baadhi ya wananchi wakivuka mto malagarasi upande wa burundi kuingia tanzania hivi karibuni.
ofisa usimamizi shirikishi wa msitu wa shirika lisilo la kiserikali la farm africa, ernest rumisho akipanda mti kuadhimisha wiki ya upandaji miti.

kitaifa

Utoaji elimu bure wageuka kizaazaa

Thursday, May 5 2016, 0 : 0

 

MADIWANI wa Manispaa ya Kinondoni wametilia shaka hatua ya serikali kutangaza elimu bure wakati kiasi cha fedha kinachotengwa kwa ajili ya utekelezaji wa sera hiyo ni kidogo.

Madiwani hao bila kujali itikadi za vyama vyao, walitoa kauli hiyo jana jijini Dar es Salaam wakati wa kikao cha Baraza la Madiwani ya Halmashauri ya Kinondoni.

Eprahim Kinyafu, ambaye ni Diwani wa Kata ya Saranga kwa tiketi ya Chama cha Demokrasia (CHADEMA) alisema kiasi cha sh. bilioni 4 zilizotengwa na halmashauri hiyo kwa mwaka kwenda kusaidia elimu bure ni kidogo, hakiwezi kukidhi mahitaji ya wanafunzi.

Alisema kiasi hicho kidogo kimewafanya walimu kushindwa kuwahahudumia wanafunzi, huku akitolea mfano kiasi kidogo cha sh.300,000 kinachotegwa kwa ajili ya kila shule ili kulipa walinzi.

Naye Diwani wa Kata ya Mwananyamala, Songoro Mnyonge (CCM) alisema kama Rais John Pombe Magufuli, hatabadili msimamo wa sera yake ya elimu bure, basi ufaulu wa wanafunzi utaporomoka sana kutokana na fedha zinazotolewa kuwa kidogo.

Katika kikao hicho ilielezwa kwamba kila mwezi Hazina hutuma sh.548 kwa ajili ya kila mwanafunzi, fedha ambayo pia haifiki kwa wakati shuleni na kufanya mahitaji ya muhimu kukosekana, huku Rais Magufuli akisisitiza wazazi kutochangishwa.

Mahitaji muhimu kwenye shule ni chaki, posho ya walinzi, maji kwa ajili ya matumizi ya vyoo, umeme, steshenari na vitu vingine.

Aidha ilielezwa kuwa kwa kawaida kila mwanafunzi anatakiwa kupata sh. 10,000 kwa mwaka, lakini shuleni zinafika sh. 6,000 huku sh. 4,000 zikienda TAMISEMI kwa ajili ya kununulia vitabu.

Diwani wa Kunduchi, Michael Urio, alisema kuwa majibu kutoka kwa watendaji wa Halmashauri kila siku hayaridhishi na yamekinzana sana kutokana na usiri uliogubika fedha hizo na kuwataka watendaji hao kutoa taarifa ya fedha hizo kila mara kwenye vikao vya Baraza hilo.

"Majibu hayo ya mkurugenzi hayaridhishi kutokana na taarifa zake kugubikwa na usiri mkubwa, tunaomba kuanzia sasa tuwe tunapewa kila mara ili tukienda kukagua huko shuleni tuweze kusimamia vizuri," alisema Urio.

Aidha, madiwani hao wameeleza kuwa shule nyingi katika Manispaa ya Kinondoni zinakabiliwa na uhaba wa vyoo na nyingine zimeshafungwa katika Kata ya Makuburi kutokana na uhaba wa matundu ya vyoo na wanashangaa Serikali inaangalia madawati tu.

Pia alisema kuwa kuna baadhi ya Shule madarasa hayana milango na nyingine katika Kata ya Goba hazina madarasa na hivyo kufanya wanafunzi kusoma wakiwa chini ya Mwembe.

MIUNDOMBINU

Katika hatua nyingine madiwani hao wameonesha kutokuwa na imani na makandarasi kutokana na barabara nyingi kujengwa chini ya kiwango huku wakilipwa fedha zote za miradi.

Songoro Mnyonge alisema katika Kata yake kuna Barabara ina miaka sita sasa ya urefu wa mita 800 hadi sasa haijakamilika, huku wananchi wakiwa hawajui kwa nini mkandarasi huyo hamalizi ujenzi wa barabara hiyo.

Naye Kinyafu Diwani wa Saranga alisema kuna barabara ya kilomita saba inayounganisha kata ya Saranga na Kimara mkandarasi hajamaliza mpaka na ameitelekeza barabara hiyo, huku akiwa amelipwa fedha zote sh.milioni 400.

Mzazi alalamikia kipigo cha muuguzi

Tuesday, May 3 2016, 0 : 0

 

MKUU wa Mkoa wa Mbeya, Amos Makalla, ameupa siku saba uongozi wa Hospitali ya Rufaa ya Wazazi ya Meta, mkoani humo, kuyafanyia uchunguzi malalamiko ya mzazi anayedai kupigwa kibao na muuguzi wakati akijifungua hospitalini hapo.

Mzazi huyo Salome Waya, mkazi wa Swaya, Wilaya ya Mbeya Vijijini, alitoa malalamiko hayo jana kwa Makalla ambaye alifanya ziara ya kushtukiza katika hospitali hiyo.

Katika maelezo yake, Waya alidai mbali na kupigwa kibao, baada ya kujifungua muuguzi huyo alimtupia mtoto aliyemzaa kifuani kwake jambo ambalo lilihatarisha uhai wa mwanaye.

"Nimefanya ziara ya kushtukiza na kuwakuta akina mama wamelala chini ya uvungu wa vitanda kutokana na ufinyu wa wodi, uhaba wa vitanda... pia nilimkuta mama aliyeshikwa na uchungu akilia huku muuguzi wa kumhudumia akipiga stori bila kumsaidia.

"Nimepokea matukio makubwa mawili, moja ni taarifa ya muuguzi kumpiga kofi mjamzito wakati akijifungua, tukio lingine ni muuguzi kupiga stori wakati mama mwenye uchungu akilia bila kusaidiwa," alisema Makalla.

Akizungumzia tukio la kupigwa kofi, Waya alisema alifika hospitalini hapo Aprili 28, mwaka huu; wakati akiwa katika harakati za kujifungua, muuguzi huyo alimpiga kofi usoni, baada ya kujifungua, alimchukua mtoto na kumtupia kifuani kwake.

"Huyu muuguzi alinifanyia unyama ambao umeniumiza sana moyoni, nikiwa katika hatua za kujifungua alinipiga kofi, baadaye alimchukua mtoto na kumbamiza kifuani kwangu akisema mtoto uliyekuwa unamtaka huyo hapo," alisema Waya.

Baada ya maelezo hayo, Makalla alisema vitendo vilivyofanywa na muuguzi huyo ni ukiukwaji wa maadili ya kazi; hivyo Serikali haiwezi kuwavumilia watumishi wa aina hiyo waendelee kufanya kazi na watu wanaosababisha jamii iichukie Serikali.

Alimtaja muuguzi anayetuhumiwa kuwa ni Beatrice Sanga na kusisitiza kuwa, Serikali itawachukulia hatua watu wachache wanaoharibu taswira ya taasisi za umma kwa kukiuka maadili.

Hata hivyo, Makalla aliwapongeza madaktari wa hospitali hiyo kwa kutoa huduma nzuri isipokuwa tatizo lipo kwa wauguzi ambao wanalalamikiwa kwa lugha chafu wanazotoa kwa wagonjwa.

Aliutaka uongozi wa hospitali hiyo kubandika namba yake ya simu katika eneo la mapokezi ili wagonjwa wasipohudumiwa vizuri waweze kumpigia simu moja kwa moja ili aweze kuchukua hatua.

Mwanamke mwingine mkazi wa Sumbawanga, mkoani Rukwa, Krista Katembo aliyelazwa katika wodi namba mbili hospitalini hapo, alisema hali ni mbaya katika wodi hiyo kutokana na wagonjwa kulala chini ya uvungu wa vitanda.

"Hiki chumba ni kidogo, hakuna vitanda hivyo tunalazimika kulala chini ya uvungu wa vitanda, wote tuliopo hapa watoto wetu wapo katika chumba cha joto hivyo mazingira ni magumu," alisema.

Naye Mkurugenzi wa hospitali hiyo, Dkt. Godlove Mbwanji, alisema wamepokea maagizo hayo ambayo watayafanyia kazi kwa kuunda tume na kutoa taarifa haraka iwezekanavyo.

