kitaifa

Mzazi alalamikia kipigo cha muuguzi

Tuesday, May 3 2016, 0 : 0

 

MKUU wa Mkoa wa Mbeya, Amos Makalla, ameupa siku saba uongozi wa Hospitali ya Rufaa ya Wazazi ya Meta, mkoani humo, kuyafanyia uchunguzi malalamiko ya mzazi anayedai kupigwa kibao na muuguzi wakati akijifungua hospitalini hapo.

Mzazi huyo Salome Waya, mkazi wa Swaya, Wilaya ya Mbeya Vijijini, alitoa malalamiko hayo jana kwa Makalla ambaye alifanya ziara ya kushtukiza katika hospitali hiyo.

Katika maelezo yake, Waya alidai mbali na kupigwa kibao, baada ya kujifungua muuguzi huyo alimtupia mtoto aliyemzaa kifuani kwake jambo ambalo lilihatarisha uhai wa mwanaye.

"Nimefanya ziara ya kushtukiza na kuwakuta akina mama wamelala chini ya uvungu wa vitanda kutokana na ufinyu wa wodi, uhaba wa vitanda... pia nilimkuta mama aliyeshikwa na uchungu akilia huku muuguzi wa kumhudumia akipiga stori bila kumsaidia.

"Nimepokea matukio makubwa mawili, moja ni taarifa ya muuguzi kumpiga kofi mjamzito wakati akijifungua, tukio lingine ni muuguzi kupiga stori wakati mama mwenye uchungu akilia bila kusaidiwa," alisema Makalla.

Akizungumzia tukio la kupigwa kofi, Waya alisema alifika hospitalini hapo Aprili 28, mwaka huu; wakati akiwa katika harakati za kujifungua, muuguzi huyo alimpiga kofi usoni, baada ya kujifungua, alimchukua mtoto na kumtupia kifuani kwake.

"Huyu muuguzi alinifanyia unyama ambao umeniumiza sana moyoni, nikiwa katika hatua za kujifungua alinipiga kofi, baadaye alimchukua mtoto na kumbamiza kifuani kwangu akisema mtoto uliyekuwa unamtaka huyo hapo," alisema Waya.

Baada ya maelezo hayo, Makalla alisema vitendo vilivyofanywa na muuguzi huyo ni ukiukwaji wa maadili ya kazi; hivyo Serikali haiwezi kuwavumilia watumishi wa aina hiyo waendelee kufanya kazi na watu wanaosababisha jamii iichukie Serikali.

Alimtaja muuguzi anayetuhumiwa kuwa ni Beatrice Sanga na kusisitiza kuwa, Serikali itawachukulia hatua watu wachache wanaoharibu taswira ya taasisi za umma kwa kukiuka maadili.

Hata hivyo, Makalla aliwapongeza madaktari wa hospitali hiyo kwa kutoa huduma nzuri isipokuwa tatizo lipo kwa wauguzi ambao wanalalamikiwa kwa lugha chafu wanazotoa kwa wagonjwa.

Aliutaka uongozi wa hospitali hiyo kubandika namba yake ya simu katika eneo la mapokezi ili wagonjwa wasipohudumiwa vizuri waweze kumpigia simu moja kwa moja ili aweze kuchukua hatua.

Mwanamke mwingine mkazi wa Sumbawanga, mkoani Rukwa, Krista Katembo aliyelazwa katika wodi namba mbili hospitalini hapo, alisema hali ni mbaya katika wodi hiyo kutokana na wagonjwa kulala chini ya uvungu wa vitanda.

"Hiki chumba ni kidogo, hakuna vitanda hivyo tunalazimika kulala chini ya uvungu wa vitanda, wote tuliopo hapa watoto wetu wapo katika chumba cha joto hivyo mazingira ni magumu," alisema.

Naye Mkurugenzi wa hospitali hiyo, Dkt. Godlove Mbwanji, alisema wamepokea maagizo hayo ambayo watayafanyia kazi kwa kuunda tume na kutoa taarifa haraka iwezekanavyo.

"Nia yetu ni kufanya kazi kwa weledi ili kutoa huduma bora kwa wagonjwa, katika mazingira kama haya hatuwezi kutetea uovu bali tutahakikisha tatizo hili tunalikomesha," alisema.

JPM amtumbua bosi uwekezaji

Friday, April 29 2016, 0 : 0

 

RAIS Dkt. John Magufuli ametengua uteuzi wa Mkurugenzi Mtendaji wa Kituo cha Uwekezaji Tanzania (TIC), Juliet Kairuki, kwa kutochukua mshahara wa Serikali tangu alipoajiriwa na kituo hicho miaka mitatu iliyopita, Aprili 2013.

Kwa mujibu wa taarifa iliyotolewa na Kurugenzi ya Mawasiliano Ikulu jijini Dar es Salaam, ilieleza kwamba Rais Magufuli, amefikia uamuzi huo baada ya kupata taarifa kwamba mkurugenzi huyo alikuwa hachukui mshahara wake.

Taarifa hiyo ilieleza kuwa Mkurugenzi huyo ambaye uteuzi wake tayari umetenguliwa Aprili 24, mwaka huu alikuwa hachukui mshahara wa serikali tangu alipoajiriwa mwezi Aprili 2013 mpaka rais alipochukua hatua hiyo.

Rais Magufuli alisema endapo, Kairuki atakuwa tayari kufanya kazi na Serikali atapangiwa kazi nyingine ya kufanya. Rais Magufuli alishangazwa na hatua ya mkurugenzi huyo kushindwa kuchukua mshahara wa Serikali katika kipindi chote hicho.

Rais ameagiza mchakato wa kumpata Mkurugenzi Mtendaji mpya wa TIC uanze mara moja na katika kipindi hiki nafasi yake itakaimiwa na Clifford Katondo hadi atakapopatikana mkurugenzi mpya.

Kitendo cha Kairuki kutochukua mshahara wa Serikali katika kipindi cha miaka mitatu kimeibua mijadala mbalimbali katika mitandao ya kijamii, huku wengine wakidai mkurugenzi huyo alikuwa anataka mshahara mkubwa tofauti na ule uliokuwa umepangwa na Serikali.

Kairuki sasa anaendelea kuwa kwenye orodha ya watumishi wa ngazi za juu Serikalini ambao nafasi zao za uteuzi amezitengua na kutangaza kwamba watapangiwa kazi.

Lakini pia Rais Magufuli akitumia falsafa yake ya utumbuaji wa majipu kwa viongozi, watumishi na watendaji wa Serikali hadi sasa kasi yake inashangaza wengi, huku baadhi ya watendaji wakubwa serikalini wakiwa hawajui hatima yao.

Mbali na waliotumbuliwa baada ya kuingia madarakani katika siku za hivi karibuni amemtumbua Mkurugenzi wa Jiji la Dar es Salaam, Willson Kabwe, kisha utumbuaji ukahamia kwa Mkurugenzi wa Mamlaka ya Mawasiliano Tanzania (TCRA), Profesa Ally Simba na kisha panga kumuangukia Mhariri Mtendaji wa Magazeti ya Serikali (TSN), Gabriel Nderumaki.

Pia katika tukio lililovuta hisia za watu wengi kitawala ni pamoja na kutengua uteuzi wa aliyekuwa Mkuu wa Mkoa wa Shinyanga, Anne Kilango, akiwa amedumu kwa siku 23 katika nafasi hiyo tangu kuapishwa kwake.

Kilango alitumbuliwa kutokana kusema katika mkoa wake kulikuwa hakuna watumishi hewa, hatua ambayo ilimfanya Rais Magufuli, kutuma watu wake kwa ajili ya uchunguzi na uchunguzi wa awali kubaini watumishi hewa 45.

  • RC Tanga awatolea uvivu madiwani

    Tuesday, May 3 2016, 0 : 0

     

     

    MKUU wa Mkoa wa Tanga, Martin Shigela, ametaka madiwani wa Chama cha Wananchi (CUF) kuacha kusababisha migogoro inayorudisha nyuma maendeleo ya wananchi na mkoa.

    Alisema migogoro hiyo, inachangia kutofanyika kwa vikao vya baraza hilo kutokana na madiwani wa CUF kutokubaliana na matokeo ambayo yalimpa ushindi Meya wa jiji hilo, Mustapha Selebosi (CCM) wakidai aliyekuwa mgombea wao, Rashidi Jumbe ndiye aliyeshinda.

