam jana, Mwenyekiti wa Kamati ya Usajili ya Simba, Zakaria Hans Poppe alisema anatarajia kwenda Brazil Jumapili kwa ajili ya kumfuata mshambuliaji ambaye wamepewa taarifa zake.

Alisema licha ya yeye kwenda Brazil, kuna viongozi wengine wamepewa jukumu la kwenda katika nchi za Chile na Uruguay kwa ajili ya kutafuta wachezaji wa kuwasajili ili kuimarisha kikosi cha timu yao.

Mwenyekiti huyo alisema, Simba ina uwezo wa kwenda nchi yoyote kutafuta wachezaji wazuri ambao wataweza kuwa na msaada kwa timu yao na kuiwezesha kufanya vyema katika ligi ya msimu ujao.

Hans Poppe alisema wamefikia hatua ya wao wenyewe kwenda kutafuta wachezaji nje ya nchi kwa kuwa hawana imani na watu wanaojifanya mawakala wakati si lolote.

"Suala la mawakala mimi sitaki kulisikia kabisa, kwanza najisikia kichefuchefu kila nikiwasikia kwa kuwa baada ya kufanikiwa mambo yao na wao wanataka fedha nyingi," alisema Mwenyekiti huyo.

Simba ina nafasi mbili za wachezaji wa kigeni, baada ya kuwa tayari ina wachezaji watano, ambao ni Waganda, beki Juuko Murushid, washambuliaji Hamisi Kiiza, Simon Sserunkuma na Emmanuel Okwi na Mrundi Laudit Mavugo.

Klabu hiyo imepania kufanya vyema katika ligi hiyo baada ya kushindwa kucheza michuano ya kimataifa kwa misimu mitatu mfululizo, hivyo imepania kujenga kikosi imara kwa ajili ya kurudisha makali yao.

Tayari Simba wameboresha benchi lake la ufundi, likiwa limeajiri makocha watatu wa kigeni akiwemo Kocha Mkuu Mwingereza Dylan Kerr, kocha wa mazoezi ya viungo, Mserbia Dusan Momcilovic, kocha wa makipa Mkenya, Abdul Iddi Salim wanaoungana na Kocha Msaidizi mzalendo Seleman Matola.

Kikosi cha Simba jana kiliingia kambini kuanza rasmi maandalizi ya msimu mpya chini ya kocha huyo Mwingereza.

Katika hatua nyingine, Simba kwa kushirikiana na Kampuni ya EAG  imezindua kadi mpya za kielektroniki kwa ajili ya wanachama wake.

Uzinduzi wa kadi hizo za wanachama umeenda sambamba na kuanzishwa kwa kadi za wanachama watoto zilizopewa jina la Simba Cubs Membership.

Kadi hizo zitawawezesha wanachama wapya kupata bima ya maisha kupitia michango wanayoitoa pamoja na kusaidiwa kiasi cha sh.250,000 pindi mwanachama anapopata msiba.

Akizungumza katika uzinduzi wa klabu hiyo Rais wa klabu hiyo, Evance Aveva alisema kuwa tangu wanaingia madarakani waliazimia kuboresha mambo mbalimbali ikiwemo  mifumo ya upataji taarifa.

Alisema kuwa kadi hizo zitawawezesha kuwa na taarifa sahihi zinazohusu wanachama wao na kuwabaini wale mamluki ndani ya klabu yao.

Wakati huo huo uongozi wa klabu hiyo, umeteua Baraza la Wazee kwa ajili ya kushauri mambo mbalimbali ndani ya klabu hiyo.

Wazee walioteuliwa ni Mzee Omary Mtika, Ally Hassan kutoka Zanzibar, Abdulsharif Zaoro na Chuma Suleiman 'Bi Hindu'.

  • Stars yaenda Uganda, Banda, Tshabalala waachwa

    Friday, July 3 2015, 0 : 0


    TIMU  ya Taifa ya Tanzania, Taifa Stars imeondoka jana  jioni kuelekea  jijini Kampala, Uganda kwa ajili ya mchezo wake wa marudiano dhidi ya Uganda 'The Cranes katika mchezo wa kufuzu kwa Fainali za Wachezaji wa Ndani CHAN.

    Abdi Banda na Mohammed Hussein 'Tshabalala'

    Mchezo huo wa marudiano utapigwa kesho katika uwanja wa Nakivubo, huku Taifa Stars wakiwaacha wachezaji kadhaa na wengine kuwa majeruhi.