"Nia yetu ni kufanya kazi kwa weledi ili kutoa huduma bora kwa wagonjwa, katika mazingira kama haya hatuwezi kutetea uovu bali tutahakikisha tatizo hili tunalikomesha," alisema.

  • Askari JWTZ adaiwa 'kuwapiga' polisi

    Thursday, May 5 2016, 0 : 0

     

    ASKARI anayedaiwa kuwa ni wa Jeshi la Wananchi wa Tanzania (JWTZ) mwenye cheo cha Koplo (jina halijafahamika), akishirikiana na mgambo 30, anadaiwa kuwapiga na kuwadhalilisha askari polisi wawili wa Kituo Kikuu cha Polisi Kati Wilaya ya Nyamagana, PC Meck na PC Alfred.

    Tukio hilo lilitokea Aprili 29, mwaka huu majira ya saa 4:30 asubuhi nje ya ofisi ya Mshauri wa mgambo iliyopo jirani na Mahakama za Mwanzo Mwanza mjini na Mahakama ya Wilaya ya Nyamagana.

    Katika tukio hilo mmoja wa askari hao, PC Meck, alijeruhiwa mdomoni na kuchaniwa shati, huku mwenzake akijeruhiwa kwenye paji la uso baada ya kupigwa kwa chepe.

    Chanzo cha kupigwa kwa askari hao wa Idara ya Upelelezi Wilaya ya Nyamagana hakijafahamika, tukio ambalo lilisababisha shughuli za mahakama kusimama kwa dakika 20 wakati askari hao wakipokea kipigo kutoka kwa askari huyo anayedaiwa ni wa JWTZ akishirikiana na mgambo.

    Kabla ya kipigo hicho mmoja wa askari hao PC Kibavu, aliambiwa na mgambo aliyefahamika kwa jina moja la Juma kuwa anaitwa na Koplo huyo wa JWTZ ambapo PC Kibavu aliondoka akiongozana na wenzake (Meck,Alfred na Magembe).

    Walipofika askari huyo aliwahoji wao ni nani na wakajitambulisha, lakini akawafukuza akidai anataka kubaki na PC Kibavu,wakaondoka ndipo ghafla askari huyo akamfuata PC Meck na kumshika mkono na katika kujinasua ndipo akampiga ngumi mdomoni.

    Chanzo hicho kilizidi kueleza kuwa askari huyo wakati akimtembezea mkong'oto aliwaita mgambo waliokuwa eneo hilo wampeleke bombani PC Meck wakammwangie maji, lakini alipokataa alipigwa na kuchaniwa shati lake na askari huyo akisaidiana na baadhi ya mgambo hao.

    Kutokana na kadhia hiyo iliyosimamisha shughuli za mahakama Mshauri wa Jeshi la Akiba Mkoa wa Mwanza Ally Selemani alitoka nje ya ofisi na kuhoji kilichojiri ambapo aliwaita ofisini kwake (PC Meck, PC Alfred, PC Kibavu na Koplo Magembe) kwa usuluhishi.

    Selemani alimuomba PC Meck akubali kulipwa fidia ili suala hilo liishe kwa sababu akifungua jalada itakuwa aibu kwa majeshi yote, lakini alikataa ushauri huo na kutaka sheria ichukue mkondo wake kwani yeye kama askari amefanyiwa hivyo raia wa kawaida atatendewa nini.

    Katika kikao hicho Mkuu wa wa Polisi wa Wilaya hiyo aliwakilishwa na Mkuu wa Kituo cha Nyamagana ASP Ignus Kapira, Sajini Bwire na kiongozi wa askari hao Koplo Magembe pamoja na maofisa wa JWTZ na kutokana na msimamo wa askari huyo mwafaka haukupatikana ambapo pia ASP Kapira alieleza hana cha kuzungumza na kuomba akutane na OC-CID kuona atasema nini juu ya tukio hilo.

    Kutokana na kipigo hicho kutoka kwa askari huyo wa JWTZ ,PC Meck na PC Alfred wamefungua jalada lenye namba RB/MZA/5277/ 2016 la shambulio la kudhuru mwili lakini walikataa kuingia kwa undani zaidi ingawa walisisitiza sheria ichukue mkondo wake.

    "Mwanzo tulikataliwa tusifunge jalada ingawa tulipewa fomu namba tatu ya matibabu (PF3) tukaenda kutibiwa. Nimepoteza kitambulisho cha kazi ambacho askari huyo wa JWTZ alikichukua kutoka mfuko wa shati langu akakifinyangafinyanga. Sikubali kupigwa halafu ulipwe fidia ni udhalilishaji, kinachotakiwa sheria ichukue mkondo wake," alisema PC Meck.

    Juzi Kaimu Kamanda wa Polisi wa Mkoa wa Mwanza Zarau Mpangule alipoulizwa kwa njia ya simu kuwepo kwa tukio la kupigwa askari wake wawili wa idara ya upelelezi Nyamagana alisema, hana taarifa za tukio hilo na akaomba awasiliane na OCD Nyamagana kisha atatoa majibu.

    Akizungumza kwa simu na gazeti hili juzi Mshauri wa Mgambo, Ally Selemani alikanusha kupigwa kwa askari polisi hao na akaeleza kuwa kulitokea mtafaruku kati ya Juma, Mgambo mwenye cheo cha Koplo ambaye alikuwa akidaiana na mmoja wa askari hao.

    "Sikumbuki kitu kama hicho kilitokea na ni kawaida watu kujazana hapa maana ni sehemu ya mahakama, ila kulikuwa na kuzozana kati ya mgambo na mwingine ambaye ni askari polisi,walikuwa wakidaiana na walivaa kiraia."

  • NHIF yapewa siku 14 kulipa watoa huduma

    Thursday, May 5 2016, 0 : 0

     

     

    SERIKALI imetoa siku 14 kwa Mfuko wa Taifa wa Bima ya Afya (NHIF) kulipa madai ya watoa huduma za afya ili waweze kupewa kipaumbele kwenye utoaji wa huduma.

    Agizo hilo lilitolewa jana na Waziri wa Afya, Maendeleo ya Jamii, Jinsia, Wazee na Watoto, Ummy Mwalimu wakati akizindua kituo cha matibabu kilichopo katika Hospitali ya Rufaa mkoani Dodoma.

    Alisema wamekuwa wakipokea malalamiko juu ya wagonjwa wa kadi kuwekwa pembeni na kuambiwa wasubiri, huku wenye fedha taslimu wakipewa kipaumbele cha huduma.

    "Nimepata taarifa kuwa wagonjwa wenye bima za afya pindi wanapohitaji kupata huduma ya matibabu wamekuwa wakibaguliwa kisa hawana pesa ya kulipa hapo kwa hapo, na wanaopewa kipaumbele ni wale ambao hawana bima za afya, tabia hiyo ife.

    "Inawezekana hali hiyo inatokana na kuchelewa kwa malipo kwa watoa huduma kwani nimearifiwa kuwa malipo ya watoa huduma ndani ya Mfuko wa NHIF huchukua siku 45, hapa nataka siku 14 muwe mmelipa," alisema waziri Mwalimu.

    Hata hivyo, aliwataka wahudumu kutoa kipaumbele kwa watu ambao wana bima ya afya ili kuwafanya watu wengine kujiunga na mifuko hiyo.

    Mbali na hiyo waziri huyo amekitaka kituo hicho kutumia mashine ya kielektroniki katika suala la ukusanyaji wa mapato ili kuweza kulipa deni la shilingi bilioni 6.2 ambazo zimetumika kujengea kituo hicho.

    "Ukusanyaji wa mapato katika kituo hiki lazima yasimamiwe vizuri ili tuweze kulipa deni ambalo tunadaiwa na Mfuko NHIF," alisema Ummy.

    Alisema kuwa asilimia 50 ya ukusanyaji mapato katika kituo hicho yatumike kununulia dawa ili kuondokana na dhana ya wananchi kuacha kujiunga katika mifuko hiyo wakidai kuwa upatikanaji wa dawa ni hafifu.

    "Ili kuwahamasisha zaidi wananchi kujiunga na mifuko hii lazima upatikanaji dawa uwe mzuri na hivyo asilimia 50 ya mapato ya kituo hiki muyatumie kununulia dawa," alisema Ummy.

    Kwa upande wake Kaimu Mkurugenzi Mkuu wa NHIF, Bernard Konga alisema kuwa ili kuweza kukifanya kituo kuwa endelevu na kiweze kuleta matokeo ya kuigwa na vituo vingine ni lazima fedha za uchangiaji zinazopatikana kutokana na huduma inayotolewa zitumike kuboresha huduma.

