baadhi ya wananchi wakivuka mto malagarasi upande wa burundi kuingia tanzania hivi karibuni.
ofisa usimamizi shirikishi wa msitu wa shirika lisilo la kiserikali la farm africa, ernest rumisho akipanda mti kuadhimisha wiki ya upandaji miti.

kitaifa

MPASUKO MKUBWA BUNGE LA KATIBA

Thursday, April 17 2014, 0 : 0


WAJUMBE Umoja wa Katiba ya Wananchi (UKAWA) wamesusia Bunge Maalum la Katiba kwa kutoka ndani ya ukumbi wa Bunge Maalum, wakidai kwamba wamechoka kubaguliwa na kudharauliwa.
Uamuzi huo ulifikiwa mara baada ya mmoja wa wajumbe wa kundi hilo, Profesa Ibrahimu Lipumba, kumaliza kuchangia mjadala wa Rasimu ya Katiba kuhusu Sura ya Kwanza na Sura ya Sita.
Lipumba alisema hawaoni sababu ya kuendelea na mjadala huo kwa kuwa hawataki kuwa sehemu ya kuhamasisha ubaguzi miongoni mwa Watanzania.
Alisema mjumbe mwenzao, William Lukuvi, amekuwa akitoa kauli za ubaguzi wa dini dhidi ya Wazanzibari wakati akizungumza na viongozi wa dini ya Kikristo.
"Mh e s h i m w a Ma k a m u Mwenyekiti, mjadala wetu unavyokwenda utadhani Rasimu hii ya Serikali ililetwa na CUF, CHADEMA, NCCR- Mageuzi au Wapemba, Rasimu ya Tume ya Rais si ya Wapemba, mjadala wetu ulikuwa una utaratibu wa ubaguzi, watu wamebaguliwa humu, huku viongozi wakubwa wanapiga makofi, hii ni hatari kwa nchi yetu," alisema.
"Wapemba, Waarabu, Wajili, Wabungo, hii hatuhitaji katika Tunu za Taifa, tunahitaji katiba itakayohakikisha kila mwananchi anapata haki yake bila kujali rangi zetu, jinsia zetu, makabila yetu, huu ndo msingi aliotuachia Mwalimu Julius Nyerere, tusifanye ubaguzi," alisisitiza Prof. Lipumba.
Aliongeza kuwa; "Lukuvi ameshaanza kampeni za ubaguzi na kupinga Serikali tatu kanisani... naomba ninukuu kauli yake aliyoitoa kanisani Aprili 14 wakati wa sherehe za kusimikwa kwa Askofu wa Kanisa la Mathodist Jimbo la Dodoma, Joseph Bundala akimuwakilisha Waziri Mkuu Mizengo Pinda alihamasisha Serikali mbili, huku akisema kwamba Serikali tatu zikipita nchi itatawaliwa na Jeshi."
Alisema kuwa Lukuvi alienda mbali zaidi aliposema kwamba Wazanzibari wanaotaka kuwa na nchi yao hawawezi kujitegemea, bali wanataka Serikali yao ili wapate nafasi ya kujitangazia kuwa nchi ya kiislamu.
"Kweli Waziri anaweza kufanya hivyo ndani ya kanisa, kamlazimisha mpaka kiongozi wa kanisa hilo, Askofu Joseph Bundala akasema ili kudumisha muungano ni vyema katiba ya Zanzibar ifutwe iwekwe Katiba ya nchi moja ambayo itadumisha muungano," alisema Prof. Lipumba wakati akinukuu viongozi hao.
Alisema kama walikuwa wanajua rasimu hiyo ikipitishwa italeta
mapinduzi na kusababisha nchi kutotawalika hakukuwa na sababu ya kuendelea na mchakato.
"Kwa nini mlitumia sh. bilioni 60, sh.bilioni 70 katika Tume ya Jaji Warioba, kwa nini mnatufikisha hapa, jengo hili tunaambiwa limekarabatiwa kwa sh. bilioni 8.2 kwa nini mlitumia fedha zote hizi wakati hamuamini Rasimu ya Katiba," alisema na kuongeza;
"Au ulikuwa ni utaratibu wa kujipatia ten percent (asilimia 10) ndio maana mlilikarabati kwa gharama kubwa, tunataka CAG aje akague matumizi ya fedha... fedha ni nyingi wakati hiyo katiba hamuitaki."
Alisema hadi sasa uongozi wa Bunge hilo umeshatangaza kuendelea na Bunge hadi Aprili 25 wakati hakuna utaratibu wowote wa kupiga kura na kufanya maamuzi kuhusu sura hizo mbili.
"Tumechoka kusikiliza matusi, tumechoka kudharau mawazo ya wananchi, tumechoka ubaguzi, hatuwezi kuwa sehemu ya kundi la Interahamwe linalohamasisha ubaguzi ndani ya Tanzania, hilo hatulikubali," alisema na kuongeza;
"Tunawaachia, watu wote tunaotaka katiba ya wananchi tunawaachia nyie Interahamwe muendelee na vikao vyenu," alisema Profesa Lipumba.

"

Ni CCM Kalenga

Monday, March 17 2014, 8 : 54

MATOKEO ya awali katika uchaguzi mdogo wa ubunge jimbo la Kalenga, Iringa Vijijini, yanaonesha Chama Cha Mapinduzi (CCM), kimepata ushindi wa kishindo katika kata 11 kati ya 13, ambapo idadi ya vituo vya kupigia kura vilikuwa 200.
Kata hizo ni Lumuri, Kalenga, Kiwere, Mgama, Ifunda, Magulilwa, Nzihi, Ulanda, Wasa, Lyangungwe na Mseke ambapo kata za Maboga na Luhota matokeo yake hadi tunakwenda mtamboni yalikuwa hayajatangazwa.
Kata ya Ifunda inadaiwa kuwa ngome ya chama cha Demokrasia na Maendeleo (CHADEMA), ambacho kilifunga kampeni zake katika kata hiyo.
Dosari zilizojitokeza katika uchaguzi huo ni pamoja na baadhi ya wapigakura waliokuwa na shahada za kura, kukuta majina yao hayapo kwenye vituo vya kupigia kura.
Hata hivyo, mmoja wa waangalizi wa uchaguzi huo kutoka Makao Makuu ya Tume ya Taifa ya Uchaguzi (NEC), aliyefahamika kwa jina la Kaijage, alisema wote ambao majina yao hayajaonekana lakini wana shahada, wajaze fomu maalumu na kuruhusiwa kupiga kura.
Matokeo ya awali kwenye vituo, Ofisi ya Kijiji Tagamenda CCM-64, CHADEMA-53, CHAUSTA-0, Ofisi ya Kijiji Ugwachana, ccm- 91-CHADEMA-31, CHAUSTA-0,, Ofisi ya Kijiji Tanangozi 1, CCM- 86, CHADEMA-46, CHAUSTA-2.
 Tanangozi 2, CCM-79, CHADEMA-28, CHAUSTA-0, Shule ya Msingi Mtivila, CCM-83, CHADEMA-17, CHAUSTA-1, Tosa 1, CCM-98, CHADEMA-20- CHAUSTA-0, Ipamba 2, CCM-104, CHADEMA-10, CHAUSTA-0.
Isakulilo, CCM-83 , CHADEMA-8, CHAUSTA-0, Kilindi A, CCM-69, CHADEMA-23, CHAUSTA-0, Ofisi ya Kijiji (Kilindi), CCM-117, CHADEMA-53, CHAUSTA-0, Zahanati CCM 117, CHADEMA-67, CHAUSTA-0.
Kata ya Ifunda, Kivavali A, CCM-99, CHADEMA-19, CHAUSTA-0, Kivalali B, CCM-109, CHADEMA-14, CHAUSTA-0, Muwimbi CCM-164, CHADEMA-22, CHAUSTA-0, Mahanzi CCM-130, CHADEMA-46, CHAUSTA-0.
Ikungwe A, CCM-131, CHADEMA-23, CHAUSTA-0, Ikungwe B, CCM-216, CHADEMA-13, CHAUSTA-0, Magunga CCM-184, CHADEMA-4, CHAUSTA-1, Wasa CCM-149, CHADEMA-15, CHAUSTA-0, Usengelidate CCM-260, CHADEMA-46, CHAUSTA-0.
Kutokana na matokeo hayo ya awali, wafuasi wa CCM walianza kushangilia ushindi kwenye maeneo mbalimbali ya jimbo hilo wakiwa wameshika vipande vya miti na kucheza ngoma.
Utulivu Kalenga
Wakazi wa jimbo hilo, walijitokeza kwa wingi katika vituo vya kupigia kura ambapo hali ya amani na utulivu, ilitawala katika maeneo mbalimbali ya jimbo hilo.
Vituo vya kupigia kura vilifunguliwa saa moja asubuhi ambapo misururu mirefu ilianza kuonekana muda mfupi baada ya kazi ya kupiga kura kuanza.
Miongoni mwa vituo vilivyokuwa na idadi kubwa ya wapigakura ni vile vilivyopo kwenye kata ya Kalenga Mjini, Kata ya Kalenga na Mangalila vilivyo kwenye Kata ya Ulanda.
Katika Kata ya Maboga, vituo vyote vya kupigia kura vilifunguliwa mapema ambapo akizungumza na Majira baada ya kupiga kura, Bw. Onesmo Makasi, mkazi wa Mangalila, alisema awali alidhani uchaguzi huo utagubikwa na vurugu kutokana na kauli zilizokuwa zikitolewa na baadhi ya wanasiasa.
"Nimepiga kura kwa amani na utulivu, kutokana na utaratibu huu naamini mshindi atatangazwa mapema," alisema.
Mkazi mwingine wa kijiji hicho, Zaina Konzi aliipongeza Tume ya Taifa ya Uchaguzi (NEC) na Jeshi la Polisi kwa kuhakikisha uchaguzi huo unakuwa wa amani.
Ulinzi uliimarishwa katika vituo vyote vya kupigia kura ambapo askari mmoja ambaye hakupenda kutaja jina lake kwenye Kituo cha Kalenga A na B, alisema wamejipanga vizuri kulinda amani na kudhibitio viashiria vya vurugu.
Helikopta ya Chadema
CHADEMA waliitumia helkopta yao kuzunguka katika maeneo mbalimbali ya jimbo hilo. Baadhi ya kata ambazo zilifikiwa na helikopta hiyo ni Kalenga, Nzihi, Ifunda na Wasa.
Jeshi la Polisi mkoani humo, lilizuia matumizi ya helikopta siku ya jana ili kuwawezesha wananchi kupiga kura kwa utulivu lakini CHADEMA waliitumia kwa kutoa nembo ya chama ili kutokiuka sheria na kanuni za uchaguzi.
Kauli za vitisho
Kabla ya uchaguzi huo, kauli mbalimbali za vitisho zilikuwa zikitolewa na baadhi ya wanasiasa walipokuwa kwenye mikutano ya kampeni na kuonekana kuwatia hofu wananchi.
Kuna zilizodai kuna vijana waliofichwa porini kwa ajili ya kuzuia watu wasiende kupiga kura hivyo kusababisha hofu kwa baadhi ya wananchi wakihofia usalama wa maisha yao.
 Baadhi ya wananchi waliamini uchaguzi huo ungegubikwa na vurugu kutokana na kauli za wanasiasa hao ikiwemo ya baadhi ya makundi ya vijana kuingizwa jimboni humo.
Kamanda wa Polisi mkoani humo, Ramadhan Mungi alisema polisi wamejipanga kukabiliana na kila aina ya hila zinazoweza kuvuruga uchaguzi huo.
Kauli hiyo imesaidia kuimarisha hali ya amani jimboni humo ambapo wapigakura walipiga kura zao bila vitisho.
Vyama vitatu vilishiriki katika uchaguzi huo ambavyo ni CCM, CHADEMA na CHAUSTA. Mgombea wa CCM ni Bw. Mgimwa, CHADEMA alikuwa, Bi. Grace Tendega na CHAUSTA, Bw. Richard Minja.
Hadi tunakwenda mtamboni, NEC ilikuwa haijatangaza rasmi matokeo hayo wala kumtangaza mbunge mteule wa jimbo hilo.