    Shigela aliyasema hayo juzi katika sherehe za maadhimisho ya Siku ya Wafanyakazi Duniani ambayo kimkoa yalifanyika katika Uwanja wa CCM Mkwakwani jijini humo.

    Aliongeza kuwa, Serikali ya Mkoa haitakubali kuona maendeleo ya wakazi wa jiji hilo yakizoroteshwa na mgogoro wa madiwani ambao kama utaendelea, bajeti iliyokuwa itolewe na madiwani kwa ajili ya miradi mbalimbali, itatumika kutoa huduma kwa wananchi.

    "Kama madiwani wa CUF wanadhani wanachokifanya wanaikomoa Serikali, waelewe wanajisumbua sana maana, sisi tutaleta maendeleo kwa ajili ya wana Tanga na fedha wanazohitaji katika bajeti yao, itatumika kufanyia maendeleo ya wananchi," alisema Shigela.

    Katika hatua nyingine, Shigela aliwataka watumishi wa umma kuzingatia maadili ya kazi kwa kutimiza wajibu wao, kujiepusha na suala zima la ubadhirifu wa mali za umma.

    "Tukishirikiana kwa kupiga vita ubadhirifu, kila mmoja awe mlinzi wa mwenzake ili tuharakishe maendeleo ya wananchi na Mkoa, pia nawaomba wakazi wa jiji hili kutoa ushirikiano kwa vyombo vya ulinzi na usalama juu ya watu wanaotiliwa mashaka," alisema.

    Aliongeza kuwa, ushirikiano huo utasaidia kukamatwa kwa watu wanaojihusisha na vitendo vya uhalifu wakiwemo majambazi.

  • Mahakama yatoa hati ya kukamatwa Meya K'ndoni

    Tuesday, May 3 2016, 0 : 0

     

    MAHAKAMA ya Hakimu Mkazi Kisutu, Dar es Salaam, jana imetoa hati ya kukamatwa Meya wa Manispaa ya Kinondoni, Boniface Jacob akidaiwa kutofika mahakamani.

    Meya Jacob anakabiliwa na shtaka la kumshambulia mwandishi wa Habari wa Gazeti la Uhuru, Christopher Lissa na kumsababishia maumivu makali.

    Kesi hiyo ililetwa mbele ya Hakimu Mkazi, Hellen Riwa kwa ajili ya kusikilizwa ambapo upande wa mashtaka ulikuwa na shahidi mmoja.

    Wakili wa Serikali Onolina Mushi, alidai mshtakiwa pamoja na wakili wake hawajafika mahakamani hivyo aliiomba mahakama itoe hati ya kukamatwa mshtakiwa na kupanga tarehe nyingine ya kuendelea kusikiliza shauri hilo.

    Hakimu Riwa alikubali maombi hayo likiwemo la kutoa hati ya kukamatwa Meya huyo. Kesi hiyo iliahirishwa hadi Mei 23, mwaka huu, kwa ajili ya usikilizwaji.

    Katika kesi hiyo, Jacob anadaiwa kutenda kosa hilo Septemba 11,2015 katika maeneo ya Kinondoni, kipindi hicho akiwa Diwani wa Kata ya Ubungo. Ilidaiwa mshtakiwa huyo alimpiga Lissa mateke na ngumi sehemu mbalimbali za mwili wake na kumsababishia maumivu makali.

    Shtaka la pili ilidaiwa mshtakiwa siku hiyo hiyo kwa makusudi na kinyume cha sheria, aliharibu kamera aina ya Nicon yenye thamani ya sh. milioni 8 mali ya Kampuni ya Uhuru Publication Limited.

  • RC Singida ambana DED arudishe pesa za SACCOS

    Tuesday, May 3 2016, 0 : 0

     

    MKUU wa Mkoa wa Singida, Mhandisi Mathew Mtigumwe, amemwagiza Mkurugenzi wa Manispaa ya Singida, Joseph Mchina kurudisha zaidi sh. milioni 143.1 za SACCOS ya Walimu na watumishi wengine zilizotumika kinyume cha malengo yake.

    Mhandisi Mtugumwe alitoa agizo hilo juzi wakati akiwahutubia wafanyakazi katika sherehe za Maadhimisho ya Siku ya Wafanyakazi Duniani ambazo kimkoa zilifanyika katika Uwanja wa Namfua mjini humo.

    "Pia ninamwagiza Mkurugenzi wa Halmashauri ya Iramba, kuwapa zawadi na fedha wafanyakazi bora wa mwaka 2015 ambao walipewa vyeti pekee tofauti na Wakuu wa Idara wanne ambao walipewa vyeti pamoja na fedha," alisema.

    Kuhusu Mabaraza ya Wafanyakazi, aliziagiza halmashauri zote mkoani humo kuyaunda na kuitishwa kwa mujibu wa sheria kwani ndipo mahali wanapoweza kukutana, kuzungumzia masuala ya haki, masilahi yao, kuhimiza maadili na utendaji bora wa kazi. Alisema Serikali ya Awamu ya Tano inawajali wafanyakazi wake ndiyo maana imepunguza kodi ya mishahara, kuwataka Wakurugenzi waache kufanya kazi kwa mazoea ili wasitumbuliwe majipu.

    Awali, Mwenyekiti wa Shirikisho la Vyama Huru vya Wafanyakazi (TUCTA), mkoani humo, Haran Jumbe, alizungumzia changamoto mbalimbali zinazowakabili wafanyakazi.

  • Makonda awasha moto watumishi hewa Dar

    Tuesday, May 3 2016, 0 : 0

     

    MKOA wa Dar es Salaam umebainika kuwa na watumishi hewa 209 ambapo, hali hiyo imefanya wakuu wote wa idara mkoani humo kula viapo vya kuchukuliwa hatua kama watabainika wengine kutoka katika idara wanazoziongoza.

    Mkuu wa mkoa huo, Paul Makonda aliyasema hayo jana katika kikao kilichoshirikisha wakuu wote wa wilaya, idara kutokana na taarifa za uongo kuwa mkoa huo una watumishi hewa 71 tu.

    Makonda alisema inashangaza kuona mkoa huo kuwa na watumishi hewa 71 hivyo aliamua kufanya uchunguzi na kubaini watumishi hewa wengine 209 ambao wameisababishia serikali hasara zaidi ya sh. bilioni 2.9 kutokana na fedha walizolipwa.

    "Ndio maana kila Mkuu wa Idara amekula kiapo cha kuandika na kusema ili tukiunda tume ya uchunguzi na kubaini watumishi hewa wengine wao wahusike moja kwa moja. Tulifanya uhakiki wa kwanza Temeke, walituambia watumishi hewa wapo 13 na mara ya pili wakasema wapo 51, mbaya zaidi tulipofanya uhakiki mara ya tatu tukabaini wapo 64," alisema.

    Aliongeza kuwa, ongezeko la wafanyakazi hewa katika wilaya hiyo linamfanya ajiulize maswali mengi yasiyo na majibu hivyo, hayupo tayari kuona jambo hilo likifanywa kwa kimzaha.

    Alisema kila Mkuu wa Idara aliomba kazi kwa hiari yake, wengine walitumia rushwa ili waweze kuipata; lakini kazi wanazofanya lazima wasimamiwe au kuandikiwa memo ndipo wawajibike wakati majukumu yao wanayajua.

    "Mkataba utaanza kutumika Jumatatu ijayo, kuanzia leo hadi wiki ijayo kila Mkuu wa Idara ahakikishe katika idara yake hakuna watumishi hewa, baada ya hapo ikiundwa Tume ya uchunguzi na kubaini watumishi hewa hawa wakuu watakuwa wanahusika," alisema.

    Makonda aliongeza kuwa, haiwezekani Rais Dkt. John Magufuli kila siku azungumzie uchafu na watumishi hewa kwa kuitaja Dar es Salaam wakati wahusika wapo jambo ambalo haliwezi kukubalika kwani kila mmoja anapaswa kuwahudumia wananchi katika nafasi yake.

    Katibu Tawala wa Mkoa huo, Theresia Mmbando alisema mkoa una watumishi 26,324 ambao kati ya hao, 166 ni wa Sektetarieti ya Mkoa, 26,158 Mamlaka ya Serikali za Mitaa, jiji lina wafanyakazi 254 na Manispaa ya Kinondoni 9,009, Ilala 8,710, Temeke 8,185.