    "Sisi kama NHIF tutawasilisha mapendekezo yetu Wizarani kuhusu eneo hili na tunayo imani kuwa fedha hizo ambazo zitalipwa kwa mabilioni katika vituo vya matibabu kama zitatumika vizuri tutaondokana na changamoto nyingi zilizopo sasa," alisema Konga.

  • Wauguzi wanne Amana wachukuliwa hatua

    Thursday, May 5 2016, 0 : 0

     

    HALMASHAURI ya Manispaa ya Ilala imewachukulia hatua za kinidhamu wauguzi watatu wa Hospitali ya Rufaa ya Mkoa Amana kwa kutoa lugha chafu kwa wagonjwa.

    Hayo yalisemwa na Mganga Mkuu wa Manispaa ya Ilala,Dkt.Victoriana Ludovick, Dar es Salaam jana, wakati wa akizungumza na waandishi wa habari kuhusiana na malalamiko mbalimbali kutoka kwa wagonjwa na mitandao ya kijamii.

    "Machi 23 mwaka huu Mzazi Asha Sudi mwenye umri wa miaka 17 alijifungulia chooni na Machi 30 mwaka huu katika mitandao ya kijamii kulichapishwa taarifa za kifo cha mtoto kilichosababishwa na kucheleweshwa kupata huduma, Mariamu Hassan, ambapo watumishi hao wameweza kuchukuliwa hatua za kinidhamu na mwajiri kwa mujibu wa taratibu za utumishi wa umma,"alisema Ludovick.

    Alisema wauguzi hao wamechukulia hatua kwa mujibu wa taratibu za utumishi ikiwemo kupelekwa katika mabaraza kwa ajili ya uchunguzi.

    Victoriana aliwataka wauguzi wake kutumia lugha nzuri kwa wagonjwa wakiwa kazini katika kutekeleza majukumu yao kwani wanategemewa na jamii na Taifa kwa ujumla.

    Wakati huo huo, Mganga Mkuu wa Hospitali ya Mkoa Amana,Dkt. Meshack Shimwela, alitoa ufafanuzi kwa umma kuhusiana na utata kuhusu tukio la dereva wa bodaboda, Nassor Hamisi (23) aliyefariki Aprili 29, mwaka huu kwa jeraha la kupigwa risasi ya paja na majambazi na kupoteza maisha akipatiwa huduma za matibabu.

    Shimwela alisema kifo cha dereva wa bodaboda, Nassoro Hamisi kimetoka na mshipa mkubwa wa damu kuvunjika, hivyo alipoteza damu nyingi pia alichelewa kufikishwa kupatiwa huduma za matibabu.

    "Marehemu,Nassoro Hamisi alipata tatizo lake saa nne usiku la kupigwa risasi na kufikishwa katika Hospitali ya Mkoa Amana saa sita na nusu usiku hali ambayo ilionesha amepoteza damu nyingi sana njiani," alisema Dkt.Shimwela.

    Aliwaomba wananchi kufuata utaratibu wa rufaa kwani mgonjwa huyo aliacha vituo vingi njiani ikiwemo zahanati ya Mongolandege ambapo angeweza kupata huduma za awali na hasa kuzuia damu kuendelea kutoka. Aidha, alisema wauguzi wake wote wana elimu ya kutosha na hakuna daktari anayependa mgonjwa afe akipewa huduma za matibabu aliwataka wananchi watumie taratibu za kwenda katika vituo vya afya vya Ilala vilivyo karibu vyote dawa zipo.

    Kwa upande wake Kaimu Ofisa Habari Ilala,David Langa alisema Amana kuna ofisi ya malalamiko ambapo kuna Maofisa Ustawi wa Jamii wanne wanapokea kero kwa saa 24, hivyo wananchi wanapewa fursa hiyo kupeleka malalamiko yao.

    Langa alisema ili kuepusha usumbufu uliokuwa ukijitokeza aliwaomba wananchi wafuate utaratibu ikishindikana wasisite kufika ngazi ya manispaa kwa Mganga Mkuu na Mkurugenzi wa Ilala.

  • ACT-Wazalendo yaonya Na Grace Ndosa utumbuaji wa majipu

    Thursday, May 5 2016, 0 : 0

     

    MWENYEKITI ACT Mkoa wa Dar es Salaam, Hamisi Chambuso, ameshauri utumbuaji wa majipu unaoendelea sasa ufanyike kwa haki ili wasiohusika waendelee kubaki salama.

    Alitoa kauli hiyo waka t i akizungumza na waandishi wa habari Dar es Salaam jana.

    Alisema utumbuaji wa majipu unaoendelea kwa watendaji wasiokuwa waadilifu. Chambuso alisema utumbuaji huo uendelee lakini si kwa kuwaonea wale ambao hawahusiki.

    "Si tu kutumbua, bali ni nani anatumbuliwa? Hivyo basi waangaliwe wale wote wanaofanya vibaya kwenye utendaji kazi wao ndio watumbuliwe na si kufanya uonevu kwa wengine ambao hawafai kutumbuliwa,"alisema Chambuso.

    Kuhusu watu waliovunjiwa nyumba zaidi ya 400, huko Kibamba na kutakiwa kuondoka katika maeneo yao,alisema ni vyema suala hilo likaingiliwa kati na Mkuu wa Mkoa wa Dar es Salaam, Paul Makonda.

    "Tunaomba Makonda awatazame watu hawa wa Kibamba na Mloganzira kwa kuwatafutia viwanja, kwani wameondolewa katika maeneo yao isivyo halali," alisema.

    Aliyekuwa mgombea Ubunge Jimbo la Mbagala, Soud Rajabu, alisema chama chake pamoja na mambo mengine, kinatoa pongezi kwa wananchi na wapenzi wa chama hicho kwa kuwachagua madiwani 36 na mbunge mmoja wa Manispaa ya Kigoma.

    Rajab ambaye pia ni Katibu Mwenezi na Mawasiliano Mkoa wa Dar es Salaam kutoka ACT-Wazalendo, aliwawashukuru waandishi wa habari kwa kuwa wazalendo katika kutoa taarifa zao na kusema kuwa katika kutumbua majipu, UKAWA nao wasikae kimya bali nao watekeleze majukumu yao.

    Katibu wa ACT-Wazalendo, Ernest Kalumuna, alisema chama chake kimekuwa kikipenda zaidi kushirikiana na wananchi wake, hivyo katika maadhimisho hayo ndiyo maana kimeamua kujitolea damu kuanzia viongozi hadi wanachama ili wananchi watambue kwamba chama hicho ni cha wazalengo kweli.

    Alisema kutokana na utaratibu huo, ndiyo maana ACT-Mawazalendo imeadhimisha miaka miwili tangu kuanzishwa kwake kwa kujitolea damu.

    Akizungunza kwenye maadhimisho ya miaka miwili yaliyofanyika Wilaya ya Temeke jana, Mwenyekiti wa ACT-Wazalendo, Mkoa wa Dar es Salaam, Hamis Chambuso, alisema kuwa lengo la kuchangia damu ni ili wananchi watambue kwamba chama hicho kipo kwa ajili wananchi.

    Daktari kutoka Kitengo cha Damu Salama, Mariam Abubakari, alisema kuwa anawashukuru wananchi na viongozi wa chama hicho kwa kujitolea kutoa damu, kwani kufanya hivyo kutasaidia kitengo hicho kuwa na damu ya kutosha.

    "Hata kama hatujafanya tathimini, lakini inatia moyo kwa hawa waliojitokeza kutoa damu tunaomba na wengine waendelee kujitokeza zaidi kufanya kama hawa walivyofanya ili damu iweze kuongezeka," alisema.

    Wakati huo huo, Chama cha ACT-Wazalendo kimeadhimisha miaka miwili ya kuanzishwa kwake ambapo pamoja na mambo mengine, viongozi wa mkoa na wanachama wa chama hicho wamejitolea damu lengo likiwa ni kuwasaidia wajawazito na wale wanaopata ajali.

kimataifa

Rais Obama akataa kuivamia kijeshi Syria

Monday, April 25 2016, 0 : 0

 

 

RAIS wa Marekani, Barack Obama, amesema kuwa, itakuwa ni makosa makubwa kwa mataifa ya Magharibi kutuma majeshi yao hadi nchini Syria ili kumuondoa madarakani Rais wa Syria, Bashar al-Assad.

Akizungumza na BBC,Rais Obama alisema itakuwa ni makosa makubwa kuwatuma wanajeshi wa nchi kavu nchini Syria kumpindua Rais Assad kwa sababu hilo pekee halitasuluhusiha matatizo ya Syria.