    Akizungumza jana jijini Dar es Salaam, Kocha Mkuu wa timu ya Taifa Stars, Charles Boniface Mkwasa alisema kikosi  cha Taifa Stars kimeondoka  na wachezaji 20, wakiambatana na bechi la ufundi  wakiwa saba pamoja na baadhi ya viongozi wengine.

    Alisema mchezo wa kesho ni wa marudiano na ni wa muhimu kwao kushinda, kwani anaamini kwa siku alizokaa na wachezaji hao wameweza kuonesha morali ya mchezo japo ilikuwa ni muda mfupi.

    "Vijana wamefanya mazoezi vizuri katika kipindi chote cha maandalizi na sasa wapo tayari kwa mchezo huo na  mipango ikiwa ni kupata ushindi siku ya Jumamosi dhidi ya Uganda," alisema Mkwasa.

    Alisema kuna baadhi ya wachezaji hawatakuwepo katika msafara huo kwakuwa ni majeruhi akiwemo Abdi Banda na Mohamedi Hussein (Tshabalala) baada ya kupata majeruhi.

    "Katika msafara wetu tutawakosa wachezaji ambao ni Abdi Banda na Mohamed Hussein (Tshabalala) waliopata majeruhi juzi  wakati wa mazoezi yaliyofanyika uwanja wa Boko Vatereani na kusema nafasi zao zitazibwa na wachezaji waliopo kambini," alisema Mkwasa.

    Alisema wachezaji wengine waliobaki sio kama wametemwa katika kikosi cha timu ya Taifa bali timu imetakiwa kusafiri na wachezaji 20 tu na si vinginevyo.

    Hilo limekuja baada ya Mkwasa kusema kuwa baadhi ya vyombo vya habari vinaweza kuja kusema baadhi ya wachezaji wamewatema jambo ambalo si kweli.

    "Humu ninaweza kuwataja wachezaji walioachwa lakini kesho utashangaa baadhi ya vyombo vya habari vitaandika wachezaji kadhaa wametemwa katika kikosi cha Mkwasa," alisema


    Wachezaji waliosafiri na timu kuelekea Uganda ni golikipa  Ally Mustafa na Mudathir Khamis, kwa upande wa mabeki ni Juma Abdul, Shomari Kapombe, Haji Mngwali, Michael Aidani, Hassan Isihaka, Kelvin Yondani, Nadir Haroub.

    Viungo ni Frank Domayo, Mudathir Yahya, Salum Telela, Said Ndemla, Saimon Msuva, Deus Kaseke na  Ramadhan Singano huku washambuliaji ni  Atupele Green, Rashid  Mandawa, John Bocco na Ame Ally.

    Alisema kuumia kwa baadhi ya wachezaji na wengine kuwaacha sio kama watarudi nyuma ila wao watatumia mfumo wa kushambulia na kulinda goli lao.

    Aidha, aliwaahidi Watanzania kufanya kila jitihada kuweza kurudi na matokeo mazuri, kwani ana imani kuwa mpira unadunda na mchezo wa mpira hautabiriki chochote kinaweza kutokea.

  • 'Ngoma aikacha Yanga atimkia kwao'

    Friday, July 3 2015, 0 : 0


    MSHAMBULIAJI wa kigeni wa mabingwa wa Ligi Kuu Tanzania Bara Yanga, Benard Ngoma juzi alipanda pipa na kuelekea nchini Zimbabwe kwa ajili ya kuweka sawa mipango ya familia yake.

    Mchezaji huyo ambaye alikuwa anaichezea klabu ya FC Platnam ya nchini humo, alipokelewa kwa shauku kubwa na wanachama na mashabiki wa klabu hiyo.

    Akizungumza jana mara baada ya kumaliza mazoezi yanayoendelea katika viwanja vya Karume, Dar es Salaam, Kocha Mkuu wa timu hiyo Hans van de Pluijm alisema mchezaji huyo ameomba ruhusa ya siku tatu ili kwenda kuweka sawa baadhi ya mambo katika familia yake.

    "Ngoma aliondoka jana (juzi) mchana kwa ajili ya kwenda kuweka sawa mipango ya familia yake hatachelewa kwa sababu anatakiwa awahi maandalizi ya michuano ya Kombe la Kagame," alisema Pluijm.

    Alisema kuwa ujio wa mchezaji huyo ni chachu kubwa ya ushindani katika mashindano hayo.