    "Awali Kinondoni waligundulika watumishi hewa 34, tulipofanya uhakiki mara ya pili tuliwapata 55, hadi sasa wamefika 89, Ilala tuliwapata 21 lakini mara ya pili wamekuwa 35.

    "Baadhi ya watumishi inadaiwa wapo masomoni bila ruhusa, likizo bila malipo, walioazimwa, waliofariki hivyo jumla ni 209," alisema.

    Hata hivyo, baadhi ya wakuu wa idara walilamikia kitendo cha kusainishwa mikabata na kusema ni sawa na kuwatoa kafara kwani wengine wanasainiwa na wakubwa bila wao kujua chochote.

kimataifa

Rais Obama akataa kuivamia kijeshi Syria

Monday, April 25 2016, 0 : 0

 

 

RAIS wa Marekani, Barack Obama, amesema kuwa, itakuwa ni makosa makubwa kwa mataifa ya Magharibi kutuma majeshi yao hadi nchini Syria ili kumuondoa madarakani Rais wa Syria, Bashar al-Assad.

Akizungumza na BBC,Rais Obama alisema itakuwa ni makosa makubwa kuwatuma wanajeshi wa nchi kavu nchini Syria kumpindua Rais Assad kwa sababu hilo pekee halitasuluhusiha matatizo ya Syria.

Rais huyo wa Marekani alisema kuwa haina maana kwa makundi ya waasi kama vile Dola la Kiislam (IS)ndani ya Syria, kuendelea na makabiliano huku akisema kuwa jeshi la taifa hilo pekee lafaa kukomesha mapigano nchini humo.

Aliongeza kuwa ni muhimu kuendelea kushambulia ngome za IS ndani ya Syria kwa pamoja na kuzidisha juhudi za kumaliza mapigano ya wenyewe kwa wenyewe ya muda mrefu nchini humo.

Katika mahojiano hayo Rais Obama alisisitiza hitaji lake kuwa matatizo ya kimataifa yanahitaji uwajibikaji wa muda baada ya muda.

Obama alisema kuwa itakuwa vigumu kwa majeshi yake ama hata muungano unaongozwa na Marekani kuitokomeza kabisa IS katika kipindi cha miezi 9 ya uongozi wake.

Aidha Obama alisema mashambulizi yatalenga haswa kukatiza msururu wa wapiganaji wanaoenda ulaya na kusababisha maafa makubwa.

Ununuzi wa silaha waongezeka duniani

Wednesday, April 6 2016, 0 : 0

 

MATUMIZI ya ununuzi wa silaha duniani yamepanda kwa mara ya kwanza katika miaka minne wakati Marekani, China na Saudi Arabia zikitumia fedha nyingi zaidi juu ya suala hilo.

Kwa mujibu wa Shirika la Kimataifa la Utafiti wa Amani lenye makao yake Makuu mjini Stockholm nchini Sweden, ilisema kwamba inakadiriwa karibu euro trilioni 1.5, ama kiasi ya asilimia 2.3 ya pato la jumla la dunia, kilitumika kununulia silaha mwaka 2015. Juhudi za kulizuia kundi la wanamgambo wa Dola la Kiislamu (IS) na mzozo wa Ukraine ni sababu ambazo zimeongeza matumizi ya ununuzi wa silaha duniani.

Watafiti hao wanakadiria kwamba karibu asilimia 10 ya fedha zilizotumika zinaweza kuleta huduma kwa watu milioni 800 wanaoishi katika umaskini uliokithiri na wanaoteseka kwa njaa.

Mbali na mizozo hiyo lakini pia kuwepo kwa makundi yanayopigana na kutaka kujitenga katika maeneo mbalimbali duniani nayo yameongeza matumizi ya silaha duniani.

Moja ya sehemu zenye migogoro ya kivita ni pamoja na waasi wa Houth nchini Yemen ambao wamefanikiwa kuteka mji Mkuu wa nchi hiyo Sanaa na kuilazimisha Serikali inayotambuliwa kimataifa kuhamishia shughuli zake katika mji mwingine na kuendeleza mapigano ili kuudhibiti tena mji huo kwa kuungwa mkono na Saudi Arabia na washirika wake.

Mgogoro mwingine ni ule wa Iraq ambapo majeshi ya Muungano yanayoongozwa na Marekani yanaendelea kupambana vikali na kundi la IS huku Urusi na Iran ukiiunga mkono Serikali ya Syria na kisha kuwashambulia IS Sehemu nyingine ambapo matumizi makubwa ya silaha yanatumika ni nchini Libya ambapo mapigano yanaendelea baina ya makundi yanayotaka kudhibiti jiji la Tripoli.

  • Watu 12 wauawa kwa mabomu Iraq

    Monday, April 25 2016, 0 : 0

     

    WATU 12 wameuawa na wengine 39 kujeruhiwa katika mashambulizi mawili ya bomu katika mji Mkuu wa Iraq, Baghdad.

    Habari zinasema kuwa, shambulizi la kwanza lilifanyika karibu na kituo cha upekuzi katika eneo la Husseiniya kaskazini mwa mji huo na kuua watu tisa na kujeruhi wengine 28.

    Shambulizi la pili lililenga msafara wa magari ya kijeshi katika eneo la Arab Jabour, Kusini Mashariki mwa mji Mkuu wa Baghdad na kusababisha vifo vya watu watatu na wengine 11 kujeruhiwa.

    Hakuna kundi lolote lililotangaza kuhusika na milipuko hiyo ya mabomu ya kutegwa kwenye gari jana jioni,lakini hujuma kama hizo mara kwa mara zimekuwa zikifanywa na kundi la Dola la Kiislam (IS).

    Ijumaa iliyopita, watu wasiopungua tisa waliuawa na wengine zaidi ya 25 kujeruhiwa baada ya bomu kulipuka ndani ya msikiti mmoja katika eneo la Radwaniyah kusini magharibi mwa mji mkuu wa Iraq, Baghdad.

    Aidha siku ya Alkhamisi kulitokea milipuko mingine katika maeneo kadhaa ya mji wa Baghdad ambapo watu wanane waliuawa na wengine kadhaa kujeruhiwa.

    Idara ya Umoja wa Mataifa nchini Iraq ilisema Wairaqi 1,119 waliuawa kote nchini humo katika hujuma za kigaidi mwezi uliopita wa Machi pekee.

  • Korea ya Kaskazini yajaribu kombora la masafa marefu

    Monday, April 25 2016, 0 : 0

     

    KIONGOZI wa Korea ya Kaskazini, Kim Jong -Un, amesifu jaribio la kombora la masafa marefu lililorushwa kutokea kwenye nyambizi na kuongeza kuwa, ni mafanikio ya kufungua macho.

    Vyombo vya habari vya Serikali ya nchi hiyo vilimnukuu Kiongozi huyo akisema kwamba nchi yake inao uwezo wa kuzipiga Marekani na Korea ya Kusini wakati wowote itakapotaka.

    Marekani,ikiungwa mkono na Uingereza ilisema jaribio hilo lililofanywa hapo jana linakiuka maazimio ya Baraza la Usalama la Umoja wa Mataifa na imeitaka Korea ya Kaskazini kuepuka kuchukua hatua zaidi zinazoweza kuiyumbisha kanda yote.

    Hata hivyo Wizara ya Ulinzi ya Korea ya Kusini ilisema jaribio la Korea ya Kaskazini lililofanyika kwenye bahari ya Japan halikufanikiwa.

    Kwa mujibu wa Wizara hiyo kombora hilo lililofyatuliwa kutokea kwenye nyambizi liliruka umbali wa kilometa 30 tu.

  • Malema: Wapinzani wako tayari kumpindua Rais Zuma

    Monday, April 25 2016, 0 : 0

     

    KIONGOZI wa upinzani nchini Afrika Kusini, Julias Malema, ameonya kuwa, wapinzani wako tayari kuipindua serikali ya Rais Jacob Zuma wa nchi hiyo hata kwa mtutu wa bunduki.

    Katika mahojiano na kituo cha luninga cha al-Jazeera ya nchini Qatar,Malema ambaye pia Mkuu wa chama cha Economic Freedom Fighters alisema wao hawaogopi jeshi wala vita, na watapigana ikibidi hata kubeba silaha ili kuiangusha serikali iliyoko madarakani.