Rais huyo wa Marekani alisema kuwa haina maana kwa makundi ya waasi kama vile Dola la Kiislam (IS)ndani ya Syria, kuendelea na makabiliano huku akisema kuwa jeshi la taifa hilo pekee lafaa kukomesha mapigano nchini humo.

Aliongeza kuwa ni muhimu kuendelea kushambulia ngome za IS ndani ya Syria kwa pamoja na kuzidisha juhudi za kumaliza mapigano ya wenyewe kwa wenyewe ya muda mrefu nchini humo.

Katika mahojiano hayo Rais Obama alisisitiza hitaji lake kuwa matatizo ya kimataifa yanahitaji uwajibikaji wa muda baada ya muda.

Obama alisema kuwa itakuwa vigumu kwa majeshi yake ama hata muungano unaongozwa na Marekani kuitokomeza kabisa IS katika kipindi cha miezi 9 ya uongozi wake.

Aidha Obama alisema mashambulizi yatalenga haswa kukatiza msururu wa wapiganaji wanaoenda ulaya na kusababisha maafa makubwa.

Ununuzi wa silaha waongezeka duniani

Wednesday, April 6 2016, 0 : 0

 

MATUMIZI ya ununuzi wa silaha duniani yamepanda kwa mara ya kwanza katika miaka minne wakati Marekani, China na Saudi Arabia zikitumia fedha nyingi zaidi juu ya suala hilo.

Kwa mujibu wa Shirika la Kimataifa la Utafiti wa Amani lenye makao yake Makuu mjini Stockholm nchini Sweden, ilisema kwamba inakadiriwa karibu euro trilioni 1.5, ama kiasi ya asilimia 2.3 ya pato la jumla la dunia, kilitumika kununulia silaha mwaka 2015. Juhudi za kulizuia kundi la wanamgambo wa Dola la Kiislamu (IS) na mzozo wa Ukraine ni sababu ambazo zimeongeza matumizi ya ununuzi wa silaha duniani.

Watafiti hao wanakadiria kwamba karibu asilimia 10 ya fedha zilizotumika zinaweza kuleta huduma kwa watu milioni 800 wanaoishi katika umaskini uliokithiri na wanaoteseka kwa njaa.

Mbali na mizozo hiyo lakini pia kuwepo kwa makundi yanayopigana na kutaka kujitenga katika maeneo mbalimbali duniani nayo yameongeza matumizi ya silaha duniani.

Moja ya sehemu zenye migogoro ya kivita ni pamoja na waasi wa Houth nchini Yemen ambao wamefanikiwa kuteka mji Mkuu wa nchi hiyo Sanaa na kuilazimisha Serikali inayotambuliwa kimataifa kuhamishia shughuli zake katika mji mwingine na kuendeleza mapigano ili kuudhibiti tena mji huo kwa kuungwa mkono na Saudi Arabia na washirika wake.

Mgogoro mwingine ni ule wa Iraq ambapo majeshi ya Muungano yanayoongozwa na Marekani yanaendelea kupambana vikali na kundi la IS huku Urusi na Iran ukiiunga mkono Serikali ya Syria na kisha kuwashambulia IS Sehemu nyingine ambapo matumizi makubwa ya silaha yanatumika ni nchini Libya ambapo mapigano yanaendelea baina ya makundi yanayotaka kudhibiti jiji la Tripoli.

  • Watu 12 wauawa kwa mabomu Iraq

    Monday, April 25 2016, 0 : 0

     

    WATU 12 wameuawa na wengine 39 kujeruhiwa katika mashambulizi mawili ya bomu katika mji Mkuu wa Iraq, Baghdad.

    Habari zinasema kuwa, shambulizi la kwanza lilifanyika karibu na kituo cha upekuzi katika eneo la Husseiniya kaskazini mwa mji huo na kuua watu tisa na kujeruhi wengine 28.

    Shambulizi la pili lililenga msafara wa magari ya kijeshi katika eneo la Arab Jabour, Kusini Mashariki mwa mji Mkuu wa Baghdad na kusababisha vifo vya watu watatu na wengine 11 kujeruhiwa.

    Hakuna kundi lolote lililotangaza kuhusika na milipuko hiyo ya mabomu ya kutegwa kwenye gari jana jioni,lakini hujuma kama hizo mara kwa mara zimekuwa zikifanywa na kundi la Dola la Kiislam (IS).

    Ijumaa iliyopita, watu wasiopungua tisa waliuawa na wengine zaidi ya 25 kujeruhiwa baada ya bomu kulipuka ndani ya msikiti mmoja katika eneo la Radwaniyah kusini magharibi mwa mji mkuu wa Iraq, Baghdad.

    Aidha siku ya Alkhamisi kulitokea milipuko mingine katika maeneo kadhaa ya mji wa Baghdad ambapo watu wanane waliuawa na wengine kadhaa kujeruhiwa.

    Idara ya Umoja wa Mataifa nchini Iraq ilisema Wairaqi 1,119 waliuawa kote nchini humo katika hujuma za kigaidi mwezi uliopita wa Machi pekee.

  • Korea ya Kaskazini yajaribu kombora la masafa marefu

    Monday, April 25 2016, 0 : 0

     

    KIONGOZI wa Korea ya Kaskazini, Kim Jong -Un, amesifu jaribio la kombora la masafa marefu lililorushwa kutokea kwenye nyambizi na kuongeza kuwa, ni mafanikio ya kufungua macho.

    Vyombo vya habari vya Serikali ya nchi hiyo vilimnukuu Kiongozi huyo akisema kwamba nchi yake inao uwezo wa kuzipiga Marekani na Korea ya Kusini wakati wowote itakapotaka.

    Marekani,ikiungwa mkono na Uingereza ilisema jaribio hilo lililofanywa hapo jana linakiuka maazimio ya Baraza la Usalama la Umoja wa Mataifa na imeitaka Korea ya Kaskazini kuepuka kuchukua hatua zaidi zinazoweza kuiyumbisha kanda yote.

    Hata hivyo Wizara ya Ulinzi ya Korea ya Kusini ilisema jaribio la Korea ya Kaskazini lililofanyika kwenye bahari ya Japan halikufanikiwa.

    Kwa mujibu wa Wizara hiyo kombora hilo lililofyatuliwa kutokea kwenye nyambizi liliruka umbali wa kilometa 30 tu.

  • Malema: Wapinzani wako tayari kumpindua Rais Zuma

    Monday, April 25 2016, 0 : 0

     

    KIONGOZI wa upinzani nchini Afrika Kusini, Julias Malema, ameonya kuwa, wapinzani wako tayari kuipindua serikali ya Rais Jacob Zuma wa nchi hiyo hata kwa mtutu wa bunduki.

    Katika mahojiano na kituo cha luninga cha al-Jazeera ya nchini Qatar,Malema ambaye pia Mkuu wa chama cha Economic Freedom Fighters alisema wao hawaogopi jeshi wala vita, na watapigana ikibidi hata kubeba silaha ili kuiangusha serikali iliyoko madarakani.

    Malema ambaye ni mkosoaji mkubwa wa serikali ya Rais Jacob Zuma alisema subira itawaishia na hawatakuwa na budi kuing'oa Serikali hata kwa mtutu wa bunduki.

    Wapinzani nchini Afrika Kusini walimtuhumu Rais Zuma kuwa ni Kiongozi fisadi mara baada ya Mahakama ya Katiba ya nchi hiyo kumpata na hatia ya kukiuka Katiba na kumuagiza kulipa sehemu ya fedha zilizotumiwa katika ukarabati wa nyumba yake binafsi katika eneo la Kwa Zulu Natal, mradi ambao uligharimu zaidi ya dola milioni 16 za Marekani.

    Hata hivyo Rais Zuma alinusurika kura ya kutokuwa na imani naye bungeni kufuatia kashfa hiyo.

  • Watoto wa Kipalestina 438 wafungwa Israel

    Monday, April 25 2016, 0 : 0

     

    IDADI ya watoto wadogo wa Kipalestina wanaozuiliwa kwenye magareza ya Israel imeongezeka kwa kiwango kikubwa tangu mwezi Oktoba mwaka uliopita na kufikia wafungwa watoto 438 akiwemo binti wa miaka 12.

    Gazeti la Haaretz limeripoti kuwa, idadi ya wafungwa wa Kipalestina ambao ni watoto wadogo katika jela hizo imeongezeka kutoka 170 mwezi Septemba mwaka uliopita wa 2015, hadi 438 mwezi Januari mwaka huu wa 2016.