    Wakati huo huo Ngoma alisema hana presha yoyote kuichezea Yanga na kuahidi kumuachia Mungu kila kitu kwa kuwa yeye ndio mpangaji wa yote.

    "Mimi sina presha kabisa ndani ya Yanga kikubwa namuomba Mungu ili aweze kunifanikishia niliyokuwa nimejipangia," alisema Ngoma.

  • Cannavaro: Tunaumia mashabiki wanapotuzomea

    Friday, July 3 2015, 0 : 0


    NAHODHA wa timu ya Taifa ya Tanzania, Taifa Stars, Nadir Haroub 'Cannavaro amesema kuwa wao kama wachezaji wanaumia sana pale timu yao inapofanya vibaya huku vyombo vya habari na mashabiki kuwashambulia kwa maneno makali.

    Hayo aliyasema wakati akizungumza kwa niaba ya wachezaji wenzake, ambapo alisema kuwa  mpira ni mchezo usiotabirika na lolote linaweza kutokea kwani wao wanapigana kwa juhudi zao zote.

    Alisema anashangaa hasa pale watu wanaposema kuwa hawana uzalendo na morali ya mchezo lakini hayo siyo kweli.

    Cannavaro alisema  anasikitishwa sana pale anapoona mashabiki wanaposhambulia basi lao kwa mawe na kudharauliwa pale wanapokuwa katika jamii.

    "Huwa tunaumia sana hasa pale watu wanapokuwa wanatudharau na kuonekana hatuna thamani mbele yao ikiwa mpira ndio kazi inayotupatia riziki", alisema Cannavaro.

    Alisema wao huwa wanaumia sana pale timu inapopata matokeo mabaya, lakini huwa wanajitahidi sana  kufanya vizuri lakini wanajikuta wakishindwa na kufungwa.

    Alipoulizwa juu ya matokeo waliyoyapata katika mechi mbili za mwisho, alisema walifuata vizuri maelezo ya kocha hasa katika mechi yao na Misri na kuweza kucheza dakika 60 za mwanzo bila kufungwa lakini baadae wachezaji wakasahau jinsi walivyoambiwa.

    Cannavaro alisema mechi ya marudiano kati yao na Uganda ndiyo itakayowarudishia heshima na imani kwa wananchi na mashabiki wa mpira, kwani wanaenda kule kupambana ili waweze kupata ushindi wa aina yoyote ile.

    Alimalizia kwa kusema wanafuraha kumpata kocha mzalendo na wana imaninaye, huku akiwata wanachi kuwapa moyo na siyo kuwasema vibaya ili warudi na matokeo mazuri.

  • Simba waipotezea Yanga Kagame, waisubiri VPL

    Friday, July 3 2015, 0 : 0


    UONGOZI wa klabu ya Simba umewatishia nyau mahasimu wao Yanga kuwa licha ya  kutoshiriki michuano ya Kombe la Kagame  hilo haliwapi shida na badala yake wanasubiri Ligi Kuu Tanzania Bara ili wawaoneshe kazi.

    Akitoa kauli hiyo jana, Msemaji wa klabu hiyo Haji Manara, alisema kuwa wanachokifanya kwa sasa ni kuhakikisha wanaendelea kuwanoa vijana wao kwa ajili ya ligi kuu na si vinginevyo.

    "Japo kuwa hatushiriki michuano ya kombe la Kagame hatujali bali tunakinoa kikosi chetu kuhakikisha msimu ujao tunatwaa ubingwa," alisema Manara.

    Alisema kutokana na usajili walioufanya watashika nafasi nzuri msimu huo na kuwaahidi mashabiki na wanachama wao kurudi kivingine baada ya kutofanya vizuri msimu uliopita.

    "Tumefanya usajili mzuri hivyo hatuna shaka kabisa msimu ujao tunaamini tutafanya mapinduzi makubwa,"alisema.

    Wakati huo huo alisema mbivu na mbichi za mchezaji Ramadhan Singano 'Messi'  itajulikana Jumapili ijayo, baada ya Kamati ya Sheria na Hadhi kwa Wachezaji ya Shirikisho la Soka Tanzania (TFF) kutoa jibu la mwisho juu yao na nyota huyo.

    "Jumapili ndio tutajua mbivu na mbichi kuhusu Messi, hivyo mashabiki wasiwe na shaka kila kitu kitajulikana siku hiyo,"aliongeza.