  • HATI YA MUUNGANO YATUA BUNGENI

    Thursday, April 17 2014, 0 : 0


    SIKU chache baada ya Serikali kuonesha hati halisi ya Muungano, hati hiyo tayari imekabidhiwa kwa Mwenyekiti wa Bunge Maalumu la Katiba, Samuel Sitta.
    Kukabidhiwa kwa hati hiyo kwa Mwenyekiti wa Bunge Maalumu la Katiba, kumethibitishwa Bungeni jana na Mmoja wa wajumbe wa Bunge hilo, Stephen Wassira, kabla ya kuahirishwa kwa kikao cha Bunge hilo jana mchana.
    "Juzi, nilisema katika Bunge lako tukufu kwamba ile hati ya Muungano ipo tayari kwa Mwenyekiti wa Bunge ipo katika hali nzuri tangu ilipotiwa saini," alisema.
    "Lakini, ninachotaka kusema, ni kwamba sisi wote tumeapa hapa na mwisho wa kiapo chetu tukasema, ewe Mwenyezi Mungu nisaidie," alisema Wassira.
    Aliongeza kusema kuwa siku zote watu wanatakiwa kusema ukweli badala ya uongo ambao haumfurahishi Mungu.
     "Mungu wa madhehebu yote ni Mungu wa ukweli na uongo ni kazi ya shetani. Ukweli ni kazi ya Mungu, yaani wamegawana kabisa, Mungu ni wa ukweli na shetani ni wa uongo," alisema Wassira.
    Alisema kuwa Mjumbe wa Bunge hilo, Tundu Lissu na wenzake walipojua hati imepatikana walikutana usiku na kukubaliana kwamba waseme sahihi ya Karume (Abeid Aman Karume) iliyoko kwenye hati si ya kweli.
    "Sasa hawa watu wanaipeleka wapi nchi hii...jamani, tunaipeleka wapi Tanzania kila siku uongo unataka utawale Tanzania, na ukweli upuuzwe?" alihoji Wassira.
    Hata hivyo aliwatahadharisha wajumbe wa bunge hilo pamoja na Watanzania kujihadhari na mawakala wa shetani kwa kuwa Mungu anatumia wanadamu kufikisha ujumbe wake kwa wanadamu wengine, huku shetani naye akitumia wanadamu kufikisha ujumbe wake kwa wanadamu na kuongeza kuwa ni vyema wakakwepa mamlaka ya shetani.
    Wassira alizungumzia tabia ya Lissu kuwakosoa waasisi wa nchi hii akiwemo hayati Mwalimu Julius Nyerere na Abeid Aman Karume kwa kusema tabia hiyo inawadhalilisha viongozi hao waliokuwa wakiheshimika ndani na nje ya nchi.
    Mheshimiwa Tundu Lissu, lakini amekuwa akiwakashifu Baba wa Taifa na Karume, wazee wale Mungu awaweke mahali pema peponi. Yeye anasema walikuwa madikteta na waongo na anazungumzia vyama vya siasa.
    "Mimi nataka kusema kwamba, heshima ya waasisi wetu, hailindwi na vyama, italindwa na Watanzania wote na hao walikuwa viongozi wa vyama," alisema.

    "

  • KESI YA PINDA KUUNGURUMA TENA LEO MAHAKAMA KUU

    Thursday, April 17 2014, 0 : 0

     
    MAHAKAMA Kuu, Kanda ya Dar es Salaam, leo inatarajia kuendelea kusikiliza kesi ya kikatiba inayomkabili Waziri Mkuu, Mizengo Pinda , iliyofunguliwa na Kituo cha Msaada wa Kisheria na Haki za Binadamu (LHRC) kwa kushirikiana na Chama cha Wanasheria Tanganyika (TLS).
    Katika kesi hiyo namba 24 ya mwaka 2013, LHRC na TLS,wanadai Pinda alivunja Katiba kutokana na kauli aliyoitoa Bungeni, akiagiza vyombo vya dola kuwapiga wale ambao watakaidi kutii sheria zinazotolewa na vyombo husika. Walalamikaji wanadai kuwa amri kwa vyombo vya utekelezaji wa sheria kuwapiga wananchi ni kinyume na katiba.
    Hata hivyo, Pinda na Mwanasheria Mkuu wa Serikali (AG) aliyeunganishwa katika kesi hiyo waliweka pingamizi la awali, pamoja na mambo mengine wakidai kuwa walalamikaji na watu walioorodheshwa katika kesi hiyo hawana mamlaka kisheria kumfungulia kesi.
    Kabla ya kesi hiyo kuahirishwa, mwaka jana, Naibu Mwanasheria Mkuu wa Serikali (DAG), George Masaju, aliieleza Mahakama Kuu kuwa kesi ya kikatiba inayomkabili Waziri Mkuu, Pinda ni batili, hivyo inapaswa kufutwa.
    Masaju, alisema hayo wakati alipokuwa akiwasilisha pingamizi la awali la Pinda ,ambapo alisema sheria zinamlinda Waziri Mkuu kutoshtakiwa wala kuhojiwa na chombo chochote juu ya kauli aliyoitoa Bungeni.
    Katika pingamizi hilo, DAG Masaju alidai kesi hiyo ni batili na iko mahakamani isivyo halali kwa kuwa inakiuka Katiba ya Jamhuri ya Muungano ya mwaka 1977 na Sheria ya Mamlaka, Kinga na Haki za Wabunge ya mwaka 1988. Akifafanua hoja hizo, DAG Masaju alisema Pinda analindwa na Katiba Ibara ya 100 (1) na (2)
    Akinukuu ibara hizo, alisema ibara ya kwanza inaeleza kuwa kutakuwa na uhuru wa mawazo na majadiliano bungeni, ambao hautavunjwa wala kuhojiwa na chombo chochote, au katika mahakama yoyote nchini.
    Ibara ya pili inaeleza kuwa mbunge yeyote hatashtakiwa au kufunguliwa shauri la madai mahakamani kwa jambo lolote alilosema, au alilolitenda, au alililoliwasilisha bungeni kwa njia ya maombi, mswada, hoja au vinginevyo. “Msingi wa shauri hili unatokana na jambo lililosemwa Bungeni na mmoja wa wabunge wakati wa shughuli za bunge.”
    Kwa upande wake Wakili wa Serikali, Gabriel Mlata, alisema kesi hiyo ni batili kuwepo mahakamani kwa kuwa walioifungua wamekiuka utaratibu wa uwasilishaji wa mashauri kama hayo kwa mujibu wa amri na kanuni za uendeshaji wa mashauri ya madai.