    Takwimu za Shirika la Magereza la Israel zilionesha kuwa, idadi ya wafungwa Wapalestina wenye umri kati ya miaka 16-18 imeongezeka kutoka 143 hadi 324 katika kipindi hicho, huku walio na umri wa miaka 14-16 pia ikiongezeka kutoka 27 hadi 98.

    Aidha binti wa miaka 12 wa Kipalestina ndiye mfungwa mwenye umri mdogo zaidi katika magereza ya Israel.

    Mbali na wafungwa 7,000 wa Kipalestina, lakini pia Israel unawashikilia zaidi ya wafungwa 5,000 wa kigeni katika.

biashara na uchumi

FNB yafungua tawi Mwanza

Thursday, May 5 2016, 0 : 0

 

BENKI ya First National Bank (FNB) Tanzania imeendelea kupanua wigo kitaifa kwa kufungua tawi jipya eneo la Rock City Mall jijini Mwanza jana.

Akizungumza wakati wa ufunguzi, Mkuu wa Biashara wa benki hiyo, Francois Botha, alisema uzinduzi wa tawi la FNB Mwanza umelenga kukidhi ongezeko kubwa la mahitaji ya huduma za kibenki na za kifedha katika mkoa huo.

"Uzinduzi wa tawi la Mwanza ni sehemu ya uwekezaji endelevu na mkakati wa kuhakikisha maeneo mengi ya nchi yanapata huduma bora za kifedha. Pia tumezingatia ukuaji wa haraka wa Mkoa wa Mwanza ambao una mchango mkubwa katika kukuza uchumi wa Tanzania," alisema.

Botha alisema tawi Mwanza ni la tisa miongoni mwa mtandao wa matawi ya FNB Tanzania ikiwa ni sehemu ya mpango mkakati wa kupanua mtandao wa matawi ili kuyafikia maeneo yote nchini.

"First National Bank daima tunafikiri njia mbalimbali za ambazo tunaweza kutoa huduma za kibenki kwa urahisi kwa wateja wetu. Tawi letu la Mwanza litatoa ufumbuzi wa kina kwa wateja wanaoishi Mwanza na maeneo jirani yenye biashara inayokua kwa kasi," alisema Botha na kuongeza.

Mara kwa mara tunafikiria mbinu mpya za kutuwezesha kutoa huduma inayowapa unafuu wateja wetu kwa kupeleka huduma hiyo karibu na makazi pamoja na biashara zao. Tawi hili litarahisisha huduma kwa wateja wetu wanaoishi jijini Mwanza na maeneo ya jirani ambayo yana biashara nyingi zinazokua kwa kasi," alisema Botha.

Akizungumza katika hafla hiyo, Mkuu wa Mkoa wa Mwanza, John Mongella alisema Mkoa wa Mwanza una uwezo mkubwa wa kiuchumi na ukuaji mkubwa wa sekta mbalimbali za kiuchumi karibuni ni ishara kuwa Mwanza inakua kwa kasi." Tunakaribisha uwepo wa FNB na tunatazamia kuwasaidia kuimarisha huduma zenu hapa na mikoa mengine," alisema Mongella.

Alisema mbali na Mkoa wa Mwanza kuwa na mchango mkubwa katika maendeleo ya uchumi wa nchi bali pia inazalisha mali nyingi na ina utajiri mkubwa wa rasilimali.

"Tunatarajia kuwa mtatoa mchango mkubwa katika utoaji huduma za kifedha mkoani Mwanza kupitia huduma zenu mbalimbali kwa kutumia ubunifu na utaalamu wenu," alisema Mongella.

Tawi hilo lililofunguliwa kwenye jengo jipya la Rock City Mall litatoa huduma za kawaida za kibenki pamoja na huduma za dijitali kwa masaa 24 ili mahususi kukidhi mahitaji ya watumiaji huduma pamoja na wafanyabiashara katika eneo hilo.

FNB ni benki inayotoa huduma kwenye nchi mbalimbali barani Afrika tangu mwaka 1874. Hivi sasa FNB inatoa huduma zake kwenye nchi za Afrika Kusini, Namibia, Botswana, Zambia, Mozambique, Lesotho, Swaziland na Tanzania na mpango wake ni kuwa benki inayohudumia watu wengi zaidi barani Afrika.

NEEC, JKT wazindua mafunzo ya ujasiriamali

Wednesday, April 6 2016, 0 : 0

 

BARAZA la Taifa la Uwezeshaji Wananchi Kiuchumi (NEEC) kwa kushirikiana na Jeshi la Kujenga Taifa (JKT) limezindua mafunzo ya siku 12 ya kuwajengea uwezo wa elimu ya ujasiriamali wakufunzi wa jeshi hilo ili kutatua tatizo la ajira hapa nchini.

Akizungumza na waandishi wa habari baada ya hafla ya uzinduzi huo, Katibu Mtendaji wa baraza hilo, Bi. Beng'i Issa alisema mafunzo hayo yameandaliwa kwa kushirikiana na jeshi hilo ili nao waweze kuwa na ujuzi wa kuwafundisha vijana wanaojiunga na jeshi hilo katika masuala mbalimbali ya ujasiriamali.

"Ni mafunzo ya kuwapatia ujuzi wakufunzi hawa ili nao waweze kuwafundisha vijana wanaojiunga na mafunzo ya JKT," alisema na kuongeza kuwa nia ni kuwajenga vijana wahitimu wa jeshi hilo waweze kujiajiri na kuajiri wenzao wanaporudi vijijini na mijini.

Alisema hii ni kutokana na kukosekana kwa ajira za kutosha kuweza kuajiri vijana wote wanaofuzu jeshi kutokana na ukosefu wa elimu ya ujasiriamali, mitaji na elimu ya ushirika.

"Mafunzo haya yatawapatia elimu ya ushirika wa akiba na mikopo, elimu ya vikundi vya kifedha kama VICOBA ili watakaporudi uraiani waweze kujitegemea kwa kuweka akiba na kukopa," alisema.

Mafunzo hayo ya wakufunzi 53 yanayofanyika katika kambi ya Mgulani yanahusisha Mikoa ya Dar es Salaam, Lindi na Pwani.

Aliwahimiza vijana wanaohitimu masomo wajiunge na mafunzo ya JKT kwa wingi na huko watakutana na mafunzo hayo yanayolenga kuwajenga katika kujitegemea.

Mkurugenzi wa Ulinzi wa Amani, Chini ya Tawi la Mafunzo, Makao Makuu ya Jeshi, Brigedia Jenerali, Henry Kamunde alisema mafunzo hayo kwa wakufunzi wa jeshi yana maana kubwa kwa jeshi lao kwani yatasaidia kunoa vijana.

"Jeshi letu halina uwezo wa kuajiri vijana wote wanaopitia mafunzo ya kujitolea ya ukakamavu, uzalendo na utaifa...mafunzo haya yatawapa fursa kubwa," alisema.

Aliwataka wakufunzi hao kushiriki vyema mafunzo hayo ili wakatumike kuwafundisha vijana hao ili wawe chachu ya uchumi na uzalendo kwa taifa lao.

Naye Mkurugenzi wa Mafunzo ya Ufundi Stadi, JKT, Kanali Chacha Wanyancha alisema kanda itakayofuata itakuwa ya Kati na Magharibi itakayojumuisha Mikoa ya Dodoma, Kigoma, Tabora na Mwanza," alisema.

Mafunzo yatafanyika katika kambi ya Makutopora, Dodoma.

Mafunzo katika Kanda ya Kusni yatafanyika Mafinga ambapo mikoa itakayohusika itakuwa Ruvuma, Mbeya, Songwe, Rukwa, Iringa na Njombe.

Mafunzo katika Kanda ya Kaskazini yatafanyika katika kambi ya Mgambo mkoani Tanga na kuhusisha Mikoa ya Tanga, Arusha na Kilimanjaro.

Tangu kurejeshwa kwa utaratibu wa mafunzo ya vijana wa kujitolea mwaka 2001 idadi ya vijana wanaojiunga na JKT imeendelea kuongezeka kila mwaka.

Vijana waliopita JKT hadi mwaka 2014 ni 104,594. Kati ya idadi hii, vijana 34,291 waliingia kwa mpango wa kujitolea ambapo asilimia 70 waliajiriwa na vyombo mbalimbali vya ulinzi na usalama.

Asilimia 30 inayobaki, sawa na vijana 2,000 wanarudi nyumbani kila mwaka.