    Malema ambaye ni mkosoaji mkubwa wa serikali ya Rais Jacob Zuma alisema subira itawaishia na hawatakuwa na budi kuing'oa Serikali hata kwa mtutu wa bunduki.

    Wapinzani nchini Afrika Kusini walimtuhumu Rais Zuma kuwa ni Kiongozi fisadi mara baada ya Mahakama ya Katiba ya nchi hiyo kumpata na hatia ya kukiuka Katiba na kumuagiza kulipa sehemu ya fedha zilizotumiwa katika ukarabati wa nyumba yake binafsi katika eneo la Kwa Zulu Natal, mradi ambao uligharimu zaidi ya dola milioni 16 za Marekani.

    Hata hivyo Rais Zuma alinusurika kura ya kutokuwa na imani naye bungeni kufuatia kashfa hiyo.

  • Watoto wa Kipalestina 438 wafungwa Israel

    Monday, April 25 2016, 0 : 0

     

    IDADI ya watoto wadogo wa Kipalestina wanaozuiliwa kwenye magareza ya Israel imeongezeka kwa kiwango kikubwa tangu mwezi Oktoba mwaka uliopita na kufikia wafungwa watoto 438 akiwemo binti wa miaka 12.

    Gazeti la Haaretz limeripoti kuwa, idadi ya wafungwa wa Kipalestina ambao ni watoto wadogo katika jela hizo imeongezeka kutoka 170 mwezi Septemba mwaka uliopita wa 2015, hadi 438 mwezi Januari mwaka huu wa 2016.

    Takwimu za Shirika la Magereza la Israel zilionesha kuwa, idadi ya wafungwa Wapalestina wenye umri kati ya miaka 16-18 imeongezeka kutoka 143 hadi 324 katika kipindi hicho, huku walio na umri wa miaka 14-16 pia ikiongezeka kutoka 27 hadi 98.

    Aidha binti wa miaka 12 wa Kipalestina ndiye mfungwa mwenye umri mdogo zaidi katika magereza ya Israel.

    Mbali na wafungwa 7,000 wa Kipalestina, lakini pia Israel unawashikilia zaidi ya wafungwa 5,000 wa kigeni katika.

biashara na uchumi

NEEC, JKT wazindua mafunzo ya ujasiriamali

Wednesday, April 6 2016, 0 : 0

 

BARAZA la Taifa la Uwezeshaji Wananchi Kiuchumi (NEEC) kwa kushirikiana na Jeshi la Kujenga Taifa (JKT) limezindua mafunzo ya siku 12 ya kuwajengea uwezo wa elimu ya ujasiriamali wakufunzi wa jeshi hilo ili kutatua tatizo la ajira hapa nchini.

Akizungumza na waandishi wa habari baada ya hafla ya uzinduzi huo, Katibu Mtendaji wa baraza hilo, Bi. Beng'i Issa alisema mafunzo hayo yameandaliwa kwa kushirikiana na jeshi hilo ili nao waweze kuwa na ujuzi wa kuwafundisha vijana wanaojiunga na jeshi hilo katika masuala mbalimbali ya ujasiriamali.

"Ni mafunzo ya kuwapatia ujuzi wakufunzi hawa ili nao waweze kuwafundisha vijana wanaojiunga na mafunzo ya JKT," alisema na kuongeza kuwa nia ni kuwajenga vijana wahitimu wa jeshi hilo waweze kujiajiri na kuajiri wenzao wanaporudi vijijini na mijini.

Alisema hii ni kutokana na kukosekana kwa ajira za kutosha kuweza kuajiri vijana wote wanaofuzu jeshi kutokana na ukosefu wa elimu ya ujasiriamali, mitaji na elimu ya ushirika.

"Mafunzo haya yatawapatia elimu ya ushirika wa akiba na mikopo, elimu ya vikundi vya kifedha kama VICOBA ili watakaporudi uraiani waweze kujitegemea kwa kuweka akiba na kukopa," alisema.

Mafunzo hayo ya wakufunzi 53 yanayofanyika katika kambi ya Mgulani yanahusisha Mikoa ya Dar es Salaam, Lindi na Pwani.

Aliwahimiza vijana wanaohitimu masomo wajiunge na mafunzo ya JKT kwa wingi na huko watakutana na mafunzo hayo yanayolenga kuwajenga katika kujitegemea.

Mkurugenzi wa Ulinzi wa Amani, Chini ya Tawi la Mafunzo, Makao Makuu ya Jeshi, Brigedia Jenerali, Henry Kamunde alisema mafunzo hayo kwa wakufunzi wa jeshi yana maana kubwa kwa jeshi lao kwani yatasaidia kunoa vijana.

"Jeshi letu halina uwezo wa kuajiri vijana wote wanaopitia mafunzo ya kujitolea ya ukakamavu, uzalendo na utaifa...mafunzo haya yatawapa fursa kubwa," alisema.

Aliwataka wakufunzi hao kushiriki vyema mafunzo hayo ili wakatumike kuwafundisha vijana hao ili wawe chachu ya uchumi na uzalendo kwa taifa lao.

Naye Mkurugenzi wa Mafunzo ya Ufundi Stadi, JKT, Kanali Chacha Wanyancha alisema kanda itakayofuata itakuwa ya Kati na Magharibi itakayojumuisha Mikoa ya Dodoma, Kigoma, Tabora na Mwanza," alisema.

Mafunzo yatafanyika katika kambi ya Makutopora, Dodoma.

Mafunzo katika Kanda ya Kusni yatafanyika Mafinga ambapo mikoa itakayohusika itakuwa Ruvuma, Mbeya, Songwe, Rukwa, Iringa na Njombe.

Mafunzo katika Kanda ya Kaskazini yatafanyika katika kambi ya Mgambo mkoani Tanga na kuhusisha Mikoa ya Tanga, Arusha na Kilimanjaro.

Tangu kurejeshwa kwa utaratibu wa mafunzo ya vijana wa kujitolea mwaka 2001 idadi ya vijana wanaojiunga na JKT imeendelea kuongezeka kila mwaka.

Vijana waliopita JKT hadi mwaka 2014 ni 104,594. Kati ya idadi hii, vijana 34,291 waliingia kwa mpango wa kujitolea ambapo asilimia 70 waliajiriwa na vyombo mbalimbali vya ulinzi na usalama.

Asilimia 30 inayobaki, sawa na vijana 2,000 wanarudi nyumbani kila mwaka.

TRL kusafirisha saruji za Tanga Cement kupitia reli

Thursday, March 24 2016, 3 : 21

KAMPUNI ya Saruji Tanga inayozalisha saruji ya Simba jana imesaini Mkataba wa Makubaliano (MoU) na Shirika la Reli Tanzania (TRL).

 

Makubaliano haya yataiwezesha kampuni hiyo kutumia njia ya reli kusafirisha shehena ya saruji kwa wateja wake katika Mikoa ya Kigoma na Mwanza.

 

Mkataba huo ulitiwa saini na Mkurugenzi Mtendaji wa Tanga Cement Plc, Reinhardt Swart na Mkurugenzi Mkuu wa TRL, Masanja Kadogosa ambapo utawezesha utekelezaji wa mpango wa kusafirisha zaidi ya tani 35,000 za saruji kwa mwezi   ujazo ambao ni sawa na theluthi ya tani 105,000 zinazozalishwa na kiwanda hicho kwa mwezi.

 

Hafla fupi ya kusaini mkataba huo pamoja na uzinduzi wa treni ya kwanza inayosafirisha shehena hiyo ya saruji ilihudhuriwa na Waziri wa Ujenzi, Uchukuzi na Mawasiliano, Profesa Makame Mbarawa mjini Tanga.

 

Akizungumza katika hafla hiyo, Swart alisema makubaliano hayo yataiwezesha kampuni yake kuongeza ufanisi, ushindani katika soko na kupunguza gharama za usafirishaji.

 

"Kama wazalishaji wa ndani, ni muhimu sana kuwa na mpango madhubiti wa usambazaji bidhaa ili kuongeza tija katika uendeshaji wa biashara. Matumizi ya reli yanazingatiwa duniani kote kama njia stahiki ya usafirishaji yenye gharama nafuu na yenye athari ndogo kwa mazingira ukilinganisha na matumizi ya usafiri wa barabara. Tanga Cement imejipanga kutumia mtandao wa reli wa TRL kuongeza ufanisi katika usambazaji wa bidhaa zetu kwa wateja," alisema.