    "

  • LISSU ALITIKISA TENA BUNGE

    Thursday, April 17 2014, 0 : 0

    KWA mara nyingine tangu kuanza mjadala wa kujadili sura ya kwanza na ya sita ya Rasimu ya Katiba kuhusu muundo wa Serikali, Mjumbe Maalum wa Bunge la Katiba, Tundu Lissu, ameendelea kutikisa Bunge hilo kutokana na hoja kuhusiana na uhalali wa Muungano.
    Mbunge huyo alienda mbali zaidi na kusema kuwa hati za Muungano ambazo Serikali imeonesha saini za Abeid Aman Karume, zimeghushiwa na kutaka hati hiyo ipelekwe bungeni ili wabunge walinganishe saini hizo.
    Lissu alitoa kauli hiyo mjini Dodoma wakati akichangia mjadala kuhusu sura ya kwanza na ya sita ya rasimu ya Katiba. Lissu alianza kuchangia akisema;
    "Acha nijibu vioja kuwa Tundu Lissu amemtukana Baba wa Taifa, sasa mwaka 1995 Baba wa Taifa alihutubia mkutano wa Mei Mosi mkoani Mbeya na baadaye aliandika kitabu chake alichokiita 'TUJISAHIHISHE' na katika kijitabu chake alisema asiyekubali kukosolewa hawezi kuwa kiongozi bora."
    "Baba wa Taifa aliyekuwa Mwenyekiti na mwanzilishi wa CCM alisema CCM si mama yangu hivyo Baba wa Taifa alikuwa binadamu, hakuwa Mungu hakuwa malaika na hajawa mtakatifu bado kwa hiyo tunaposema makosa yake tunathibitisha ubinadamu wake na Baba wa Taifa mwenyewe angekuwa wa kwanza kukubali kuwa alikuwa binadamu na si Mungu na kama binadamu alikuwa anakosea."
    Alisema kwa wasiofahamu Baba wa Taifa aliwahi kuunga mkono vita ya Jamhuri ya Biafra iliyokuwa inataka kujitenga na Nigeria alikosea hakuwa Mungu; "Tunaposema alikosea hatumdhalilishi bali tunathibitisha ubinadamu wake," alisema.
    Alisema, “kuna watu ambao wako humu ndani bungeni wakati wa uhai wake walikimbia chama chake na kujiunga na chama cha NCCR-Mageuzi na wakasubiri Mwalimu amefariki wamerudi CCM na leo hii ndiyo wanaojifanya kuwa watetezi wakubwa wa Baba wa Taifa.”
    HATI ZA MUUNGANO
    Akizungumzia hati za Muungano, Lissu alisema; "Kioja cha pili ni kuhusu hati ya makubaliano ya Muungano kuwa ipo au haipo kwani tumeoneshwa kitu hivi na kuna sahihi kwenye mitandao mlinganishe sahihi ya Sheikh Karume iliyoko kwenye hati ya Muungano katika sheria ya mabadiliko ya kwanza ya Katiba ya mpito ya mwaka 1965.
    "Leteni hiyo hati mnayodai kuwa ina saini ya Karume tuwaoneshe hapa mlivyo waongo na kama hati hiyo ni halali iliwahi kutungiwa sheria ya kuithibitisha Zanzibar?
    “Je na hiyo sheria ipo wapi na kwa mujibu wa Profesa Shivji kuwa Zanzibar haijawahi kuridhia Muungano hadi kesho kutwa, hivyo basi kama masharti hayakutimizwa kwa miaka 50 hiyo hati si halali."
    Alisema hoja za msingi kwa mahali tulipofikia sasa kikatiba na kisiasa na kwa mujibu wa Dkt. Mwakyembe aliwahi kuandika kwenye kitabu chake kuwa muundo wa shirikisho wa Serikali tatu kama ilivyopendekezwa na Tume ya Jaji Nyalali, Kisanga, Warioba na wananchi ndiyo njia pekee ya kutatua matatizo ya Muungano.
    "Nathibitisha ukweli wa maneno ya Dkt. Mwakyembe kwa katiba zote mbili za Jamhuri ya Muungano wa Tanzania na ile Katiba ya Zanzibar ambazo ni halali na ukisoma kama utaona kama vile unasoma katiba za nchi mbili tofauti kumbe ni nchi moja," alisema Tundu Lissu.
    Alisema Rais Kikwete sio Mkuu wa nchi ya Zanzibar kwa Ibara ya 26 (1) ya Katiba ya Zanzibar inasema; "Rais wa Zanzibar atakuwa Mkuu wa nchi ya Zanzibar, hivyo Rais Kikwete si Amiri Jeshi Mkuu wa Zanzibar na ibara ya 123 ya katiba hiyo inasema Rais wa Zanzibar ndiye Amiri Jeshi Mkuu wa Vikosi vya ulinzi maana yake ni jeshi, hivyo tayari tuna nchi mbili tofauti," alisema Lissu.
    Alisema Ibara ya 9 inasema kutakuwa na Mzanzibar yaani inazungumzia Mzanzibar na si Mtanzania; "Hivyo hakuna ambaye atasimama hapa na kusema sisi ni nchi moja... nani anayeweza kumbishia Dkt. Mwakyembe kuwa suluhisho la tatizo la Muungano ni Serikali tatu?" Alihoji Lissu.
    Alisema hata kiprotokali Rais Kikwete, anapokuwa kwenye sherehe za Mapinduzi anapanga foleni kule Zanzibar na anayepigiwa mizinga 21 ni Dkt. Shein.
    "Hauwezi kuwa na wakuu wa nchi wawili mmoja anaishi Magogoni na mwingine Mnazi Mmoja wakipishana kauli hali itakuwaje," alihoji Lissu.
    Alisema baada ya miaka 50 tutengeneze utaratibu mpya na bila kuchukua hatua za haraka mbele ni giza na watakaoleta vita si wale wanaotaka kufanya marekebisho bali ni wale wanaofumbia macho wanaokwenda kuangukia kwenye vitindi virefu.
    Kwa upande wake mjumbe mwingine wa Bunge hilo Maalum Bernad Membe, alisema yeye anaunga mkono msimamo wa chama chake wa kutetea Serikali mbili.
    Alimshukia, Lissu akisema hakuna nchi yoyote duniani inayotukana viongozi wake na Bunge litakuwa la mwisho kufanya dhihaka kwa viongozi na waasisi wa Taifa hili wanaheshimika duniani kote.
    Kuhusu hati ya Muungano, Membe alisema ameiona ni halali na ndio iliyokwenda Umoja wa Mataifa. Alisema Tume ya Jaji Warioba itakuja kulaaniwa kwa mauaji yatakayotokea kutokana na kubariki muundo wa Serikali tatu.
    "Bunge hili litakuja kulaaniwa kwa kubariki mauaji," alisema Membe. Naye Mjumbe wa Bunge hilo, Zitto Kabwe, alisema Muungano ni imani hivyo muundo wowote wa Muungano unavunja Muungano kama hakuna mwafaka utavunjika.
    "Tuwe wa Serikali mbili au moja au tatu kama hakuna mwafaka lazima utavunjika tu na mfano mzuri ni wa Serikali ya shirikisho ya Somalia, Ethiopia na Malaysia zilivunjika," alisema.
    "Mchakato huu ulipaswa kutengeneza maridhiano katika nchi yetu, unajenga chuki, kutengana na majibizano ambayo wananchi huko nje wanatushangaa sana na tumesikia lugha kali sana za kibaguzi humu ndani na hakuna juhudi zozote kutoka kwa viongozi wetu kukemea ubaguzi hakuna sumu mbaya katika nchi zozote duniani kama ubaguzi" alisema Kabwe.
    Alisema kauli za vitisho na kibaguzi zinatoka huku watu wanashangilia, lakini pia wanashangilia matusi ya kupandikiza chuki... hatuwezi kujenga nchi kwa mtindo huo, hivyo watu wajadiliane kwa hoja na watu wenye hoja zao watoe hoja zao na baadaye tukubaliane na tuamue.
    Alisema kuna baadhi ya wajumbe wanazungumzia gharama kwa Serikali tatu zitakuwa kubwa, lakini hakuna hadi sasa utafiti wowote wa kitaalam ambao unathibitisha hilo na baadhi ya wachumi wameshindwa kuithibitisha.
    Alisema kinachofanyika ni kuondoa mambo yale ya kidola unaweka pembeni na tutaweza kuwa na Rais mmoja, lakini wakuu wa Serikali ni wawili katika nchi moja ni jambo la Makubaliano kwani hatuhitaji kujenga Ikulu mpya.