  • TRA yahimiza wanataaluma kujijengea uwezo

    Thursday, May 5 2016, 0 : 0

     

    MAMLAKA ya Mapato Tanzania (TRA) imehimiza wanataaluma katika masuala ya kodi na utawala nchini kujijengea uwezo kitaaluma ili kuendana na mahitaji na mabadiliko ya teknolojia ya ukusanyaji mapato kwa ufanisi kwa maendeleo ya nchi.

    Akizungumza Dar es Salaam mwishoni mwa wiki Mkurugenzi wa Rasilimali Watu na Utawala wa TRA, Victor Kimaro alisema ni muhimu wanataaluma wa masuala ya kodi kujijengea uwezo wa kumudu katika ukusanyaji wa mapato, ili kufikia malengo waliyojiwekea kwa mwaka.

    Kimaro alisema hayo wakati wa maadhimisho ya siku maalumu ya wanafunzi kuonesha ujuzi wa taaluma (Career Day) wanayojifunza Chuo cha Kodi kinachomilikiwa na TRA, yalihusisha wanataaluma na wasomi wa masuala ya kodi na utawala yaliyofanyika kwenye Ukumbi wa Chuo cha Kodi Mikocheni B, Dar es Salaam.

    Alisema ni wajibu wa wadau mbalimbali kuonesha uwezo wao wa kumudu ukusanyaji wa kodi vizuri ili waweze kufanikisha vizuri malengo waliyojiwekea.

    Pia aliushukuru uongozi wa Chuo cha Kodi (ITA) kwa kujitolea kutoa elimu ya mara kwa mara kwa wawekezaji wote wanaokuja nchini, ili waweze kutimiza wajibu wao kwa mujibu wa sheria wa kulipa kodi wanapowekeza nchini.

    Kimaro alisema wanataaluma wanapoadhimisha Siku ya Kodi 'Career Day' ni muhimu kutathmini ikiwa wamefikia malengo na viwango walivyojiwekea katika utekelezaji wa masuala wa yale waliyojipangia na kuwataka kukumbuka kuwa wao ni tegemeo la taifa.

  • Wakulima watakiwa kurudisha mikopo kwa wakati

    Thursday, May 5 2016, 0 : 0

     

    MKUU wa Wilaya ya Kilombero mkoani Morogoro, Lephy Gembe amewataka wakulima wa zao la mpunga katika eneo hilo kurudisha mikopo kwa wakati, ili wakulima wengine waweze kunufaika zaidi.

    Akizungumza mjini Kilombero mwishoni mwa wiki wakati wa ufunguzi wa warsha ya wakulima wadogo zaidi ya 340 wa Mkoa wa Morogoro, Gembe alisema ni muhimu wakulima wote waliopata fursa ya kuhudhuria warsha hiyo kujipanga katika kuchangamkia fursa za mikopo inayotolewa na Benki ya Maendeleo ya Kilimo Tanzania (TADB).

    "Nawasihi mrudishe mikopo mtakayopewa kwa wakati, ili wakulima wengine waweze kunufaika zaidi na benki hii na vile vile kuwezesha benki kutoa huduma kwenye maeneo mengine ya Tanzania," alisema.

    Kwa upande wake Mkurugenzi wa Mikopo na Biashara wa TADB, Robert Paschal alisema benki hiyo imetoa mkopo wa sh. milioni 890 kwa wakulima wa zao la mpunga wanaojishughulisha na kilimo cha umwagiliaji katika Kijiji cha Mkula wilayani Kilombero.

    Alisema lengo la mkopo huo ni kuongeza tija na uzalishaji wa mpunga, ili kusaidia upatikanaji wa utoshelezi na usalama wa chakula ambao ni endelevu nchini na kusaidia mapinduzi ya kilimo kutoka kilimo cha kujikimu kwenda cha kibiashara, ili kupunguza umaskini na kukuza uchumi.

    "Mkopo huu na mingine tunayotoa imelenga kuongeza tija na uzalishaji katika kilimo,ili kusaidia kukabiliana na upungufu huo na kuhusisha upatikanaji wa mikopo katika sekta ya kilimo na kuleta mapinduzi katika kilimo nchini," alisema Paschal.

    Paschal alisema mkopo huo utasaidia shughuli mbalimbali za utayarishaji wa mashamba, kupima ubora wa udongo na virutubisho vinavyohitajika kwenye uzalishaji wa mpunga, pamoja na kuwezesha upatikanaji wa pembejeo za kilimo zikiwemo mbegu bora, mbolea na dawa.

  • Wakulima waelimishwa matumizi dawa za kilimo

    Thursday, May 5 2016, 0 : 0

     

     

    KAMPUNI ya TBL Group imejikita katika kuelimisha wakulima inaoshirikiana nao matumizi sahihi ya dawa za kilimo zenye kemikali za sumu na jinsi ya kujikinga wasiathirike na matumizi yake, ikiwemo kuwapatia vifaa vya kujikinga.

    Kampeni hii ambayo inatekelezwa kwa kushirikiana na kampuni ya kuuza mazao na pembejeo za kilimo ya Syngenta Tanzania tayari imeanza kutekelezwa kwa wakulima wa zao la Shahiri mkoani Arusha na itaendelea kufanyika katika mikoa mbalimbali.

    Meneja wa anayesimamia uendelezaji wakulima kutoka TBL Group,Dkt.Bannie Basson alisema mkakati huu una lengo la kuhakikisha wakulima wanafanya kazi yao katika mazingira ya usalama ili waweze kufanya uzalishaji wenye tija.

    "Kampuni ya TBL Group imeanza kutekeleza mpango wa Go Farming ambao utawashirikisha wakulima wengi ambapo, watakuwa wanawezeshwa kupatiwa mbegu bora, pembejeo za kilimo na utaalamu ili waweze kuongeza uzalishaji ambapo, pia mazao yao yatanunuliwa kwa bei nzuri ili waweze kuinuka kiuchumi kama ambavyo tayari wakulima wa zao la shahiri tayari wameanza kunufaika na mpango huu," alisema Dkt. Basson.

    Aliwaasa wauzaji wa dawa za kilimo na pembejeo popote walipo nchini kuhakikisha wanakuwa na wataalamu wa kutoa elimu ya usalama kwa wakulima ili kuwaepusha na madhara ya dawa ambazo zimekuwa zikiathiri afya za wakulima kutokana na kutokuwa na elimu ya matumizi yake.

    Kwa upande wake Meneja Biashara wa kampuni ya Syngenta Tanzania Ltd, Bw. Samuel Muturi alisema kuwa kampuni hiyo inafurahi kufanya kazi na TBL katika kuwapatia wakulima elimu juu ya matumizi ya dawa za kilimo zenye kemikali za sumu na vifaa vya kujikinga na aliwaasa wakulima kuzingatia kanuni za usalama wanazofundishwa.

    Naye Godwin Mollel,Mwenyekiti wa kikundi cha wakulima wa zao la Shahiri cha Fungamano kilichopo Monduli mkoani Arusha akiongea kwa niaba ya wenzake alishukuru jitihada zinazofanywa na TBL kusaidia wakulima tangu ilipoanzisha mpango wa kushirikiana nao.

    "Wakulima tumenufaika kwa kiasi kikubwa na ushirikiano huu ambapo wengi wetu maisha yetu yamebadilika na kuwa bora kutokana na kuwa na soko la uhakika wa mazao tunayolima. Kwa kupatiwa vifaa ya kinga na elimu ya matumizi ya dawa zenye kemikali wakulima wengi tutakuwa salama kwa afya zetu na kampuni hii haina budi kusambazwa katika mikoa yote nchini hususan maeneo ya vijijni," alisema.

  • Wauzaji wa Huawei kupatiwa motisha

    Thursday, May 5 2016, 0 : 0

     

    KAMPUNI ya Huawei imeahidi kutoa motisha kwa wasambazaji na wauzaji wa simu hizo ili kusaidia ukuaji wa wadau nchini.

    Ahadi hiyo iliyotolewa hivi karibuni na uongozi wa Kampuni ya Huawei Device Tanzania katika mkutano wake wa kwanza wa wasambazaji wa simu za mkononi wakitilia mkazo katika mipango ya ukuaji kwa kampuni ya Huawei Device Tanzania na wadau wao waliopo mikoani katika soko la Tanzania kwa ujumla.

    Mkutano huu uliyofanyika Aprili 30, mwaka huu jijini Dar es Salaam ikiwa ni sehemu ulisherehekea juhudi na msimamo wa muda mrefu wa wauzaji wa simu za mkononi Huawei Device Tanzania.