 

Akifafanua mkataba huo, Kadogosa alibainisha kuwa TRL imetenga vichwa vitano vya treni na kimoja cha shanta maalum kwa ajili ya kuhudumia kampuni ya Tanga Cement kikamilifu.

 

"Tunatarajia kusafirisha shehena ya zaidi ya tani 20,000 za saruji kwa mwezi kutoka Pongwe kuelekea Kigoma na tani 15,000 kutoka Pongwe hadi Mwanza.

 

"Tunayo furaha kubwa kutoa suluhisho madhubuti la usafirishaji wa mizigo mikubwa na mizito, jambo litakalowanufaisha wateja wa simenti na jamii ya Watanzania kwa ujumla," alieleza.

 

Alisema kuwa, Tanga Cement itawajibika kulipia gharama za usafirishaji mapema jambo litakalopelekea Shirika la Reli kupokea pesa za uendeshaji kwa wakati.

 

Mapema mwezi huu, Mkurugenzi huyo wa TRL alinukuliwa akisema kuwa katika kipindi cha mwaka 2014-15, TCPLC ilisafirisha tani 44,000 za saruji ambapo kwa kipindi kati ya Julai na Desemba 2015 jumla ya tani 24,960 zilisafirishwa kwa njia ya reli.

 

Mkataba huo unakuja wiki chache baada ya Waziri wa Ujenzi, Uchukuzi na Mawasiliano, Prof.Makame Mbarawa kubainisha kuwa serikali ilikuwa katika hatua za mwisho za mazungumzo na kiwanda cha saruji Tanga kutumia njia ya reli ya Usambara kusafirisha shehena za mizigo yake, katika hatua iliyolenga kurudisha uhai wa njia ya reli na kuondoa uharibifu wa barabara.

"

  • DC aagiza kila kaya ilime hekari mbili

    Tuesday, May 3 2016, 0 : 0

     

    MKUU wa Wilaya ya Bunda, Joshua Mirumbe, ametaka madiwani na maofisa watendaji wa kata na vijiji kuhakikisha kuwa, kila kaya inalima hekari zisizopungua mbili ikiwa ni hatua ya kupambana na upungufu wa chakula wilayani humo, vinginevyo serikali itachukua hatua dhidi ya wasiotekeleza agizo hilo.

    Agizo hilo alilitoa hivi karibuni kwa madiwani na watendaji kutokana na wilaya hiyo kupata njaa kila mwaka hali aliyodai si aibu tu lakini pia husababisha utapiamlo kwa watoto wadogo. Mirumbe alisema tayari serikali wilayani Bunda imeandaa mkakati wa kukabiliana na hali hiyo na kwamba hivi inagawa mbegu za nafaka na Mihogo ambayo inastahimili ukame na kuvumia magonjwa.

    "Tunaagiza katika msimu huu wa mvua kila kaya ihakikishe inakuwa na shamba ekari mbili na zaidi bila kujali wewe ni mtumishi wa serikali au mkulima..serikali tunagawa mbegu za mihogo ambazo tumeagiza kutoka mkoani Kigoma na katika Jeshi la Kujenga Taifa (JKT) Rwamkoma," alisema Mirumbe.

    "Wale wanaopenda kuzurura bila kazi waende shambani wakalime ili wapate chakula, lakini pia wapo watumishi wa serikali wanaodai wao wananunua chakula na hawana mashamba ni vema watafute mashamba walime kwa sababu wao ndio watakuwa mfano kwa wakulima wa kawaida," alisisitiza Mirumbe.

    Katika Sikukuu ya Muungano ambayo huadhimishwa kila ifikapo, Aprili 26 kila mwaka, Mkuu wa Mkoa wa Mara, Magesa Mulongo alichukua baadhi ya watendaji wa serikali, wakiwemo wakuu wa wilaya, wakurugenzi, makatibu tawala na wakuu wa idara za serikali kutembelea shamba la mbunge wa Jimbo la Musoma mjini Vedastus Mathayo ili kujifunza namna ya kulima kilimo bora.

    Wakiwa shambani hapo, Mulongo aliwataka watumishi hao kuiga mfano huo katika mashamba yao ili uwe mfano kwa wananchi ambapo aliagiza watendaji hao kuhakikisha kuwa wananchi mkoani Mara wanaondokana na upungufu wa chakula.

  • Kampuni yatoa tiketi za bure

    Wednesday, April 6 2016, 0 : 0

     

    JUMLA ya washindi 12 wamepewa tiketi za bure za safari ya ndege katika shindano lililodhaminiwa na Fastjet Tanzania.

    Tiketi hizo ambazo zitawawezesha kusafiri katika ndege ya gharama nafuu ndani na nje ya nchi ambako Fastjet husafiri, ni sehemu ya zawadi zilizotolewa na Kampuni ya Fastjet wakati wa msimu wa sherehe za Sikukuu ya Pasaka iliyomalizika wiki iliyopita.

    Akizungumza wakati wa sherehe ya kutoa zawadi hizo hivi karibuni jijini Dar es Salaam, Afisa Uhusiano na Masoko wa Fastjet, Lucy Mbogoro alisema kuwa Kampuni ya Fastjet limechukua hatua ya kudhamini wateja wake kwa kuwapa zawadi hizo za tiketi za bure ikiwa ni sehemu ya majukumu yake ya kurudisha shukrani kwa wateja wake ambao wamekuwa watiifu kwa shirika hilo.

    "Katika kipindi cha miaka mitatu iliyopita, Kampuni ya Fastjet imekuwa ikitoa huduma bora za safari ya anga ambazo ni salama, zenye uhakika na kuaminika kwa wateja wake ambao hadi sasa wamefikia abiria milioni 1.8," alisema Mbogoro.

    Aliongeza na kusema kuwa, 'tuna imani kubwa na wateja wetu kwa ushirikiano wao waliouonyesha pamoja na sisi katika kipindi hicho chote na kutokana na hali hiyo, Fastjet imeamua kutoa zawadi ya tiketi za bure kwa baadhi yao ili wasafiri kwenda kokote kule ndani na nje ya nchi", Mbogoro aliongeza.

    Alisema kuwa tiketi hizo zitawawezesha washindi wao kusafiri na wenzi wao ili kufurahia msimu huu wa Sikukuuu ya Pasaka na wapendwa wao wakiwemo marafiki na jamaa zao.

    Aliongeza kuwa, washindi hao walichaguliwa baada ya kutoa majibu sahihi wakati wa maswali yaliyofanyika kwa njia ya mahojiano ya vyombo vya habari nchini.

    "Washiriki katika shindano hili walikuwa wengi mno, na kati yao 12 pekee ndio waliofaulu na jopo la majaji kuwachagua kama washindi," Mbogoro alifafanua.

    Katika mahojiano, mmoja wa washindi wa zawadi hii, Ally Sangawe, alisema: "Naishukuru Fastjet kwa kuandaa shindano hili kwa kuwa sasa nitaweza kusafiri kwa kutumia tiketi hii ya bure na kufurahia wikiendi njema na mpenzi wangu. Hii ni fursa ya kipekee na ambayo ni muhimu kwangu."

    Karim Lungu, ambaye pia ni miongoni mwa washindi, alitoa rai ya furaha kwa waandaaji wa shindano hilo na kusema kuwa," sasa kwa kuwa nilikuwa na hamu ya kusafiri kwenda Mwanza ambapo hapo awali sikuwa na uwezo wa kukata tiketi, na sasa nashukuru kupata tiketi ya bure ambayo sasa imeniwezesha kutimiza ndoto yangu ya kufika huko".

    Mbali na kusafiri ndani ya nchi kila siku katika miji ya Dar es Salaam, Mwanza, Kilimanjaro, Mbeya na Zanzibar, Mbogoro alisema kuwa Fastjet husafiri na kutua katika mji wa Johannesburg- Afrika ya Kusini, na pia kampuni ilizindua safari ya moja kwa moja kwenda Nairobi-Kenya na sasa imeongeza maradufu safari za kila siku, kutoka mara moja kwa wiki na kwenda mara mbili kwa wiki ndani ya miji hii miwili iliyo mikubwa katika Ukanda wa Afrika Mashariki.

  • TRA Kilimanjaro yavuka malengo

    Wednesday, April 6 2016, 0 : 0

     

    MAMLAKA ya Mapato nchini (TRA) Mkoa wa Kilimanjaro imekusanya zaidi ya sh.bil. 36.8,katika kipindi cha mwezi Januari hadi Machi mwaka huu na kuvuka malengo iliyokuwa imejiwekea ya kukusanya sh. bil. 36.2.