    "

  • JK: Mafuriko hayaepukiki

    Tuesday, April 15 2014, 13 : 23

    RAIS Jakaya Kikwete, jana ameshuhudia msururu mkubwa wa magari na maelfu ya wasafiri waliokwama katika eneo la Ruvu Darajani, mkoani Pwani, kutokana na kasi kubwa ya maji yanayopita juu ya daraja hilo.
    Hali hiyo inatokana na mvua kubwa zinazoendelea kunyesha katika mikoa mbalimbali nchini, kusababisha maafa kwa wananchi pamoja na uharibifu wa miundombinu hususan madaraja.
    Miongoni mwa watu waliokwama eneo hilo ni Naibu Spika wa Bunge la Jamhuri ya Muungano, Bw. Job Ndugai aliyekuwa akitokea Dar es Salaam kwenda mkoani Dodoma.
    Akizungumza katika eneo hilo, Rais Kikwete alisema mafuriko hayo hayaepukiki ambapo wajibu wa Serikali ni kuwasaidia waathirika, kwa taarifa alizonazo, 10 wamethibitika kupoteza maisha kutokana na mafuriko hayo.
    "Mvua hizi zimekuwa na madhara makubwa kwani hata daraja la Bunju limebomoka na kukata mawasiliano kati ya Dar es Salaam na Bagamoyo.
    "Kwa sasa Serikali inaangalia uwezekano wa kufungua Barabara ya Mlanzidi-Bagamoyo, kama kasi ya maji itapungua ili kupunguza msongamano wa magari," alisema.
    Aliongeza kuwa, mafuriko hayo yamechangiwa na mvua ambazo zinaendelea kunyesha kwenye Milima ya Uluguru, mkoani Morogoro na kusabisha mito mingi kujaa maji.
    Kutokana na hali hiyo, Rais Kikwete, ameliagiza Jeshi la Kujenga Taifa (JKT) Kambi ya Ruvu, kuhakikisha wasafiri waliokwama katika eneo hilo wanapata vyakula kwa bei nafuu.
    Rais Kikwete alitoa agizo hilo baada ya kukuta sahani moja ya wali inauzwa sh. 4,000 na kuwataka wananchi wachukue tahadhari kwani mvua hizo bado zinaendelea kunyesha.
    Kwa upande wake, Mkuu wa Mkoa wa Pwani, Bi. Mwantumu Mahiza, alisema hajawahi kuona mafuriko ya aina hiyo. Mvua hizo ambazo jana zimeingia siku ya tatu mfululizo, zimeendelea kuleta madhara kwa wakazi wa Jiji la Dar es Salaam, wengine wakikosa makazi.
    Baadhi ya watu wamekuwa wakitafuta ndugu zao bila mafanikio kutokana na nyumba walizokuwa wakiishi kuzingirwa na maji.

kimataifa

NEW YORK: WAISLAMU KUTOPELELEZWA

, 0 0, 0 : 0

POLISI mjini New York, Marekani, imefunga kitengo chake maalum cha ujasusi ambacho kilikuwa kikiwapeleleza waislamu ili kuchunguza kama kuna tishio lolote la ugaidi.
Kitengo hicho kilikuwa kinatumia polisi waliokuwa wanavalia nguo za kiraia kusikiliza kwa siri mawasiliano ya simu kati ya waislamu na hata kuzuru maeneo yanayokuwa yakitembelewa sana na waislamu hao.
Vyombo vya habari nchini Marekani vinasema kuwa kitengo hicho kiliwahi kushtakiwa mara mbili kwa mbinu zao za ujasusi na pia kulaaniwa na makundi ya wanaharakati wa haki za binadamu.
Kwa mujibu wa BBC, taarifa kutoka ofisi ya meya wa New York, Bill de Blasio, ilisema mageuzi hayo ni hatua muhimu sana katika kuondoa hali ya wasiwasi na kutoaminiana kati ya polisi na jamii ili jamii iweze kusaidia polisi kuwashika wahalifu.
Hatua ya kusitisha mpango huo, ilifikiwa na kamishna mpya wa polisi wa kituo hicho baada ya kuonekana kama ni njia mojawapo ya kubadili mbinu za kukusanya ujasusi ambazo wengi wanasema zilichangia mashambulizi ya Septemba 11.
Kitengo hicho kilichoanzishwa 2003 na baadaye kuitwa \"kitengo cha tathmini cha kanda\" kilipeleleza waislamu hasa maeneo ambayo walikuwa wakiswali, madukani na hata migahawani walikokuwa wanakula.
Wakuu wa kitengo hicho wanasema kuwa kazi yao iliathiri sana uhusiano kati ya jamii na polisi.

"

"

Ujerumani yaionya Urusi

Wednesday, April 16 2014, 8 : 34

UJERUMANI imeitaka Urusi kujitenga na wanaharakati wanaoiunga mkono nchi hiyo ambayo imeteka majengo ya umma Mashariki mwa Ukraine.
Kwa mujibu wa DW, Waziri wa Mambo ya Nchi za Kigeni wa Ujerumani, Frank Walter Steinmeier, amesema Urusi haifai kujihusisha na machafuko na vitendo vinavyofanywa kinyume na sheria.
Aliongeza kuwa Urusi hawana budi kujitenga na wanaharakati wanaotaka kujitenga eneo la Mashariki mwa Ukraine.
Hata hivyo, vuguvugu za Mashariki mwa Ukraine zilianza siku nane zilizopita, lakini limeongezeka kwa kasi katika kipindi cha saa 48 zilizopita, huku wanaharakati wakiyatwaa majengo zaidi ya serikali, ikiwa ni pamoja na zana za kivita.
Wakati huo huo, Umoja wa Ulaya umeongeza idadi ya watu watakaowekewa vikwazo kutokana na mchango wao katika mgogoro wa Ukraine.
Aidha mkuu wa sera za nje wa Umoja wa Ulaya, Catherine Ashton, ameitaka serikali ya Ukraine itoe mchango zaidi katika kupunguza mvutano.
Mkuu huyo alisema hayo kabla ya mkutano unaotarajiwa kufanyika Alhamis mjini Geneva, utakaowahusisha mawaziri wa mambo ya nchi za nje wa Ukraine, Urusi, Marekani na Umoja wa Ulaya.

  • MELI YAZAMA KOREA KUSINI

    Thursday, April 17 2014, 0 : 0

    MELI moja iliyobeba takriban abiria 460 katika pwani ya Korea Kusini imezama na operesheni ya uokozi inaendelea kufuatia ishara za dharura zilizoripotiwa kutoka huko.
    Kwa mujibu wa BBC, maafisa wa polisi wamesema meli za wanamaji wa Korea pamoja na ndege za uokoaji, zimepelekwa katika eneo hilo.
    Taarifa za awali zimeeleza kuwa wengi wa abiria walikuwa wanafunzi wa shule za sekondari na walimu wao na kwamba tayari watu wapatao 338 walikuwa wamekwishaokolewa.
    Maafisa hao wamesema walipokea habari kuwa meli hiyo imepata matatizo ikiwa imebeba idadi kubwa ya wanafunzi wakitoka Incheon kwenye visiwa vya kifahari vya Jeju.
    Wamesema waokoaji wamewanusuru tayari abiria 338 huku wengine waliosalia walishauriwa waruke baharini ili waweze kuokolewa.
    Mashuhuda wanasema kulisikika kishindo kikubwa kabla ya meli hiyo kuanza kukata mawimbi zaidi ya kilomita 20 kutoka ufukweni.
    Wamesema shughuli ya uokoaji bado inaendelea huku duru zikithibitisha kuwa watu wawili wameaga dunia.

    "

    "

  • OPERESHENI DHIDI YA UGAIDI YAANZA UKRAINE

    Thursday, April 17 2014, 0 : 0


     KAIMU Rais wa Ukraine, Olexander Turchynov, amesema kuwa vikosi vya kijeshi vya Ukraine vimeuteka na kuudhibiti uwanja mmoja wa kijeshi eneo la Kramatosk Mashariki mwa Ukraine, baada ya mapigano na
    makundi yanayounga mkono Urusi.
    Rais huyo ameliambia bunge la taifa huko Kiev kuwa operesheni hiyo maalum inafanywa hatua kwa hatua.
    Kwa mujibu wa BBC, Turchynov, aliliambia bunge kuwa operesheni ya kukomboa miji na mali ya umma kutoka mikononi mwa magaidi itaendelea kuambatana na sheria za kibinadamu.
    Mamia ya watu wanaodaiwa kuwa wanaharakati wanaounga mkono Urusi wamekusanyika nje ya uwanja huo wakiwafokea majeshi yaliyotua humo kutoka Kiev.
    Duru kutoka Marekani zinasema kuwa maelfu ya majeshi ya Moscow yamezingira maeneo ya mpaka wa Ukraine na kuibua hofu ya uvamizi wakati wowote iwapo Ukraine itaingilia kati katika miji hiyo iliyotekwa.
    Rais wa Urusi, Vladimir Putin, amesema kuwa Ukraine huenda ikatumbukia katika vita vya wenyewe kwa wenyewe iwapo Kiev itaendelea na operesheni hiyo dhidi ya wananchi wake waasi.
    Taarifa kutoka Kremlin, zinasema kuwa Putin, alitoa tahadhari hiyo katika mazungumzo ya simu na kiongozi wa Ujerumani Angela Merkel.
    Viongozi hao inasemekana wameafikiana kuhusiana na umuhimu wa mkutano wa kwanza wa pamoja baina ya Bara Ulaya, Urusi, Ukraine na Marekani ambapo unatarajia kufanyika huko Geneva, Uswisi.
    Miji iliyoko Mashariki mwa Ukraine wanataka kura ya maoni kufanyika iwapo wanataka kuendelea kuwa sehemu ya Ukraine au wangependa kuiga mfano wa Crimea ambayo ilijitenga baada ya utawala mpya kumng'oa madarakani aliyekuwa rais wa nchi hiyo Victor Yanukovich.