    Akiongea katika mkutano huo, Hu Xiangyang Jacko, ambaye Meneja wa Huawei Device nchini Tanzania alisema: "Tunafuraha kuweza kuzungumza na wadau wetu ambao watatuwezesha kuwa wauzaji wa simu za mkononi bora na namba Moja nchini Tanzania, kutoka nafasi ya pili ambapo tuna asilimia 22 ya hisa katika soko."

    Pia alisema watatoa motisha zaidi ikiwa ni pamoja na kutangaza mpango mahususi ambapo wauzaji wakuu watazawadiwa dola za Kimarekani 20,000 kwa mshindi wa kwanza na nafasi ya pili atapewa dola za Marekani 10,000.

    Wang aliwapongeza zaidi wauzaji kwa kusaidia Huawei Device Tanzania na zaidi ya wauzaji 50 walipewa vyeti kuthibitisha kuwa wanauza simu halisi (orijino) za Huawei.

    Bw Huziangyang Jacko, Meneja wa Huawei Device nchini Tanzania aliwapongeza wasambazaji na wauzaji wa rejareja kwa kufanya kazi vizuri.

    Kwa upande wao wauzaji walishukuru juhudi za Hauwei katika kuboresha kiwango cha ubora cha simu na walikiri ubora wa hali ya juu ya simu za Huawei zenye marejesho ya asilimia 0.02.

    Katika mkutano huo Huawei Device Tanzania walitangaza simu mpya ambazo zitakua sokoni hivi karibuni kama P9, Mate 8, GR5, GR3, Y6 Pro, Y3 II na Y3 Lite kuhakikisha wateja wote wa Tanzania wana uwanja mpana wa uchaguzi.

michezo na burudani

Azam ndio basi tena

Thursday, May 5 2016, 0 : 0

 

MDUDU wa sare amezidi kuiandama Azam FC, baada ya jana kulazimishwa sare ya 2-2 na JKT Ruvu katika mechi yake ya Ligi Kuu Tanzania Bara iliyochezwa Uwanja wa Azam Complex Chamazi nje kidogo ya Dar es Salaam.

Kwa matokeo hayo Azam sasa imefikisha pointi 60, huku vinara wa ligi hiyo Yanga wakiwa na pointi 68, Simba wao wanashikilia nafasi ya tatu kwa pointi zao 58.

Mpira ulianza kwa kasi huku timu zote mbili zikishambuliana kwa zamu, walikuwa JKT Ruvu walioanza kuchungulia lango la Azam FC dakika ya pili Saady Kipanga akiwa nje ya 18 aliachia shuti kali ambalo kipa wa Azam Aishi Manula aliliona na kudaka.

Azam FC nao wali fanya shambulizi langoni mwa JKT dakika ya 22 kupitia kwa kinda wake Gadiel Michael lakini shuti lake likapanguliwa na kipa wa JKT na kuwa kona tasa.

JKT Ruvu watatakiwa kujilaumu wenyewe baada ya beki wake Omary Kindamba kujifunga mwenyewe dakika ya 31 katika harakati za kuokoa na kuiandikia Azam bao la kwanza.

Azam walizidi kuandika kalamu ya mabao, dakika ya 37 mshambuliaji wake Kipre Tchetche alifunga bao la pili baada ya mabeki wa JKT kujichanganya wenyewe eneo la hatari, kazi nzuri ilifanywa na Himid Mao ambaye alimsetia vizuri mfungaji.

Hadi kipindi cha kwanza kinamalizika Azam FC walikuwa mbele kwa mabao 2-0.

Hata hivyo Azam FC itabidi wajutie nafasi walizozipata na kushindwa kuzitumia katika kipindi hiki cha kwanza.

Kipindi cha pili kilianza Azam wakitaka kuelendelza kalamu ya mabao, huku JKT nao wakitaka kushinda ili kujinusuru na janga la kushuka daraja.

Dakika ya 56 JKT Ruvu walipata bao la kwanza la penalti kupitia kwa Saady Kipanga ni baada ya mchezaji wa Azam Gadiel kuunawa mpira ndani ya 18.

Mechi ni ngumu kwa pande zote kwani kila moja inajitahidi kushambulia lakini umakin mdogo wa washambuliaji wao unawakosesha mabao.

JKT Ruvu walipata bao la pili kupitia kwa Mussa Juma baada ya kutokea shika ni kushike kwenye lango la Azam FC.

Hadi kipyenga cha mwisho kinapulizwa timu zote zilikuwa zimefungana 2-2.

Azam watinga fainali FA kwa 'Matuta'

Monday, April 25 2016, 0 : 0

 

TIMU ya Azam imefanikiwa kuingia katika hatua ya fainali ya michuano ya Kombe la FA baada ya kushinda mchezo wake dhidi ya timu ya Mwadui FC kwa mikwaju ya penati 5-3 baada ya kumalizika kwa mchezo huo kwa sare ya mabao 2-2.

Katika mchezo huo uliopigwa jana katika uwanja wa Mwadui, Azam walikuwa wa kwanza kupata bao katika dakika ya 5 ya mchezo kupitia kwa Khamis Mcha na kuwafanya Mwadui kucheza kwa nguvu katika kutafuta bao la kusawazisha.

Timu zote zilicheza kwa nguvu katika kipindi cha kwanza ambapo zote zilikosa nafasi nyingi za wazi lakini Mwadui walipaswa kujilaumu wenyewe kwa kushindwa kupachika mabao katika kipindi hicho kwani waliweza kutengeneza nafasi nyingi za mabao lakini washambiliaji wake wakiongozwa na Kelvin Sabato walishindwa kuzitumia vizuri nafasi walizopata.

Mchezo huo ulikwenda katika mapumziko Azam wakiwa mbele kwa bao hilo moja ambapo kipindi cha pili kilianza kwa nguvu ambapo katika kujiongezea makali, zote zilifanya mabadiliko kadhaa ambapo Azam aliingia Allan wanga na Frank Domayo kuchukua nafasi za Salumu Abubakr na Khamis Mcha.

Kwa upande wao Mwadui mchezaji Tegete aliingia kuchukua nafasi ya Matogoro na kuongeza nguvu katika safu ya ushambuliaji ambapo mabadi l iko hayo yaliwanufaisha ambapo katika dakika ya 82 mchezaji Hassan Kabunda aliisawazishia Mwadui kwa shuti kali ndani ya eneo la hatari na kuifanya mechi hiyo kumalizika kwa sare ya bao 1-1 na kuongezwa dakika 30 kwani ilikuwa lazima mshindi apatikane.

Katika dakika za awali za nyongeza Azam walifanikiwa kuongeza bao la pili kupitia kwa Mcha na huku Azam wakiamini kuwa wameshinda mchezo huo, Mwadui walisawazisha katika dakika za majeruhi za kipindi cha dakika 15 za mwisho na kuifanya 'game' hiyo kumalizika dakika 120 timu hizo zikitoshana nguvu ya mabao 2-2.

Katika hatua hiyo timu hizo ziliingia katika changamoto ya mikwaju ya penati ambapo Azam walifanikiwa kupata penati zote 5 huku Mwadui wakikosa moja na kutolewa katika michuano hiyo.

Shujaa wa Azam FC alikuwa ni beki Aggrey Morris, aliyefunga penalti ya tano na kuamsha shangwe kwa wachezaji wenzake.Wengine waliofunga penalti za Azam FC ni Nahodha John Bocco, Himid Mao, Allan Wanga na Waziri Salum wakati tatu za Mwadui zilifungwa na Malika Ndeule, Iddi Moby na Jabir Aziz. Aliyekosa upande wa Mwadui ni Kevin Sabato.

Wakati huo huo mchezo mwingine wa nusu fainali wa Kombe la Shirikisho la Soka Tanzania (TFF), maarufu kama Kombe la Azam Sports Federation Cup kati ya wenyeji, Coastal Union na Yanga na Dar e Salaam umevunjika baada ya dakika 110.

Mchezo huo ulivunjika wakati Yanga ikiwa mbele kwa mabao 2-1 Uwanja wa Mkwakwani, Tanga kufuatia mshika kibendera namba mbili kupasuliwa juu ya jicho la kushoto kwa jiwe lililotupwa na shabiki.

Coastal Union ilitangulia kwa bao la kiungo Mcameroon, Youssouf Sabo kabla ya Yanga kusawaziha kupitia kwa mshambuliaji Mzimbabwe, Donald Ngoma, mabao yote kipindi chahezo huo pili.

Mshambuliaji Mrundi, Amissi Tambwe akaifungia Yanga bao la pili mwanzoni tu mwa dakika 30 za nyongeza baada ya dakika 90 kumalizika timu hizo zikiwa zimefungana bao 1-1.