    Hayo yalibainishwa jana na Meneja wa TRA Mkoa wa Kilimanjaro, Abdul Mapembe, wakati akizungumza na gazeti hili ofisini kwake, ambapo alisema, katika kipindi cha Robo ya Tatu ya Januari hadi Machi mwaka huu, waliwekewa malengo ya kukusanya sh. bil. 36,215,530,000, lakini wao wamekusanya bil.36,897,690,732 sawa na asilimia 102.

    Mapembe alieleza kuwa katika malengo waliyokuwa wamejiwekea, kodi za ndani walitakiwa kukusanya Sh. bil. 15.6,lakini walikusanya zaidi ya Sh.bil. 18.9 huku Idara ya Forodha na Ushuru wa bidaa wakikusanya Sh. bil. 17.9 kati ya sh.bil. 20.5 ambazo walitakiwa kukusanya.

    "Katika kipindi cha Robo ya Tatu yaani Januari hadi Machi mwaka huu, tuliweza kuvuka lengo la ukusanyaji, ambalo tulipewa na kufikia bil. 36.8, sawa na asilimia 102, haya ni mafanikio na bado tunaendelea na jitihada ili kuhakikisha wale wote ambao wanapaswa kulipa kodi wanafanya hivyo bila shuruti," alisema Mapembe.

    Mapembe alisema,licha ya Idara ya Forodha kuonekana kushindwa kufikia lengo, Mapato yamekuwa yakiongezeka kila mwezi ambapo mwaka jana 2015 February walikusanya Sh.Bil. tatu na mwaka huu Februari bil. 5.8 huku mwezi Machi yakiongezeka kutoka Sh. bil. 4.5 walizokusanya mwaka jana na kufikia Sh. bil.6 mwaka huu.

    Aidha, alisema toka kuanza kwa mwaka wa fedha 2015/16 mapato yamekuwa yakiongezeka ambapo katika Robo ya kwanza iliyoanza Julai hadi Septemba mwaka 2015, waliweza kukusanya asilimia 89.7 ya lengo walilokuwa wamejiwekea, Robo ya Pili ambayo ilianza Oktoba hadi Desemba asilimia 96 huku Robo ya tatu wakikusanya asilimia 102.

  • Exim yaboresha huduma utumaji pesa kimataifa

    Thursday, March 24 2016, 0 : 0

     

    BENKI ya Exim Tanzania imeboresha huduma yake ya utumaji na upokeaji wa pesa kimataifa kwa kuharakisha ukamilishaji wa miamala hiyo ambapo kwa sasa wateja wake watatumia saa nne badala ya muda wa   saa 12 uliokuwa ukitumika hapo awali.

     

    "Exim tumekuwa tukipambana kila siku kuhakikisha tunatoa huduma bora, za haraka na kwa usalama zaidi ili kuwaunganisha wateja wetu na fursa za kimataifa.Kwenye hili tunatoa hakikisho kwa wateja wetu kwamba iwapo kutatokea ucheleweshaji zaidi ya muda wa masaa manne basi tutalazimika kuwarejeshea gharama zao walizolipa kwa ajili ya huduma," alisema Bw.Tumaini Mwakafwaga ambaye ni mkuu wa kitengo cha operesheni za benki hiyo jijini Dar es Salaam jana.

     

    Hata hivyo alibainisha kuwa hakikisho hilo la muda wa saa nne litahusu wateja wenye maombi (miamala) yasiyokuwa na utata, wenye nyaraka onyeshi (supporting documents) pamoja na wale wenye kiasi cha kutosha kwenye akaunti zao.

     

    "Lakini pia kuna mazingira ambayo yanaweza kufanya tukashindwa kumrejeshea mteja gharama zake (refund) ikiwemo pale ambapo mfumo wetu wa kuendesha miamala utakuwa umekwama kutokana na sababu zilizo nje ya uwezo wetu yakiwemo majanga ya asili," aliongeza Mwakafwaga.

     

    Alisema watumiaji wa huduma hiyo watakuwa wakipokea taarifa kuhusu mwenendo mzima wa miamala yao kwa kuwa itakuwa ikifuatiliwa kwa ukaribu kila hatua inayopitia.

     

    "Kiukweli timu yetu inayohusika na kuchakata (processing) miamala hii inauelewa wa kutosha pamoja na uwezo mkubwa wa kutimiza majukumu yao kwa haraka kuanzia muda ambao mteja anaanza kutumia huduma hii hadi hatua ya mwisho. Mameneja na wasaidizi wao wapo tayari kuhakikisha kila kitu kinaenda kwa wakati na kwa usahihi," alisisitiza.

michezo na burudani

Azam watinga fainali FA kwa 'Matuta'

Monday, April 25 2016, 0 : 0

 

TIMU ya Azam imefanikiwa kuingia katika hatua ya fainali ya michuano ya Kombe la FA baada ya kushinda mchezo wake dhidi ya timu ya Mwadui FC kwa mikwaju ya penati 5-3 baada ya kumalizika kwa mchezo huo kwa sare ya mabao 2-2.

Katika mchezo huo uliopigwa jana katika uwanja wa Mwadui, Azam walikuwa wa kwanza kupata bao katika dakika ya 5 ya mchezo kupitia kwa Khamis Mcha na kuwafanya Mwadui kucheza kwa nguvu katika kutafuta bao la kusawazisha.

Timu zote zilicheza kwa nguvu katika kipindi cha kwanza ambapo zote zilikosa nafasi nyingi za wazi lakini Mwadui walipaswa kujilaumu wenyewe kwa kushindwa kupachika mabao katika kipindi hicho kwani waliweza kutengeneza nafasi nyingi za mabao lakini washambiliaji wake wakiongozwa na Kelvin Sabato walishindwa kuzitumia vizuri nafasi walizopata.

Mchezo huo ulikwenda katika mapumziko Azam wakiwa mbele kwa bao hilo moja ambapo kipindi cha pili kilianza kwa nguvu ambapo katika kujiongezea makali, zote zilifanya mabadiliko kadhaa ambapo Azam aliingia Allan wanga na Frank Domayo kuchukua nafasi za Salumu Abubakr na Khamis Mcha.

Kwa upande wao Mwadui mchezaji Tegete aliingia kuchukua nafasi ya Matogoro na kuongeza nguvu katika safu ya ushambuliaji ambapo mabadi l iko hayo yaliwanufaisha ambapo katika dakika ya 82 mchezaji Hassan Kabunda aliisawazishia Mwadui kwa shuti kali ndani ya eneo la hatari na kuifanya mechi hiyo kumalizika kwa sare ya bao 1-1 na kuongezwa dakika 30 kwani ilikuwa lazima mshindi apatikane.

Katika dakika za awali za nyongeza Azam walifanikiwa kuongeza bao la pili kupitia kwa Mcha na huku Azam wakiamini kuwa wameshinda mchezo huo, Mwadui walisawazisha katika dakika za majeruhi za kipindi cha dakika 15 za mwisho na kuifanya 'game' hiyo kumalizika dakika 120 timu hizo zikitoshana nguvu ya mabao 2-2.

Katika hatua hiyo timu hizo ziliingia katika changamoto ya mikwaju ya penati ambapo Azam walifanikiwa kupata penati zote 5 huku Mwadui wakikosa moja na kutolewa katika michuano hiyo.

Shujaa wa Azam FC alikuwa ni beki Aggrey Morris, aliyefunga penalti ya tano na kuamsha shangwe kwa wachezaji wenzake.Wengine waliofunga penalti za Azam FC ni Nahodha John Bocco, Himid Mao, Allan Wanga na Waziri Salum wakati tatu za Mwadui zilifungwa na Malika Ndeule, Iddi Moby na Jabir Aziz. Aliyekosa upande wa Mwadui ni Kevin Sabato.

Wakati huo huo mchezo mwingine wa nusu fainali wa Kombe la Shirikisho la Soka Tanzania (TFF), maarufu kama Kombe la Azam Sports Federation Cup kati ya wenyeji, Coastal Union na Yanga na Dar e Salaam umevunjika baada ya dakika 110.