    "

    "

  • LIBYA: BALOZI ASHIKWA MATEKA

    Thursday, April 17 2014, 0 : 0


    BARAZA la Usalama la Umoja wa Mataifa limelaani kukamatwa kwa balozi wa Jordan nchini Libya, na kutaka aachiwe mara moja.
    Hali kadhalika baraza hilo limetaka wanadiplomasia wote walioko nchini Libya wapatiwe ulinzi wa kutosha.
    Watu wenye silaha waliofunika nyuso zao walisimamisha gari la balozi huyo, Fawaz al-Itan, ambaye alikuwa akielekea kazini juzi asubuhi walimkamata na kuondoka naye.
    Watu hao walitoa sharti la kuachiwa mwanamgambo wa kiislamu kutoka Libya, ambaye amehukumiwa kifungo cha maisha kutokana na kushiriki katika njama ya kuushambulia uwanja wa ndege wa kimataifa wa Jordan.

    "

    "

  • Mwanamuziki akamatwa Rwanda

    Wednesday, April 16 2014, 8 : 46

    MWANAMUZIKI mashuhuri na mwanahabari mmoja wamekamatwa nchini Rwanda kwa tuhuma za kuwa na uhusiano na kundi la upinzani pamoja na kushirikiana na waasi.
    Kwa mujibu wa polisi, Cassien Ntamuhanga, ambaye ni mkurugenzi wa kituo cha redio ya kikristo alikamatwa juzi huku mwanamuziki Kizito Mihigo akikamatwa mnamo Ijumaa.
    Kwa mujibu wa BBC, wawili hao wanatuhumiwa kuwa na uhusiano na chama cha kisiasa cha (RNC) kilicho na makao yake nchini Afrika Kusini na uhusiano na waasi wa Hutu walio katika nchi jirani ya DRC.
    Hata hivyo polisi wamedai kuwa wawili hao pamoja na aliyekuwa mwanajeshi Jean Paul Dukuzumuremyi, ambao walipanga mashambulizi ya kigaidi kwa lengo la kupindua serikali na kuwaua maafisa wa serikali na pia kuchochea ghasia.
    Aidha Mihigo alikuwa na uhusiano wa karibu na chama tawala cha (RPF) na kwamba kukamatwa kwake kumewashangaza wengi.
    Hata hivyo, wanadaiwa kushirikiana na waasi wa FDLR ambao baadhi ya viongozi wao walishiriki katika mauaji ya kimbari ya mwaka 1994 ambapo watu 800,000 wa kabila la Tutsi na Wahutu waliuawa.
    Aidha mtuhumiwa mmojawapo ambaye ni mwanamuziki, Kizito Mihigo, alishirikiana kwa karibu na Serikali na hata kuimba wimbo wa taifa mbele ya Rais Paul Kagame.

biashara na uchumi

ALAT yaridhishwa usimamizi wa miradi wilayani Ukerewe

Wednesday, April 16 2014, 10 : 39

 
JUMUIYA ya Tawala za Mitaa Tanzania (ALAT), Mkoa wa Mwanza imeridhishwa na ubora wa miradi ya maendeleo inayotekelezwa katika Wilaya ya Ukerewe na kutaka iwe mfano wa kuigwa na wilaya nyingine nchini.
Pongezi hizo zilitolewa jana baada ya wajumbe wa jumuiya hiyo kutembelea miradi mitano yenye thamani ya sh. milioni 693.5 inayotekelezwa katika maeneo tofauti ya wilaya hiyo.
Makamu Mwenyekiti wa ALAT tawi la Mwanza, Henry Matata alisema mbali na miradi ya majengo ya taasisi tofauti waliyotembelea kuwa katika viwango vya kuridhisha pia barabara zake ni nzuri na zinapitika.
Akionekana kufurahishwa na uwajibikaji wa halmashauri hiyo, Matata ambaye pia ni mwenyekiti wa Halmashauri ya mji wa Ilemela, alisema ALAT imetoa mchango wa sh.milioni. 2.1 kuchangia miradi hiyo.
Kati ya fedha hizo sh. 800,000 zimetolewa kwa kikundi cha Bure Garden kinachojishughulisha na kilimo na usindikaji mazao huku kiasi sawa na hicho zikitolewa kukamilisha jengo la kupumzikia wagonjwa katika Hospitali ya wilaya hiyo na sh. 500,000 zikitolewa kusaidia ujenzi wa jengo la utawala katika sekondari ya Mumbuga.
Hata hivyo, alisema jumuiya hiyo inakabiliwa na changamoto kadhaa ikiwemo baadhi ya halmashauri kushindwa kuwasilisha michango yake kwa wakati sababu inayokwamisha mipango ya jumuiya.
Taarifa iliyotolewa katika kikao hicho inaonyesha hadi kufikia mwaka huu halmashauri sita kati ya saba za mkoa huo zinadaiwa sh. milioni 84.3 ambapo Ilemela inadaiwa sh. milioni 9 , Kwimba sh. milioni 5, Misungwi sh.milioni 19, Sengerema sh.milioni 8.5, Magu sh. milioni. 18.3 na Ukerewe sh. milioni 17.5.
Mwenyekiti wa Halmashauri hiyo, Joseph Mkundi, akipokea msaada huo, alisema halmashauri yake ipo makini na itaendelea kusimamia kwa karibu shughuli na miradi yote ya umma ili kuiwezesha jamii kupata huduma bora.
Akifafanua zaidi aliunga mkono utaratibu wa jumuiya hiyo waliojiwekea wa kutembelea miradi na kufanya vikao kwa kila wilaya kwa maelezo kuwa unawezesha wajumbe kujifunza mbinu mbadala za maendeleo na kuongeza wigo wa ufahamu katika kusimamia majukumu yake.

Watakiwa kuwa wabunifu kujiletea maendeleo

Wednesday, January 15 2014, 9 : 38

 
VIJANA mkoani Simiyu wametakiwa kuacha kujiingiza katika makundi hatarishi, na badala yake wawe wabunifu kwa lengo la kujiletea maendeleo.
Hayo yalisemwa hivi karibuni na Mwenyekiti wa Umoja wa Vijana CCM (UVCCM) Mkoa wa Simiyu, Njalu Silanga, katika sherehe ya uwekaji jiwe la msingi katika ofisi ya wajasiriamali ya Nyasubi SACCOS mjini Bariadi.
Alisema vijana wengi wamekuwa na dhana ya kuilalamikia Serikali kuwa haijawaletea maendeleo, hali inayosababisha wengi wao kukaa vijiweni ikiwa pamoja na kuingia katika vikundi vya kuhatarisha maisha yao.
Njalu alisema kuwa maendeleo kwa kila Mtanzania yanakuja kwa kila mmoja kuwa mbunifu pamoja na kujishughulisha katika kazi mbalimbali sambamba na kujiunga katika vikundi vya ujasiriamali.
Mwenyekiti huyo ambaye alikuwa mgeni rasmi wakati wa uwekaji jiwe la msingi katika ofisi hiyo alisema ni vyema vijana wakawa wabunifu pamoja na kujiunga katika vikundi mbalimbali vya wajasiriamali ili kujiletea maendeleo. Awali akisoma risala kwa mgeni rasmi Katibu wa wajasiriamali wa Nyasubi SACCOS, David Wambura, alisema kuwa tangu kuanzishwa kwa asasi hiyo jumla ya wanachama 214 wamejiunga huku wanawake wakiwa 132 na wanaume wakiwa 82.
Alisema asasi hiyo imelenga kuwaletea maendeleo wanachama wote kwa kujikopesha ndani ya asasi yenyewe ili kuhakikisha kuwa wanaweza kujiletea maendeleo.

  • Vodacom yawakutanisha wanafunzi ziara mafunzo

    Wednesday, April 16 2014, 10 : 40


    KAMPUNI ya Vodacom imeendelea kuwavutia wanafunzi wa ngazi mbalimbali hapa nchini kama sehemu ya kufanyia ziara za mafunzo yakiwemo ya huduma za mawasiliano ya simu, masuala ya ajira na uajiri na Teknolojia ya Habari na Mawasiliano (ICT).
    Hivi karibuni, kundi la wanafunzi wa kidato cha nne wa Shule ya Sekondari Wasichana ya Kiislamu ya Kunduchi jijini Dar es salaam na wanafunzi wa daraja la nne wa Shule ya Msingi Good Samaritan kwa nyakati tofauti walifanya ziara ya kimafunzo makao makuu ya Vodacom, Mlimani City jijini humo kupata fursa ya kuuliza maswali mbalimbali waliyotaka kuyajua kwa faida ya masomo yao na ufahamu wa mambo wa jumla.
    "Tunajihisi kuwa ni wenye bahati kubwa sana kutembelea Makao makuu ya Vodacom, lengo letu lilikuwa kujifunza sekta ya mawasiliano ya simu, uendeshaji wa kampuni ikiwemo masuala yanayohusu masilahi ya wafanyakazi na uwajibikaji kwa jamii (CSR).
    "Yote hayo tumeyapata na tunafuraha sana," alisema Khadija Mlinga mwanafunzi wa Shule ya Sekondari Wasichana ya Kiislamu ya Kunduchi.
    "Kwetu ni furaha kubwa sana kuwapokea na kuwapa taarifa mnazolenga kujifunza tukiamini kuwa siku moja nanyi mtakuja kuwa wafanyakazi wa Vodacom, nawaomba msome kwa bidii na maarifa ili kila mmoja aweze kutimiza ndoto yake, safari inaanza sasa msingoje kesho," alisema Meneja Uhusiano wa Nje wa Vodacom, Salum Mwalim alipokuwa akizungumza na makundi yote mawili.