Kaimu Mkurugenzi wa Mashindano wa Shirikisho la Mpira wa Miguu Tanzania (TFF) Jemedali Saidi alisema hatima ya mchezo huo utasubiri taarifa za uwanjani kutoka kwa mwamuzi wa mchezo Abdallah Kambuzi na Kamisaa wa mchezo huo ambapo watakaa kikao kujadili na kwamba mazingira ya kuvunjika mchezo huo kanuni zake zipo hivyo mashabiki wasubiri kikao hicho.

Alisema kuvunjika kwa mchezo huo kumesababishwa na sababu za kibinadamu ambapo kanuni zake zipo ana kwamba ingekuwa sababu ya kuvunjika kwake kupo nje ya uwezo wa kibinadamu pia kanuni zake zipo na katika hilo wangeweza hata kutoa maamuzi siku ile ile pale uwanjani lakini uhalisia wa kuvunjika kwa mchezo huo kutahitaji majadiliano katika vikao husika.

  • Yanga: Tutasimamia uchaguzi wetu wenyewe

    Thursday, May 5 2016, 0 : 0

     

     

    BODI ya Wadhamini wa Yanga imesistiza uchaguzi wa klabu hiyo utafanyika Juni 5, mwaka huu na si Juni 25, kama ambavyo Shirikisho la Soka Tanzania (TFF) limeagiza.

    Taarifa ya Bodi ya Wadhamini ya Yanga imesema kwamba hawawezi kuchelewa kufanya uchaguzi kwa sasa kwa sababu mbalimbali za msingi.

    Kwanza, timu ipo kwenye mashindano ya Kombe ya Afrika, Ligi Kuu ya Vodacom Tanzania Bara na Kombe la Shirikisho la Soka Tanzania (TFF), maarufu kama Kombe la Azam Sports Federation (ASFC).

    Aidha, taarifa hiyo imesema kwamba viongozi wapya wa Yanga wanatakiwa kuingia madarakani mapema ili waanze kufanya usajili na kupanga mambo mengine ya msimu mpya.

    Aidha, Bodi hiyo pia imepinga uchaguzi wao kusimamiwa na TFF, badala yake imeagiza usimamiwe na Kamati ya Uchaguzi ya klabu na TFF watakuwapo kama waangalizi.

    "Yanga imesajiliwa kama CCM, CUF, CHADEMA lakini tofauti ni wengine wamesajiliwa kama vyama vya siasa, Yanga imesajiliwa kwa ajili ya michezo na Mamlaka ya Michezo chini ya Wizara ya Michezo na Utamaduni, na katika michezo hiyo ukiwemo mpira wa miguu, imejisajili yenyewe TFF.

    "Kwa maneno mengine, Yanga ingeweza kuchagua kushiriki netiboli ingejisajili na Shirikisho la netiboli, na au michezo mingine, kama ngumi ingejisajili Shirikisho la Ngumi, lakini kwa kujisajili kwenye soka haiwazuii kufanya mambo kwa mujibu ya Katiba yao," ilisema taarifa hiyo.

  • Mayanja alia na washambuliaji wake

    Thursday, May 5 2016, 0 : 0

     

    KOCHA wa Simba, Jackson Mayanja baada ya kuangalia mechi iliyopita kati ya timu yake na Azam FC, amesema aligundua tatizo lilikuwa kwa washambuliaji wake kutokuwa makini.

    Mayanja alikuwa jukwaani akitumikia adhabu yake baada ya kupewa kadi nyekundu wakati wa mechi yao na Toto Africans na timu yake kuambulia kipigo cha bao 1-0, huku akieleza kuwa kikosi chake kilikuwa na uwezo wa kumaliza mchezo kipindi cha kwanza.

    Katika mechi kati ya Simba na Azam FC ya Ligi Kuu Bara iliyochezwa Uwanja wa Taifa jijini Dar es Salaam timu hizo zilitoka sare tasa na kuifanya Simba iendelee kubaki kwenye nafasi yake ya tatu ikiwa na pointi 58.

    Simba walitengeneza nafasi nyingi kipindi cha kwanza, lakini safu iliyokuwa chini ya Hamisi Kiiza mwenye mabao 19 ilishindwa kupenya ngome ya Azam.

    "Washambuliaji wangu hawakuwa makini kwani walipata nafasi ila hawakuzitumia, tulikuwa na uwezo wa kumaliza mechi kipindi cha kwanza,'' alisema Mayanja.

    Kocha huyo raia wa Uganda alichukua mikoba ya Muingereza, Dylan Kerr aliyetupiwa virago na kuingoza timu hiyo kushinda mechi nane za kwanza ikiwa chini yake.

  • Tambwe avunja rekodi ufungaji

    Thursday, May 5 2016, 0 : 0

     

    MSHAMBULIAJI wa kimataifa wa Burundi anayekipiga katika kikosi cha wanajangwani Amisi Tambwe amevunja rekodi yake aliyoiweka mwaka 2014 kwa kufikisha idadi ya magoli 20.

    Tambwe aliyesajiliwa kutoka Vital O ya nchini Burundi na kujiunga na Simba mwaka 2013, aliweza kuifungia timu yake magoli 19 na kuwa mfungaji bora.

    Msimu uliofuata haukuwa mzuri kwake hasa baada ya kushindwa kufanya vizuri katika kikosi cha wanamsimbazi na kuamua kumvunjia mkataba na kuhamia Yanga, ambapo aliweza kufikisha idadi ya magoli 14 akiwa nyuma ya Simon Msuva aliyekuwa kinara wa magoli msimu huo.

    Baada ya kujiunga na Yanga, Tambwe alionekana kubadilika na kuwa mbaya zaidi ambapo amekuwa akifukuzana na Mganda Hamis Kiiza mwenye magoli 19 kwa sasa.

    Mbio hizi za kutafuta kiatu cha ufungaji bora inaonekana kushika kwa kasi huku kila mshambuliaji akiwa na moto wa kuhakikisha anachukua kiatu hicho.

    Kama Tambwe akiendelea kufunga katika michezo mitatu iliyobaki anaweza kufukuzia rekodi iliyoweka na Abdalla Juma kipindi yupo Mtibwa Sugar mwaka 2006 alipofunga mabao 25.

  • Serikali yapiga 'Stop' Chura wa Snura

    Thursday, May 5 2016, 0 : 0

     

     

    SERIKALI imesitisha wimbo na video ya muziki wa Chura wa msanii Snura Mushi kuchezwa kwenye vyombo mbalimbali vya habari kuanzia jana mpaka pale msanii huyo atakapoifanyia marekebisho video ya wimbo huo.

    Akizungumza na waandishi wa habari jana, Kaimu Mkuu wa Kitengo cha Mawasiliano serikalini toka wizara ya Habari, Utamaduni, Sanaa na Michezo Zawadi Kawawa alisema kuwa usitishwaji huo umetokana na maudhui ya utengenezwaji wa Video hiyo ambayo haiendani na maadili ya Mtanzania.

    Pia Serikali imesitisha maonesho yote ya hadhara ya mwanamziki huyo mpaka pale atakapokamilisha taratibu za usajili wa kazi zake za sanaa katika Baraza la Sanaa la Taifa (BASATA).

    "Serikali inawataka wasanii kujiuliza mara mbili kabla ya kubuni kazi zao za sanaa. Wafikirie wazazi, ndugu, jamaa na marafiki zao watazipokeaje? Wavae nafasi ya wale wanaowadhalilisha, waelewe kwamba sanaa si uwanja wa kudhalilisha watu hata kidogo.".

    Aidha Serikali imechukizwa na kazi hiyo ambayo si tu inadhalilisha tasnia ya muziki bali inadhalilisha utu wa mwanamke na inaifanya jamii kuanza kuhoji hadhi ya msanii, weledi na taaluma ya sanaa kwa ujumla.

    Naye Mwanasheria wa Wizara hiyo amewakumbusha wananchi wote kutokujiingiza katika makosa ya sheria ya mtandao kwa kusambaza wimbo huu kwa njia yoyote ile ya kimtandao kwani hatua kali za kisheria zitachukuliwa.

    Pia serikali imevitaka vyombo vya habari viwe vya kwanza kuchuja maudhui ya kazi yoyote ya sanaa, kabla ya kuwa mawakala wa uharibifu wa jamii kupitia kucheza kazi chafu za sanaa.

    Serikali inatoa wito kwa wasanii wote kuzi ngatia maadili ya Kitanzania kabla ya kutoa kazi zao kwani haita wavumilia wasanii wachache ambao wanataka kuigeuza tasnia ya sanaa kuwa sehemu ya uvunjifu wa maadili.