Mchezo huo ulivunjika wakati Yanga ikiwa mbele kwa mabao 2-1 Uwanja wa Mkwakwani, Tanga kufuatia mshika kibendera namba mbili kupasuliwa juu ya jicho la kushoto kwa jiwe lililotupwa na shabiki.

Coastal Union ilitangulia kwa bao la kiungo Mcameroon, Youssouf Sabo kabla ya Yanga kusawaziha kupitia kwa mshambuliaji Mzimbabwe, Donald Ngoma, mabao yote kipindi chahezo huo pili.

Mshambuliaji Mrundi, Amissi Tambwe akaifungia Yanga bao la pili mwanzoni tu mwa dakika 30 za nyongeza baada ya dakika 90 kumalizika timu hizo zikiwa zimefungana bao 1-1.

Kaimu Mkurugenzi wa Mashindano wa Shirikisho la Mpira wa Miguu Tanzania (TFF) Jemedali Saidi alisema hatima ya mchezo huo utasubiri taarifa za uwanjani kutoka kwa mwamuzi wa mchezo Abdallah Kambuzi na Kamisaa wa mchezo huo ambapo watakaa kikao kujadili na kwamba mazingira ya kuvunjika mchezo huo kanuni zake zipo hivyo mashabiki wasubiri kikao hicho.

Alisema kuvunjika kwa mchezo huo kumesababishwa na sababu za kibinadamu ambapo kanuni zake zipo ana kwamba ingekuwa sababu ya kuvunjika kwake kupo nje ya uwezo wa kibinadamu pia kanuni zake zipo na katika hilo wangeweza hata kutoa maamuzi siku ile ile pale uwanjani lakini uhalisia wa kuvunjika kwa mchezo huo kutahitaji majadiliano katika vikao husika.

Al Ahly masharti kibao

Wednesday, April 6 2016, 0 : 0

 

WAPINZANI wa Yanga katika 16 Bora ya Ligi ya Mabingwa Afrika, Al Ahly wametua Dar es Salaam kimyakimya, huku wakitoa masharti kibao juu ya uwanja wa kufanyia mazoezi.

Al Ahly waliondoka Cairo jana jioni kuja Dar es Salaam, wametoa sharti kwa Yanga iwatafutie uwanja wa kufanyia mazoezi usio wa nyasi bandia na si zaidi ya hapo.

Sharti hilo lilitolewa na Mkurugenzi wa Ufundi wa Al Ahly, Sayed Abdel Hafeez ambaye tangu Jumatatu yupo tayari Dar es Salaam kuweka sawa kila kitu kabla ya ujio wa timu hiyo.

Hafeez alikaririwa jana na mtandao wa Al Ahly akisema, amekagua Uwanja wa Taifa na kutazama mazingira yote ya uwanja huo na kutaka timu ifanyie mazoezi yake yote katika uwanja huo kabla ya mchezo.

Yanga na Al Ahly zinatarajiwa kuvaana Jumamosi katika mchezo huo muhimu na kwa sheria timu ngeni inatakiwa kufanya mazoezi katika uwanja utakaotumika kwa mechi siku moja kabla ya mchezo, tena kwa muda uleule pambano hilo litakapofanyika ili kuzoea hali ya hewa.

"Nimezungumza na watu wa ubalozi wetu uliopo Dar es Salaam ili kuwaambia Yanga watupe nafasi ya kufanya mazoezi zaidi katika uwanja huo," alisema.

Pia Al Ahly kabla ya kuondoka ilifanya kikao kizito na kumpa jukumu la kuongoza msafara huo mkongwe wa fitina, Abdel-Aziz Abdel-Shafi

Zizzouí ili kuhakikisha wanashinda mchezo huo.

Uamuzi huo ulifanywa na Mwenyekiti wa Bodi ya Al Ahly, Injinia Mahmoud Taher aliyesema Abdul-Aziz Abdul- Shafi ni mtu sahihi kuongoza mapambano.

Sayeed Abdul Hafeez ambaye ni Mkurugenzi wa Ufundi wa Al Ahly kwa muda wa wiki mbili sasa amekuwa akitamba katika mtandao wa klabu hiyo, juu ya kile anachokifanya kuhakikisha anaichapa Yanga.

Jana alikaririwa na mtandao wa klabu hiyo pia kukagua hospitali zote muhimu zinazoweza kutibu wachezaji wa kikosi hicho pale watakapopata tatizo.

ìTunataka wachezaji wetu na benchi zima la ufundi liwe katika ubora wake, bila kuhofu juu ya huduma za matibabu,î alisema.

Alidai akiwa hapa nchini anashirikiana kwa karibu zaidi na Naibu Balozi wa Misri nchini Tanzania, Ahmed Abdul Rahim katika mapokezi ya kikosi chao.

"Kila kitu kinachohusu mchezo huo kuanzia usafiri, chakula na malazi kitasimamiwa na ubalozi wetu uliopo Dar es Salaam.

Atakayehusika moja kwa moja ni naibu balozi, huyu ndiye aliye na majukumu yote ya Al Ahly pale itakapofika Tanzania," alisisitiza Hafeez.

Hafeez ndiye aliyepigana kuhakikisha anapata mkanda wa video wa mchezo kati ya APR na Yanga uliopigwa Uwanja wa Amahoro, Kigali. Yanga ilishinda 2-1.

Hafeez alikiri, ubalozi wa Misri nchini Rwanda ulifanya kazi kubwa ya kuhakikisha wanapata mkanda huo, huku Waziri wa Mambo ya Nje wa Misri, Kansela Ibrahim Hamza, akihusika kwa kiasi kikubwa.

Mbali na kukiri kupata mkanda huo, pia bosi huyo amedai hata ubalozi wa Misri nchini Tanzania nao umepigana na kupata kanda za michezo mitatu ya Yanga iliyochezwa karibuni.

"Ubalozi wetu uliopo Tanzania nao umepata mikanda ya mechi tatu za Yanga iliyocheza karibuni."

Naye straika, Ahmed Fathi amekiri kuifahamu vizuri Yanga huku akisema, atahakikisha anapigana kwa nguvu zote kuondoka na ushindi.

Naijua Yanga kwani ni timu yenye mashabiki wengi, lakini hilo halituzuii kuifunga, tunatakiwa kusonga mbele," alisema. kuondoka na ushindi.

Wachezaji hao ni Sherif Ekramy, Ahmed Adel, Abdel Moneim, Massad Awad, Ahmed Fathi, Mohamed Hani, Saad Eddin Samir, Ramy Rabia, Ahmed Hijazi, Hossam Ghaly, Hossam Ashour, Amr Alsolah, Ahmed Sheikh, Walid Soliman, Ramadan Sobhi, Abdullah Saied, Malick Evouna, Amr Gamal, John Antwi na Emad Moteab.

  • Mkongwe Papa Wemba afariki dunia

    Monday, April 25 2016, 0 : 0

     

    MWANAMUZIKI mkongwe wa Jamhuri ya Kidemokrasi ya Kongo, Papa Wemba amefariki.Muimbaji huyo maarufu amefariki akiwa Abidjan, Ivory Coast baada ya kuanguka Jana.

    Papa Wemba alikuwa yupo nchini humo kutumbuiza kwenye tamasha la muziki la Anoumabo (FEMUA).Redio ya Kongo, Radio Okapi imetangaza taarifa za kifo chake.

    Wemba amefariki akiwa na umri wa miaka 66. ambapo asubuhi ya Jumapili April 24 2016 ndio zimeanza kusambaa taarifa za kifo cha mwimbaji Mkongwe kutoka Congo DRC aitwae Papa Wemba ambaye imeripotiwa amefariki baada ya kuanguka jukwaani akiwa anatumbuiza huko Ivory Coast.

    Taarifa za kifo zimeendelea kuwafikia watu mbalimbali akiwemo mwimbaji mkongwe wa Congo DRC Koffi Olomide ambaye ameandika maneno machache kwenye ukurasa wake wa Instagram akisema "kwaheri Kaka, asante" na kuambatanisha picha yao ya pamoja ya siku nyingi kwenye hayo maneno.

    Papa Wemba ni mmoja wa wanamuziki waliochangia kukua kwa muziki wa Afrika na pia wanamuziki wengi wakubwa wamepita mikononi mwake.

    Mpaka mauti yanamkuta, video ya tukio inaonyesha alianguka ghafla wakati wacheza shoo wake wakiwa mbele ya jukwaa na waliendelea kucheza kwa hatua kadhaa kabla ya kusitisha na kwenda kumuangalia akiwa chini.