  • Vifaa vya satelaiti kusimamia tembo wote

    Wednesday, April 16 2014, 10 : 40


    TEMBO wa Hifadhi ya Taifa ya Ruaha iliyopo katika Halmashauri ya Wilaya ya Iringa Vijijini, watafungwa kifaa maalumu cha kufuatilia mwenendo wa wanyama hao ambao wapo katika kasi kubwa ya kutaka kutoweka kwenye ramani za hifadhi.
    Hatua hiyo inatokana na ujangili unaoendelea ambapo vifaa hivyo vinakuwa kwenye harakati za ziada za serikali na wadau wake za kuwanusuru wanyama hao na majangili wa meno yake.
    Mpango huo utakaotumia teknolojia ya kisasa ya mawasiliano ya satelaiti ya utambuzi wa jiografia ya maeneo (GPS) na kompyuta utatekelezwa kupitia Mradi wa Kuboresha Mtandao wa Maeneo ya Hifadhi Kusini mwa Tanzania (SPANEST) ili kuhakikisha kuwa kundi la wanyama jamii ya tembo wanalindwa na kuendelea kuishi ili vizazi vijavyo viione rasilimali hiyo muhimu.
    Akizungumza na waandishi wa habari jana, Mratibu wa SPANEST, Godwell Olle Meingíataki kwenye ukumbi wa ofisi ya VETA Mkoa wa Iringa alisema kuwa, wako katika hatua za mwisho za utekelezaji wa mpango huo na kuongeza kuwa hatua ya kuwafunga tembo wote itakuwa imetafutiwa ufumbuzi mkubwa ambapo kila tembo atajulikana kwenye mtandao huo wa kompyuta.
    "Kwa kupitia mpango huo tutakaoutekeleza ndani ya hifadhi zetu tembo, viongozi wa makundi ya tembo watafungwa kifaa maalumu shingoni kitakachokuwa kinatoa taarifa za mwenendo wao katika kila eneo watakalokuwepo ndani na nje ya hifadhi na tunahakika kupitia mpango huu tutawanusuru wanyama hawa," alisema Godwell.
    Aliongeza kuwa, kwa kupitia kifaa hicho askari wa wanyamapori watakabiliana kirahisi na majangili wa meno ya tembo katika azma ile ile ya kunusuru kiumbe hicho kinacholiingizia Taifa mapato makubwa ya kigeni na kuwa kila kundi la tembo kwa sasa litakuwa linalindwa kwa umakini zaidi kwa kuwa litajulikana kiurahisi maeneo lilipo.
    Alisema kuwa, kwa kupitia mradi wa SPANEST, Februari mwaka huu, Hifadhi ya Ruaha ilipata msaada wa vitendea kazi mbalimbali yakiwemo magari mawili ya doria yaliyotolewa na Shirika la Maendeleo ya Umoja wa Mataifa (UNDP) na kuongeza kuwa mpango huo wa kutoa msaada umewezesha zaidi kuimarika kwa ulinzi ndani ya hifadhi hiyo.
    Alisema, vifaa vya mawasiliano vitafungwa katika magari hayo na mengine ya hifadhi hiyo ili kuwezesha mawasiliano na uchukuaji wa hatua za haraka pale zitakapotokea taarifa tata kuhusiana na tembo hao ambapo Oktoba hadi Novemba mwaka jana, Wizara ya Maliasili na Utalii ilifanya sensa ili kuiwezesha serikali kutambua hali ya rasilimali ya wanyamapori ndani na nje ya maeneo yaliyohifadhiwa.
    Alisema kuwa, katika taarifa ya wizara hiyo inaonesha kwa kushirikiana na wataalamu wa ndani na nje ya nchi walifanya sensa katika maeneo ya mfumo wa ikolojia yenye tembo wengi ya Selous, Mikumi, Ruaha na Rungwa na kuwa matokeo hayo yanaonesha mfumo wa ikolojia wa Ruaha una tembo wengi kuliko hifadhi nyingine nchini ukiwa na tembo wapatao 20,090.
    Matokeo hayo yanaonesha kwamba mfumo wa Ikolojia wa Selous-Mikumi kwa sasa una tembo wapatao 13,084 wakati mwaka 1976 kulikuwa na tembo 109,419 ambapo, Meingíataki alisema juhudi za makusudi zinazofanywa na serikali ikiwa ni pamoja na kuimarisha doria na operesheni maalum mbalimbali zitasaidia kupunguza wimbi la ujangili.

     

  • Mvua zavuruga safari za Fastjet kwa muda

    Tuesday, April 15 2014, 10 : 39

    MVUA zinazoendelea kunyesha karibu maeneo mengi nchini zimesababisha kukwama kwa muda safari za ndani za ndege katika baadhi ya viwanja vya ndani.
    Kwa mujibu wa Ofisa Uhusiano wa Shirika la Fastjet, Lucy Mbogoro, baadhi ya safari za ndege zilikwama kwa muda juzi, kutokana na hali ya hewa iliyosababisha safari hizo kusitishwa kwa muda kwa sababu za kiusalama.
    Mbogoro alisema kwamba, katika safari hizo, walioathirika zaidi ni wale waliokuwa wakisafiri kati ya Kilimanjaro na Dar es Salaam ambapo safari hiyo ililazimika kufutwa juzi, hivyo kuomba radhi kwa usumbufu uliowapata wateja wao wote.
    Alisema hali ya hewa ilikuwa mbaya kutokana na mvua kubwa na njia za ndege katika viwanja kujaa maji, hivyo kulazimika kusitisha na hata kuahirishwa kwa muda baadhi ya safari.
    "Kutokana na hali hiyo, wateja wengi wa ndege zetu waliokuwa wakisafiri hasa kati ya Dar es Salaam na Kilimanjaro walikwama. Hata hivyo, kutokuwepo kwa mawasiliano ya moja kwa moja kati yetu na abiria kuhusu tatizo hilo na kusababisha wengi kufika bila kujua mabadiliko yaliyojitokeza, tunaomba radhi kwa hilo," alisema.
    Alieleza kwamba hata hivyo safari hizo zimeendelea kama ilivyopangwa jana, ambapo wasafiri waliokwama walipatiwa huduma na kusafirishwa kama ilivyopangwa.

  • VIBINDO: Kupanda ada za leseni kutazuia kukua kwa biashara ndogo

    Tuesday, April 15 2014, 10 : 40


    JUMUIYA ya Vikundi vya wenye Viwanda na Biashara Ndogo Ndogo Tanzania (VIBINDO), imeitaka Serikali kufikiri upya kuondoa ada za leseni au kuzipunguza hadi kufikia viwango ambavyo vitaruhusu biashara hiyo kukua.
    Taarifa iliyotolewa kwenye vyombo vya habari jana na Mwenyekiti wa Jumuiya hiyo, Gaston Kikuwi, alieleza kuwa viwango vilivyowekwa na Serikali kwa sasa si rafiki kwa wafanyabiashara ndogo ndogo kwani ni vikubwa mno.
    Alisema wafanyabiashara walio wengi wameonesha katika utafiti waliofanya, kupenda viwango visivyozidi sh. 20,000 mijini na sh.10,000 vijijini; na kwamba viwango hivyo vilipwe mara moja tu na si kila mwaka, ili kuwavuta wananchi wengi kuingia katika biashara iliyo rasmi.
    "Baada ya Serikali kurudisha ada za leseni za biashara, tumefanya utafiti na kugundua kuwa viwango hivyo vya sh. 50,000 kwa miji na halmashauri na wilaya sh. 30,000 na sh. 10,000 kwa wafanyabiashara wa vijijini, bila kujali kiasi cha mtaji alichonacho mtu, vitawandoa wengi na kuwafanya washindwe kujikimu kimaisha," alisema.
    Alisema mwaka 2003 Serikali iliondoa ada za leseni baada ya kuonekana kuwa ada hizo zilikuwa ni kero kubwa ambayo ilizuia malengo ya serikali ya kukuza biashara na hasa ndongo ndogo ili kuinua kipato cha mwananchi wa kawaida na kupunguza umaskini.
    Lakini mwaka 2011 Serikali ilianza tena mchakato wa kurudishwa ada hizo kupitia Sheria ya Fedha No. 5 ya mwaka 2011; na mwaka huo huo Serikali ilitunga sheria ya usajili wa Biashara iliyoruhusu mabadiliko ya ada hizo, ambapo biashara tofauti ziliwekewa ada tofauti, mijini (manispaa) wilayani na vijijini.
    Kikuwi alisema, cha kushangaza zaidi ni kwamba viwango hivi vilikuwa vikubwa zaidi ya vile vilivyokuwa vimerudishwa kupitia Sheria hiyo ya Fedha No.5 ya mwaka 2011, kitu kilichowafanya VIBINDO kufanya utafiti wa athari za ada hizi; na pia kujua viwango ambavyo wafanyabiashara ndogo ndogo wangependa vitumike.
    Alisema, utafiti huo ambao ufanyika katika jiji la Dar es Salaam, Mwanza, Morogoro, Manispaa ya Songea na Mjini Masasi, ulihusisha jumla ya wafanyabiashara ndogo ndogo na wa kati 616.
    "Asilimia 98 ya wafanyabiashara ndogondogo na wa kati waliohojiwa walieleza kutofurahishwa na kurudishwa kwa ada hizo na vilevile kupanda kwake, wakitoa sababu kuwa biashara zao nyingi zina mitaji isiyozidi sh. 200,000," alisema Kikuwi.
    Alisema kuwa, ada hizi za leseni ni sehemu tu ya mlolongo wa ushuru ambao wafanyabiashara ndogo ndogo na wa kati hulazimika kulipa ili kuweza kufanya biashara, ikiwa ni pamoja na ushuru wa soko, malipo ya kukodi duka,sehemu ya kufanyia biashara, ushuru wa usafi, malipo kwa ajili ya ulinzi, kodi ya mamlaka ya mapato, kodi ya huduma na malipo ya ukusanyaji taka.
    Alisema kuwa, duniani kote pamoja na ripoti ya Maendeleo Duniani ya mwaka 2005 zimeonesha kwamba kuweka mazingira mazuri ya kukuza ajira za uhakika na kuruhusu ukuaji wa biashara ndogo ndogo na za kati ni vitu mhimu iwapo serikali itadhamiria kuondoa umaskini katika jamii.
    "Pamoja na kwamba takwimu za mwaka 2012 za Wizara ya Viwanda na Biashara zinaonesha kuwa Tanzania ilikuwa na biashara ndogo na za kazi zinazofikia 3,100,000 utafiti wetu umebainisha kuwa endapo serikali haitafikiria kuondoa au kupunguza viwango hivi vipya vya ada za leseni, biashara ndogo ndogo na za kati 300,000 zimo hatarini kufungwa," alisema.
    Kufungwa kwa biashara hizi ambazo ni asilimia 10.3 ya wafanyabiashara waliohojiwa, kutaathiri sana maisha yao na ya familia na kuongeza kwa kiasi kikubwa tatizo la ukosefu wa ajira nchini.
    Kikuwi alisema kuwa utafiti wao umeonesha asilimia 34.5 ya wenye biashara wanapanga kupunguza wafanyakazi wapatao 1,800,000 endapo utekelezaji na urudishwaji wa viwango vipya vya ada utafanyika bila kuzingatia maombi ya wafanyabiashara hawa wanaotaka vipunguzwe.
    "Kulingana na utafiti huu uliofadhiliwa na BEST-AC, kufungwa kwa biashara hizi kutasababisha kupotea kwa mapato ya wafanyabiashara yanayofikia Tsh. 480 bilioni kila mwaka, huku serikali ikipoteza mapato yanayofikia Tsh. 60 bilioni kwa mwaka."

michezo na burudani

MANJI KUNG'OKA YANGA JUNI 15

Thursday, April 17 2014, 0 : 0


KLABU ya Yanga inatarajia kufanya Uchaguzi Mkuu wa viongozi wake wapya Juni 15, mwaka huu katika ukumbi utakaotangazwa baadaye.

Tayari Mwenyekiti wa Yanga  Yussuf Manji alishatangaza kuwa hatatetea tena nafasi hiyo na hivyo atawapisha watu wengine ili nao waongoze, ila alisema yale mazuri aliyoyaahidi atayafanya.

Kwa mujibu wa taarifa ya Yanga,  kikao cha Kamati ya Utendaji ya klabu hiyo kilichoketi Aprili 10, mwaka huu Makao Makuu ya klabu hiyo mitaa ya Twiga na Jangwani, kiliazimia Mkutano Mkuu wa Uchaguzi wa Yanga  ufanyike Juni 15, mwaka huu.

Hata hivyo, kuhusu taratibu nzima za mchakato wa uchaguzi, imeelezwa zitatangazwa baadaye na Mwenyekiti wa Kamati ya Uchaguzi ya klabu hiyo, Wakili Alex Mgongolwa.

Manji pamoja na uongozi wake waliingia madarakani Julai 14, mwaka juzi katika uchaguzi mdogo wa klabu hiyo uliofanyika kufuatia baadhi ya viongozi kujiuzulu, akiwemo aliyekuwa Mwenyekiti Wakili Lloyd Nchunga na Makamu wake, Davis Mosha na baadhi ya Wajumbe wa Kamati ya Utendaji.

Uongozi mpya ulioziba nafasi za viongozi waliojiuzulu mbali na Manji wapo Clement Sanga ambaye ni Makamu na Wajumbe Abdallah Bin Kleb na Mussa Katabaro.

Baada ya Yanga kufungwa mabao 3-1 na mtani wake Simba Desemba 21, mwaka jana katika mechi ya Nani Mtani Jembe, Manji aliwaambia wanachama wa klabu hiyo yeye hatagombea tena.

 

Yanga waanza kazi kumuua 'mnyama

Wednesday, April 16 2014, 8 : 50


KIKOSI cha Yanga kimeanza kujinoa kwa ajili ya mechi yao ya Jumamosi, ambapo waliweka kambi ya siku mbili mjini Moshi kwa ajili ya kujiandaa na mechi hiyo.
Simba na Yanga wanatarajia kukutana Jumamosi ijayo mechi yao ya Ligi Kuu ya Vodacom Tanzania Bara, ambayo ndiyo itakuwa ya kufunga msimu huu wa ligi hiyo.
Kwa mujibu wa Meneja wa Yanga, Hafidh Salehe, timu hiyo iliyokuwa Arusha katika mchezo wao na JKT Oljoro, iliamua kupiga kambi mjini Moshi ambapo jana walitarajiwa kucheza mechi ya kirafiki na timu ya Panoni ya Ligi Daraja la Kwanza mjini Moshi na leo itawasili jijini Dar es Salaam.
"Jana (juzi) timu ililala Moshi ambapo Kocha Mkuu Hans Pluijm ameamua tucheze angalau mechi moja ya kirafiki kabla ya kurejea jijini Dar es Salaa kwa ajili ya kuweka kambi kujiandaa na mechi yetu na Simba Jumapili," alisema Hafidh.
Katika mchezo wa Yanga na Oljoro mechi hiyo iliingiza sh.milioni 25 huku kila timu ikipata mgawo wa sh.milioni tano.
Naye Kocha Msaidizi wa Yanga, Boniface Mkwasa ametamba kwamba safari hii hawatakubali kufugwa tena na watani zao Simba, hivyo ni lazima wafute uteja na kuweka heshima.
Mara ya mwisho timu hizo kukutana ilikuwa ni Desemba 21, mwaka jana, ambapo Yanga walifungwa mabao 3-1 na mahasimu wao Simba katika mechi yao ya Nani Mtani Jembe iliyopigwa Uwanja wa Taifa, Dar es Salaam.
"Safari hii hatutakubali tena kufungwa kirahisi namna hiyo na Simba, tumejipanga vizuri na kikosi changu kipo fiti kwa ajili ya mechi hiyo ya kihistoria," alisema Mkwasa.
Alisema kwa kuwa wamekosa kutwaa ubingwa wa Bara, hivyo ni lazima wawape zawadi mashabiki wao kwa kuwafunga Simba katika mchezo huo unaotarajiwa kuwa mkali na uliojaa upinzani mkubwa.

  • SIMBA WAIVUKIA BAHARI YANGA

    Thursday, April 17 2014, 0 : 0

    KIKOSI cha Wekundu wa Msimbazi Simba kimeondoka jana jijini Dar es Salaam kwenda visiwani Zanzibar kwa ajili ya kuweka kambi kujiandaa na mechi yao ya keshokutwa dhidi ya Yanga.

    Mechi hiyo ya kufunga Ligi Kuu ya Vodacom Tanzania Bara inatarajiwa kupigwa Uwanja wa Taifa, Dar es Salaam. Tayari Azam FC wametwaa ubingwa huo baada ya kufikisha pointi ambazo hakuna timu yoyote inayoweza kuzifikia.

    Akizungumza Dar es Salaam jana, Msemaji wa Simba Asha Mhaji alisema kikosi cha Simba kiliondoka kikiwa na wachezaji 18 pamoja na benchi nzima la ufundi kwa lengo la kujiandaa na mchezo huo uliojaa upinzani mkali.

    "Wachezaji wote walioondoka wapo katika hali nzuri na wameahidi kufanya mazoezi makali kuhakikisha wanaondoka na ushindi katika mechi hiyo ambayo kwa upande wao wanataka kuendeleza ubabe kwa mtani wao huyo," alisema Asha.

    Aliwataja wachezaji walioondoka kuwa ni Ivo Mapunda, Yaw Berko, Issa Rashid 'Baba Ubaya', Joseph Owino, Donal Musoti, Said Nassoro 'Chollo', Humud  Abdulhalim, Awadh Juma, Uhuru Seleman, Zahoro Pazzi, William Lucian na Said Ndemla.