    Inaelezwa kuwa tukio la kuanguka lilitokea mara baada ya Papa Wemba kuimba wimbo wake wa tatu jukwaani hapo.

    Kituo cha redio cha Okapi cha DR Congo kilitangaza juu ya kifo hicho lakini sababu hasa haijatajwa.

    Marehemu ambaye jina lake halisi ni Jules Shungu Wembadio Pene Kikumba alikuwa akitumbuiza kwenye Tamasha la 'Urban Music Festival'

  • Simba wa Tunduma 'Ukata unatushusha kiwango'

    Monday, April 25 2016, 0 : 0

     

    MMOJA wa mabondia nchini Simba wa Tunduma amesema kuwa wingi wa mapambano wanayoyapata katika masumbwi nchini kwa kipindi cha mwaka mmoja yanawafanya mabondia kutokuwa na muda wa kupumzika.

    Akizungumza na gazeti la Majira jana Simba wa Tunduma alisema kuwa hali ya mabondia kupata mapambano zaidi ya mawili katika kipindi cha mwaka mmoja inatokana na bondia kutaka pesa lakini bondia huhiitaji mapumziko katika kulinda kiwango.

    "Kutokana na hali ya mabondia wengi kuwa na ukata, hulazimika kutaka mapambano katika kutaka pesa hivyo hupigana zaidi ya mara mbili kwa mwaka na kushindwa kupumzika lakini vinginevyo hali ingekuwa nzuri wangepumzikana kulinda viwango vyao ," alisema.

    Simba wa Tunduma alisema kuwa katika tasinia hiyo mabondia wamekuwa wakipata mapambano ambayo yanaonekana kuwa si sahihi katika muonekano wa masumbwi.

    Bondia huyo alisema hali ipo tofauti sana na mabondia wengi wa nchi zilizoendelea kwani mabondia wa nchi hizo wanaonekana kuwa na mapambano mawili kwa mwaka na kila pambano huwa bondia anajiandaa kwa muda mrefu ili kujiweka fiti .

  • Waziri Mkuu alitaka Tamasha la Pasaka Kusini

    Monday, April 25 2016, 0 : 0

     

     

    WAZIRI Mkuu wa Jamhuri ya Muungano wa Tanzania Kassim Majaliwa, amemuomba Mwenyekiti wa Kamati ya Maandalizi ya Tamasha la Pasaka Alex Msama, kupeleka huduma hiyo katika mikoa ya Kusini kwa sababu wanakosa huduma ya neno la Mungu.

    Kampuni ya Msama huandaa Tamasha la Krismasi linalotarajia kufanyika Desemba mwaka huu na Pasaka linalotarajia kufanyika mwakani hapa nchini.

    Majaliwa alisema kwa sasa tamasha hilo limekuwa na nguvu kubwa ya kuhakikisha inahamasisha jamii katika mambo mbalimbali hivyo ni wakati wa mikoa ya kusini kufaidika.

    Alisema kuwa serikali yake imejipanga kuhakikisha kuwa kila Mtanzania ana haki ya kuona serikali yake inawajali na kuwapenda hivyo taasisi kama Msama Promotions, sasa inahitaji kujitanua na kufika mikoa mingi ya Tanzania.

    Waziri Mkuu alisema kuwa amekuwa akifuatilia namna Tamasha la Pasaka linavyojitahidi katika kuelimisha na kupiga vita unyanyasaji wa kijinsia hasa wajane na yatima hivyo na mikoa kama Lindi na Mtwara nayo inahitaji huduma hiyo.

    “Nimefarijika sana na namna kampuni ya Msama Promotions chini ya Mkurugenzi wake, Alex Msama namna inavyofanyakazi zake katika kutoa burudani na kuelimisha jamii kwa maana hivyo ningependa kuwaunga mkono katika hilo,” alisema Majaliwa.

    Alisema mikoa mingi ikiwamo Lindi na Mtwara nayo inachangamoto nyingi hivyo wanahitaji ujumbe kama unatolewa katika Tamasha la Pasaka kuhakikisha kila kitu kinakwenda sawa.

    “Kutoa misaada kwa yatima sio kitu kidogo lakini kubwa ni namna kampuni ya Msama Promotions chini ya Mkurugenzi wake Alex Msama, inavyofanyakazi zake kwa kufuata sheria katika hili nawapongeza lakini kubwa ni kukumbuka mikoa ya Kusini nayo inahitaji huduma hiyo.

    Alisema kuwa kuna waimbaji wengi wakubwa ambao kwa sasa wamekuwa wakifanya kazi kwa ushirikiano na Msama lakini bado hawajawahi kufika katika mikoa ya kusini hivyo ni wakati wake kuhakikisha nao wananufaika na tamasha hilo.

    Majaliwa amemtaka Msama kuendelea na huduma hiyo kwani serikali iko tayari kutoa msaada wa hali na mali.

    Aidha Mkurugenzi wa Msama Promotions Alex Msama amemshukuru Waziri Mkuu Majaliwa na kusema kuwa atajitahidi kuboresha na kuhakikisha wananchi wote wa Tanzania wananufaika na huduma hiyo.

    Msama amesema kuwa amesikia kilio cha Waziri Mkuu nakusema kuwa kamati yake iko makini na inajipanga kuhakikisha ombi hilo linafanyiwa kazi.

  • Karate sasa kuwa wa Kimataifa

    Monday, April 25 2016, 0 : 0

     

    TANZANIA itatoa wachezaji bora wa mchezo wa Karate wenye ushindani kimataifa baada ya kupata mbinu za kiushindani kutoka kwa mkufunzi wa kimataifa raia wa Oman, Farid Shuheibi.

    Tanzania haijapata nafasi ya kufuzu michezo wa kimataifa kama Olimpiki na Jumuia ya Madola tangu kuanzishwa kwa mchezo huo kutokana na wachezaji kukosa vigezo vya kufuzu michuano hiyo.

    Akizungumza Dar es Salaam juzi wakati wa mafunzo ya kimataifa ya mchezo huo, mkufunzi huyo alisema, moja ya sababu kwa nchi za Afrika Mashariki kutogfunzu mcherzo huo ni kukosa mbinu za kiushindani.

    "Zipo mbinu tatu ambazo ukifanikiwa kuzijua ni lazima utafuzu mtihani wa kupata viwango vya kucheza kimataigfa, mbinu hizi mara nyingi wakufunzi hasa kutoka Japani hawazitoi kwa nchi hizi za Afrika, hupenda kuonekana wao kuwa juu kuliko nchi nyingine,"alisema Shuheibi.

    Alisema zipo mbinu ambazo yeye atazitoa kwa wanafunzi wake katika mafunzo hayo ya siku tatu na kwamba baada ya mafunzo hayo atatoa mtihani kabla ya kutangazwa kwa wanafunzio waliofuzu mbinu hizo.

    Akizungumzia programu ya mkufunzi huyo Sensei Yahaya Mgeni alisema mafunzo hayo yatatoa mwanga kwa Tanzania mabayo haijashioriki michuano ya kimataifa kwa muda mrefu.

    "Mara ya mwisho tuilicheza michuano ya Afrika Mashariki na kati mwaka 2011 tangu hapo hakuna mashindano yoyote makubwa tuliocheza zaidi ya sisi wenyewe kwa wenyewe,"alisema Mgeni.

    Mikoa iliyojitokeza kushiriki mafunzo hayo ni Dar es Salaam, Pwani, Morogoro, Dodoma, Iringa, Mbeya, Moshi, Arusha na Singida.

    Wakati huo huo kocha wa mchezo huo kutoka klabu ya Serengeti,amewaomba wasichana kujitokeza kwa wingi kujiunga na mchezo huo ili kuunda timu ya taifa ya wanawake ya mchezo huo.

    Alisema asilimia kubwa ya vijana wanaojifunza nio wa kiume hivyo kukopsa fursa ya kuundwa kwa timu ya taifa ya wanawake ambayo ingeweza kushiriki michuano mbalimbali ndani na nje ya nchi

    "Wasichana hatuna fursa ya kuwa na timu ya taifa ya wanawake kutokana na uhaba wa wachezaji wa kike, natamani sana kuwepo na timu ya taifa ya wanawake ya karate lakini ni ngumu kiutokana na wengi wa wasichana kuwa waoga na mchezo huu,"alisema Levina.