    Wengine ni Ramadhan Singano 'Messi', Amis Tambwe, Amri Kiemba, Hanoun Chanongo na Jonas Mkude, pia wapo Kocha Mkuu Zdravko Logarusic, msaidizi wake Suleiman Matola, Moses Basena, daktari wa timu na mtunza vifaa.

    Asha alisema lengo kubwa ni kuibuka na ushindi katika mchezo huo kwani wanaamini utakuwa mgumu kwa kuwa mahasimu wao Yanga watataka kulipiza kisasi, hivyo na wao hawatakubali kufungwa na badala yake watacheza kufa au kupona ili washinde.

    Katika mechi ya Ligi Kuu ya mzunguko wa kwanza timu hizo zilitoa sare ya mabao 3-3, kabla ya mechi yao ya Nani Mtani Jembe ambayo Simba walishinda mabao 3-1.

  • Azam FC wawateka mashabiki Dar

    Wednesday, April 16 2014, 9 : 30

    JANA shamrashamra kutoka kwa mashabiki wa Azam FC zilitawala katika Uwanja wa Ndege wa Kimataifa wa Mwalimu Julias Nyerere, ambapo mashabiki hao walijitokeza kwa wingi kuupokeza msafara wa mabingwa hao wapya wa Ligi Kuu Tanzania Bara.
    Azam imefanikiwa kutwaa ubingwa huo Jumapili iliyopita baada ya kuifunga Mbeya City mabao 2-1 katika mchezo wa ligi uliofanyika katika uwanja wa Sokoine jijini Mbeya. Mechi hiyo ndiyo iliyowapa ubingwa Azam.
    Pamoja na ubingwa huo, Azam watakuwa na raha zaidi baada ya rufaa ya Yanga ambayo waliikatia Mgambo JKT, itakapotupwa. Hata hivyo kocha wa Azam Mcameroon Joseph Omog amewataka wachezaji wake kuhakikisha wanaifunga JKT Ruvu ili washerehekee ubingwa wao bila hofu.
    Yanga iliikatia rufaa Mgambo JKT kupitia mchezaji wake Mohamed Neto ambaye anadaiwa si raia wa Tanzania na hana kibali cha kufanya kazi nchini.
    Suala la Yanga tayari lipo mezani kwa ajili ya kujadiliwa na kamati ya sheria na hadhi za wachezaji.
    Uongozi wa Azam FC umeandaa sherehe kubwa ya kuwapongeza wachezaji wao, ambapo Jumapili ijayo wanakabidhiwa kombe lao kwa mara ya kwanza tangu timu hiyo kupanda daraja mwaka 2008.
    Hata hivyo kocha wa Azam aliwataka wachezaji wake wasibweteke na ubingwa huo na badala yake, wajitahidi mechi yao ya mwisho ili waibuke washindi na kunogesha sherehe zao.
    Alisema msafara wa timu hiyo uliwasili kwa ndege ya Fast Jet saa 12:00 jioni juzi na kupokewa na mamia ya wapenzi wake kabla ya kupanda basi lao la kisasa kuelekea makao yao makuu, Azam Complex, Chamazi, Dar es Salaam.
    Azam imefikisha pointi 59 ikiwa na mchezo mmoja mkononi ambazo haziwezi kufikiwa na timu yoyote baada ya mechi za mwisho zitakazochezwa Jumamosi.
    Nafasi ya pili ya ligi inashikiliwa na Yanga yenye pointi 55 huku Mbeya ikishika nafasi ya tatu baada ya kukusanya pointi 46.
    Licha ya kuwa timu ya kwanza kuifunga Mbeya City kwenye Uwanja wake wa nyumbani Azam FC pia inakuwa timu ya kwanza nje ya Simba na Yanga kutwaa ubingwa wa Bara tangu mwaka 2000 Mtibwa Sugar ilipofanya hivyo.

  • Baada ya ushindi, PacMan sasa anamtaka Mayweather

    Wednesday, April 16 2014, 9 : 26


    MANNY Pacquiao (PacMan) anamatumaini ya kupata nafasi ya kucheza katika pambano linalosubiriwa kwa hamu kubwa na mashabiki wa ndondi duniani dhidi ya bondia wa Marekani ambaye hajawahi kudundwa, Floyd Mayweather, baada ya kushinda mkanda wa dunia wa WBO wa uzito wakati.
    Pacquiao (35), kutoka Ufilipino mwishoni mwa wiki alimshinda mpinzani wake, Timothy Bradley, kwa pointi .
    Kwa mujibu wa BBC, Pacquiao, ambaye ameshinda mataji ya dunia katika uzito wa madaraja manane, alizungumzia kuhusu pambano lake dhidi ya Mayweather, ambaye ni bingwa anayetambuliwa na WBC, akisema: "Nafasi iko wazi saa 24, siku saba kwa wiki".
    "Kama anataka kupigana, pambano litakuwepo. "
    Pacquiaona Mayweather, 37, kwa kawaida wanadhaniwa kuwa mabondia bora zaidi wa kizazi chao.
    Hata hivyo, kambi zao hazijafikia makubaliano kuhusu pambano la mabondia hao, kikwazo kimojawapo kikiwa msisitizo wa Mayweather kutaka programu ya kupimwa damu wakati wa mazoezi.
    Pacquiao anatarajia mwezi huu baadaye kupambana na mshindi kati ya Juan Manuel Marquez na Mike Alvarado, ambao watakutana Mei 17.
    Pacquiao amepigana na Marquez mara nne na alipigwa katika pambano lao la mwisho na bondia huyo wa Mexico, Desemba 2012.
    Mayweather ataingia ulingoni Mei 3 kumkabili Marcos Maidana wa Argentina akiwa na rekodi ya kutopigwa mapambano 45 katika uzito wa kati wa dunia.

  • Stars: Hatuna sababu ya kufanya vibaya

    Wednesday, April 16 2014, 9 : 15


    BENCH Ila Ufundi la timu ya Taifa, Taifa Stars limesema halina sababu yoyote ya kutofanya vizuri, katika michuano mbalimbali ya kimataifa ikiwemo ile ya AFCON, kwani mazingira yaliyowekwa na mdhamini wao Kilimanjaro Premium Lager yanaridhisha.
    Hayo yalisemwa kupitia Mwalimu Danny Korosso ambaye yuko mjini Tukuyu kuwekan guvu katika kambi ya marekebisho ya Taifa Stars, ambapo wachezaji kutoka mikoa mbalimbali wameweka kambi na baadaye wiki hii watachujwa ili watakaobaki wajiunge na wachezaji wa timu ya Taifa ambapo mchujo utafanyika tena.
    Akizungumza kwa niaba ya benchi zima la ufundi, Korosso aliwaambia wawakilishi wa Kampuni ya Bia Tanzania, mkoani Mbeya kuwa uwekezaji wa TBL kwa Taifa Stars kupitia bia ya Kilimanjaro Premium Lager ni mkubwa mno na unawafanya wakose sababu ya kutofanya vizuri kwani wamepewa kila kitu .
    "Tumepewa kila tunachohitaji kufanya mazoezi na sasa kazi imebakia kwetu kufanya bidii ili tupate timu nzuri na matokeo mazuri," alisema.
    Viongozi wa TBL Mkoa wa Mbeya walienda kambini kuwajulia hali wachezaji hao wapya na kuzungumza nao ili kuwapa moyo hasa wanapokaribia kwenye mchujo.
    Naye Meneja wa Usambazaji na Mauzo wa TBL Kanda ya Nyanda za Juu Kusini, Vivianus Rwezaura aliwaomba wachezaji hao ambao baadhi wanatarajiwa kujiunga na timu ya Taifa wawe na uzalendo kwani Taifa zima linawaangalia na linamatarajio kutoka kwao.
    "Mojawapo ya sababu ambazo Kilimanjaro Premium Lager iliamua kudhamini Taifa Stars ni kuimarisha uzalendo," alisema huku akiwaomba wachezaji wote kufanya bidii ili wachaguliwe.
    Naye nahodha wa muda wa kikosi hicho, Paulo Bundala aliwaahidi wadhamini kuwa watafanya kila wawezalo kuhakikisha hawawaangushi Watanzania.
    "Tutafanya bidii ili tuwafurahishe Watanzania, walimu wetu na familia zetu pia," alisema huku akishangiliwa na wachezaji wenzake 33 waliopo kambini katika hoteli ya Land Mark Tukuyu.
    Wachezaji hao wako katika wiki ya nne sasa ambayo ndiyo ya mwisho kabla yamchujo wa kwanza unaotarajiwa kufanyika mwishoni mwa wiki hii.
    Wachezaji watakao chaguliwa watajiunga na Taifa Stars kubwa Jijini Dar es Salaam kwa kambi ya wiki moja ambapo mchujo mwingine utafanyika ili ipatikane timu moja kamili ya Taifa ambayo itakuwa imara zaidi.
    Kilimanjaro Premium Lager imewekeza zaidi ya dola milioni mbili kila mwaka kudhamini timu ya Taifa na wa dhamini hao wanaunga mkono zoezi la TFF la kutafuta vipaji vipya kwa Taifa kupata mafanikio zaidi.